နိုင်ငံခြားငွေလဲနှုန်း မြင့်တက်နေမှုကြောင့် မော်ဒယ်မြင့်အိမ်စီးကားဈေးများလည်း မြင့်တက်နေပြီး အရောင်းအဝယ်တည်ငြိမ်နေကြောင်း ကားဝယ်ရောင်းလုပ်ကိုင်သူများထံမှ သိရသည်။
လက်ရှိတွင် ဝယ်ယူသူများအနေဖြင့် ဈေးနှုန်းတည်ငြိမ်သည်အထိ စောင့်ဆိုင်းနေပြီး လက်ရှိသြဂုတ်လ တတိယအပတ်တွင် လောင်စာဆီသုံးအိမ်စီးကားဈေးကွက်အတွင်း ကားဈေးနှုန်းအနည်းငယ်ပြန်လည် ကျဆင်းလာကြောင်း သိရသည်။
“ကားဈေးကွက်က ငြိမ်နေတယ်လို့ ပြောရမယ်။ ဘာလို့ဆို ဒေါ်လာဈေးကလည်း မတည်ငြိမ်ဘူး။ တတ်လိုက် ကျလိုက်နဲ့။ အဲဒီတော့ ကားဝယ်မယ့်သူတွေကလည်း စောင့်ကြည့်နေတဲ့ အနေအထားတစ်ခုမှာရှိနေတာ”ဟု ကားဝယ်ရောင်းလုပ်ကိုင်သူတစ်ဦးက ပြောသည်။
ပြီးခဲ့သည့် ဇွန်လတွင် ၂၀၁၂ အောက် မော်ဒယ်အိမ်စီးကားများသည် သိန်း ၅၀၀ မှ သိန်း ၄၀၀ ကြားပေါက်ဈေးရှိနေပြီး ကျပ်သိန်း ၄၀၀ အောက် အိမ်စီးကားများမရှိသလောက်နီးပါး ဈေးမြင့်တက်ခဲ့ပြီး လက်ရှိတွင် ကျပ်သိန်း ၄၀၀ အောက်အထိ ဈေးအနည်းငယ်ကျဆင်းလာသည့် အမျိုးအစားများရှိလာကြောင်း သိရသည်။
မော်တော်ယာဉ် ဝယ်ယူသူများအနေဖြင့် လောင်စာဆီယာဥ်များအစား EV ယာဉ်များကို စိတ်ဝင်စားမှု ရှိလာသော်လည်း လျှပ်စစ်မီးအခက်အခဲနှင့် Show Room များတွင်ဝယ်ယူ၍မရခြင်းကြောင့် အခက်အခဲရှိနေကြောင်းလည်း ကားဈေးကွက်အတွင်းမှ သိရသည်။
EV ယာဉ်များအား Pilot Project အနေဖြင့် တင်သွင်းခွင့် ပြုထားပြီး ယာဉ်အစီးရေ (၆၀၀) နီးပါးပြည်တွင်း၌ မှတ်ပုံတင်ထားကြောင်း သိရသည်။