ရန်ကုန်တိုင်း ယူ ၂၁ အသင်းကို Professional Club အသင်းအဖြစ် ဖွဲ့စည်းသွားမည်ဖြစ်ကြောင်း ရန်ကုန်တိုင်း ဘောလုံးအဖွဲ့ချုပ်ထံမှ သိရသည်။
အဆိုပါ ရန်ကုန်တိုင်း ယူ-၂၁ အသင်းသည် ကျင်းပပြီးစီးခဲ့သည့် အမျိုးသားအားကစားပွဲတော် ပြည်နယ်နှင့် တိုင်းအမျိုးသားယူ-၂၁ ဘောလုံးပြိုင်ပွဲ တတိယဆုရရှိထားသော အသင်းတစ်သင်းဖြစ်သည်။
ရန်ကုန်တိုင်းဒေသကြီးဘောလုံးအဖွဲ့ချုပ်အနေဖြင့် မြန်မာနိုင်ငံဘောလုံးအဖွဲ့ချုပ်မှ ကြီးမှူးကျင်းပနေသည့် ပြည်တွင်းလိဂ်ပြိုင်ပွဲများတွင် ဝင်ရောက်ယှဉ်ပြိုင်နိုင်ရန် ပြင်ဆင်လျက်ရှိပြီး၊ ပထမဆုံးခြေလှမ်းအဖြစ် ရန်ကုန်တိုင်းယူ-၂၁ အသင်းအား ကလပ်အသင်းတစ်သင်းအဖြစ် စတင်ဖွဲ့စည်းပေးသွားခြင်းဖြစ်ကြောင်း အဖွဲ့ချုပ်က အသိပေးထားသည်။
ထို့ပြင် ကစားသမားများ၏ ရပိုင်ခွင့်ဖြစ်သည့် လစာနှင့် Facilities (အသုံးအဆောင်)များကိုလည်း အပြည့်အဝ ပံ့ပိုးပေးသွားမည်ဖြစ်သည့်အပြင် သက်တမ်းအလိုက် မြန်မာ့လက်ရွေးစင်ဘောလုံးအသင်းအား အထောက်အပံ့ပေးနိုင်ရန် ရည်မှန်းထားကြောင်း သိရသည်။
လက်ရှိ အမျိုးသားအားကစားပွဲတော်ပြိုင်ပွဲဝင် ရန်ကုန်တိုင်းအသင်းကို ကစားသမား (၁၈) ဦးဖြင့် ဖွဲ့စည်းထားကာ အဆိုပါအသင်းကို အခြေခံပြီး အရည်အချင်းပြည့်မီသည့် ကစားသမားများကိုလည်း ထပ်မံရှာဖွေသွားမည်ဖြစ်ကြောင်းသိရသည်။
ထို့ပြင် ရန်ကုန်တိုင်းဒေသကြီးဘောလုံးအဖွဲ့ချုပ်အနေဖြင့် တိုင်းဒေသကြီး၏ ဘောလုံးအားကစားတိုးတက်မြင့်မားစေရေးကိုလည်း ဆောင်ရွက်လျက်ရှိပြီး လူငယ်ကစားသမားများ ပေါ်ထွက်လာစေရေးအတွက် စီမံကိန်းများ ချမှတ်ဆောင်ရွက်သွားမည်ဖြစ်သည်ဟု ရန်ကုန်တိုင်းဘောလုံးအဖွဲ့ချုပ်၏ အသိပေးချက်အရ သိရသည်။