ယခုနှစ်မိုးရာသီတွင် ရန်ကုန်တိုင်းဒေသကြီးအတွင်း မိုးစပါးဧက (၁၁) သိန်းကျော် စိုက်ပျိုးရန်လျာထားပြီး (၁၀) သိန်းကျော်စိုက်ပျိုးပြီးဖြစ်ကြောင်း ရန်ကုန်တိုင်းဒေသကြီး စိုက်ပျိုးရေးဦးစီးဌာနမှ သိရသည်။
တိုင်းဒေသကြီးအတွင်း၌ စပါးကို ဒဂုံမြို့သစ်၊ သန်လျင်၊ တွံတေး၊ မှော်ဘီ၊ လှည်းကူး၊ တိုက်ကြီး၊ မင်္ဂလာဒုံ၊ အင်းစိန်နှင့် အလုံစသည့် ခရိုင်တို့တွင် စိုက်ပျိုးကြပြီး အထွက်နှုန်းကောင်းမျိုးများဖြစ်သည့် မနောသုခ၊ ဆင်းသုခ၊ ရက်-၉၀၊ ရာကျော်၊ ရွှေဝါထွန်း၊ မှော်ဘီ-၃၊ အောင်နိုင်တိုး မျိုးစပါးအုပ်စုများနှင့် ဒေသမျိုးများဖြစ်သည့် ငစိန်၊ မြီးတုံး၊ ကောက်ညှင်း စသည့်မျိုးစပါးအုပ်စုများကို ပြည်တွင်းစားသုံးမှုနှင့် ပြည်ပပို့ကုန်အဖြစ် စိုက်ပျိုးထုတ်လုပ်လျက်ရှိကြောင်း သိရသည်။
မိုးစပါးကို ဇူလိုင်လဆန်းမှ စက်တင်ဘာလကုန်ပိုင်းအထိစိုက်ပျိုးလေ့ရှိပြီး သက်တမ်းတိုစပါးမျိုးများကို အောက် တိုဘာလကုန်ပိုင်းနှင့် သက်ကြီးစပါးများကို ဇန်နဝါရီလကုန်ပိုင်း၌ အပြီးသတ်ရိတ်သိမ်းလေ့ရှိကြောင်း ၊ ယခုနှစ်မိုးစပါးရာသီ၌ စိုက်ပျိုးရေးဦးစီးဌာန (ရေဆင်း) မှ ထုတ်လုပ်သည့် အောင်နိုင်တိုးမျိုးစပါးအသစ်ကို ဧက (၅၀၀၀) အထိ တောင်သူများစိုက်ပျိုးလျက်ရှိပြီး တစ်ဧကလျှင် ပျမ်းမျှအားဖြင့် တင်း (၈၀) ကျော်ထွက်ရှိသဖြင့် တောင်သူများစိတ်ဝင်စားသော မျိုးစပါးအဖြစ် ယခုမိုးရာသီ၌ စတင်စိုက်ပျိုးခဲ့ခြင်းဖြစ်သည်။
မိုးစပါးထက် နွေစပါးကို တောင်သူများ ပိုမိုအားထားသော်လည်း မိုးစပါးသည် ရာသီလိုက်စပါးဖြစ်ပြီး မိုးမပြတ်ရရှိမှုကြောင့် ထွက်နှုန်းသေချာသော စပါးအဖြစ် တောင်သူများမဖြစ်မနေစိုက်ပျိုးခြင်းဖြစ်သည်။
ယခုနှစ်မိုးစပါးရာသီ၌ စိုက်ပျိုးရေးဦးစီးဌာန (ရေဆင်း) မှ ထုတ်လုပ်သည့် အောင်နိုင်တိုးမျိုးစပါးအသစ်ကို ဧက (၅၀၀၀) အထိ တောင်သူများ စိုက်ပျိုးလျက်ရှိပြီး တစ်ဧကလျှင် ပျမ်းမျှအားဖြင့် တင်း (၈၀) ကျော်ထွက်ရှိသဖြင့် တောင်သူများစိတ်ဝင်စားသော မျိုးစပါးအဖြစ် ယခုမိုးရာသီ၌ စတင်စိုက်ပျိုးခဲ့ခြင်းဖြစ်သည်။
တိုင်းဒေသကြီးအတွင်း၌ ဝမ်းစာစပါးဖူလုံမှုကို တိုင်းတာရာ၌ ၂၀၂၄ ခုနှစ်၌ (၁၀၂ ဒသမ ၈၃) ရာခိုင်နှုန်းဖြင့် ဆန်စပါးစားသုံးမှုကို ဖူလုံစေခဲ့ပြီး ၂၀၂၅ ခုနှစ်တွင် စိုက်ပျိုးထုတ်လုပ်မှုကို ပန်းတိုင်ရည်မှန်းချက်ထက် ပိုမိုတိုးမြှင့်စိုက်ပျိုးဆောင်ရွက်လျက်ရှိကြောင်း သိရသည်။