ရခိုင်ပြည်နယ်အတွင်း ပြန်လည်ကာ တည်ငြိမ်အေးချမ်းလာပြီဖြစ်သည့်အတွက် ယာယီစစ်ရှောင်စခန်းများအား ပိတ်သိမ်းကာ ဒေသခံစစ်ရှောင်များကို ပြန်လည်နေရာချထားရေးလုပ်ငန်းများဆောင်ရွက်သွားမည်ဖြစ်ကြောင်း ရခိုင်ပြည်နယ်ဝန်ကြီးချုပ်က ပြောသည်။
ဒီဇင်ဘာ (၂၃) ရက် နံနက်ပိုင်းက ပြုလုပ်သည့် ပြည်တွင်းနေရပ်စွန့်ခွာသူများ ပြန်လည်နေရာချထားရေးနှင့် ယာယီခိုလှုံရာ စခန်းများ ပိတ်သိမ်းရေးဆိုင်ရာ ပြည်နယ်အဆင့်လုပ်ငန်းကော်မတီ အစည်းအဝေးတွင် ကော်မတီ ဥက္ကဋ္ဌ ပြည်နယ်ဝန်ကြီးချုပ်က ပြောကြားခဲ့ခြင်း ဖြစ်သည်။
” ရခိုင်ပြည်နယ်အတွင်း တည်ငြိမ်အေးချမ်းမှုများ ပြန် လည်ရရှိလာပြီဖြစ်တဲ့အတွက် ပြည်တွင်းမှ ခေတ္တနေရပ်စွန့် ခွာသူများ ပြန်လည်နေရာချထားရေးနဲ့ ယာယီခိုလှုံရာ စခန်းများကို ပိတ်သိမ်းရေးဆိုင်ရာ အမျိုးသားအဆင့် မဟာဗျူဟာပါ လုပ်ငန်းများကို အကောင်အထည်ဖော် ဆောင်ရွက်သွားရမှာ ဖြစ်ပါတယ်”ဟု ပြည်နယ်ဝန်ကြီးချုပ် ဒေါက်တာ အောင်ကျော်မင်းက ပြောသည်။
ထို့အပြင် လက်ရှိကာလတွင် ဒေသတည်ငြိမ် အေးချမ်းမှုများ ရရှိလာပြီဖြစ်သည့်အတွက် တိုက်ပွဲရှောင်ပြည်သူ များအား မူလနေရပ်သို့ ပြန်လည်ပို့ဆောင်နိုင်ရေးနှင့် ယာယီခိုလှုံရာ စခန်းများပိတ်သိမ်းရေးအတွက် ပြည်နယ်အဆင့်ကော်မတီ အသီးသီးတွင် တာဝန်ပေးအပ်ခြင်း ခံထားရသူများအနေဖြင့်လည်း နိုင်ငံတော်၏ မူဝါဒလမ်းညွှန်ချက်များအတိုင်း ဆောင်ရွက်ကြရန်လည်း ပြည်နယ်ဝန်ကြီး ချုပ်က မှာကြားခဲ့သည်။
နှစ်ဖက်တိုက်ပွဲများ ပြင်းထန်ခဲ့သည့် အချိန်ကာလအတွင်း နေရပ်စွန့်ခွာ ထွက်ပြေးလာသည့် စစ်ဘေးရှောင်ပြည်သူများ မိမိတို့၏ မူလနေရာများသို့ ပြန်လည်ပို့ဆောင်ပေးနိုင်ရေး ဆောင်ရွက်လျက်ရှိရာ လတ်တလောကာလအတွင်း မြေပုံမြို့နယ်၊ အမ်းမြို့နယ်နှင့် ကျောက်တော်မြို့နယ်များမှ ရပ်စွန့်ခွာခဲ့ကြသည့် ဒေသခံများအား ၎င်းတို့၏ မူလနေရပ်များသို့ ပြန် လည်ပို့ဆောင်ပေးခဲ့ပြီးဖြစ် ကြောင်း ပြည်နယ်ဝန်ကြီးချုပ်၏ ပြောကြားချက်အရ သိရသည်။
ယင်း ပြန်လည်ပို့ဆောင်ပေးခဲ့ရာတွင် မြေပုံမြို့နယ်တွင် အိမ်ထောင်စု (၇၉)စု၊ လူဦးရေ (၂၉၃)ဦးကို ပြန်လည်ပို့ ဆောင်ပေးခဲ့ပြီး ပြည်နယ်အစိုးရအဖွဲ့က အိမ်ထောင်စု (၁)စုလျင် ငွေကျပ်(၅)သိန်းနှုန်း ထောက်ပံ့ပေးအပ်ခဲ့ကြောင်း သိရသည်။
အမ်းမြို့နယ်တွင် လူဦးရေ (၅၃၂၀) ဦးကို (၆)ကြိမ် ခွဲကာ နေရပ်များသို့ ပြန်လည်အခြေချ နေထိုင်နိုင်ရေး ဆောင် ရွက်ခဲ့ပေးပြီး ရခိုင်ပြည်နယ် အစိုးရအဖွဲ့နှင့် အနောက်ပို င်းတိုင်း စစ်ဌာနချုပ်တို့ ပူးပေါင်းကာ ငွေကျပ် ၆၃၈ ဒ သမ ၇၈၄ သန်း ထောက်ပံ့ပေးခဲ့ပြီး ကျောက်တော်မြို့နယ်တွင်လည်း လူဦးရေ ၅၈၉ ဦးကို မူလနေရပ်များသို့ ပြန်လည်ပို့ဆောင် ပေးခဲ့ကြောင်း သိရသည်။
ပုံစာ-မစ္စတာ ဆာဆာကာဝါ မြန်မာနိုင်ငံ ခရီးစဉ်တွင် ရခိုင်ပြည်နယ်အတွင်းရှိ စစ်ဘေးရှောင်စခန်းများသို သွားရောက်လေ့လာခဲ့စဉ်။