ရတနာပုံ အမျိုးသမီး ဘောလုံးအသင်းသည် အသင်း၏ ကွင်းလယ်ပိုင်းအတွက် ဖိလစ်ပိုင်နိုင်ငံ ကလပ်အသင်း Stallion Laguna FC မှ အတွေ့အကြုံရင့် အလယ် တန်းကစားသမား Pauline San Buenav entura အား တရားဝင်ခေါ်ယူစာချုပ်ဆိုလိုက်ပြီ ဖြစ်ကြောင်းသိရသည်။
အသက် (၂၆) နှစ်အရွယ်ရှိ Paulineသည် ရတနာပုံအသင်းတွင် ကျောနံပါတ် (၂၉) ကို ဝတ်ဆင်ကစားမည်ဖြစ်ပြီး၊ ကွင်းအတွင်း နည်းစနစ်ပိုင်း ပိုင်နိုင်ကာ တည်ငြိမ်စွာ ကစားနိုင်စွမ်းရှိသည့် ကစားသမားတစ်ဦး ဖြစ်ကြောင်း အသင်းက အသိပေးထားသည်။
သူမသည် ဆယ်စုနှစ်တစ်ခုကျော်ကြာ ပြိုင်ပွဲအတွေ့အကြုံရှိသူဖြစ်ပြီး၊ Stallion Laguna FC အသင်းနှင့်အတူ အာရှအဆင့် အမြင့်ဆုံးကလပ်အသင်းပြိုင်ပွဲဖြစ်သော AFC Women’s Champions League (2025-2026) ပြိုင်ပွဲတွင် ဝင်ရောက်ယှဉ်ပြိုင်ခဲ့သူ ဖြစ်သည်။
ထိုပြိုင်ပွဲတွင် မြန်မာနိုင်ငံ၌ ကျင်းပခဲ့သည့် ခြေစစ်ပွဲစဉ်များ၊ ဗီယက်နမ်နိုင်ငံတွင် ကျင်းပခဲ့သည့် အုပ်စုအဆင့် ပွဲစဉ်များနှင့် ဂျပန်နိုင်ငံတွင် ကျင်းပခဲ့သည့် ကွာတားဖိုင်နယ် အဆင့်အထိ အဆင့်မြင့် ကလပ်အသင်းများကို ရင်ဆိုင်ကစားခဲ့သည့် အတွေ့အကြုံများရှိထားသူ ဖြစ်ကြောင်း သိရသည်။
Pauline ၏ ဖိလစ်ပိုင် ပြည်တွင်းပြိုင်ပွဲ အောင်မြင်မှုမှတ်တမ်းများအရ PFF Women’s Cup (2024) ၌ ချန်ပီယံဆုကို ဆွတ်ခူးနိုင်ခဲ့ပြီး၊ PFF Women’s League (2025) တွင်လည်း ဒုတိယဆုရရှိအောင် စွမ်းဆောင်ပေးနိုင်ခဲ့ကာ ပြည်တွင်းပြိုင်ပွဲများတွင် အောင်မြင်မှုမှတ်တိုင်များစွာ စိုက်ထူထားနိုင်ခဲ့သူ ဖြစ်သည်ဟုဆိုထားသည်။