ရခိုင်ပြည်နယ်ရှိ အမ်းမြို့နယ်၊ ဂွမြို့နယ်နှင့် သံတွဲမြို့နယ်တို့အတွင်း၌ လေအားလျှပ်စစ်စီမံကိန်းများဆောင်ရွက်ရန် လေအားလျှပ်စစ်စီမံကိန်းများဆိုင်ရာ သဘောတူညီမှုစာချွန်လွှာ(MOA) အား မတ် ၁ ရက်နံနက် ၁၀ နာရီက နေပြည်တော်တွင် လက်မှတ်ရေးထိုးခဲ့ကြသည်။
လျှပ်စစ်စွမ်းအားဝန်ကြီးဌာန၊လျှပ်စစ်စွမ်းအားစီမံရေးဦးစီးဌာနနှင့် Primus Advanced Technologies Limited၊ Asia Ecoenergy Development Limited ၊ Yunnan Machinery and Equipment Import and Export Co., Ltd. တို့ကြား MOA ရေးထိုးခဲ့ကြခြင်းဖြစ်သည်။
ယနေ့ လက်မှတ်ရေးထိုးသည့် သဘောတူညီမှုစာချွန်လွှာသည် အမ်း လေအားလျှပ်စစ်စီမံကိန်း ၁၅၀ မဂ္ဂါဝပ်၊ ဂွ လေအားလျှပ်စစ်စီမံကိန်း ၁၀၀ မဂ္ဂါဝပ်၊ သံတွဲ လေအားလျှပ်စစ်စီမံကိန်း ၁၁၀ မဂ္ဂါဝပ်တို့ကို အကောင်အထည်ဖော်သွားမည်ဟု ပြည်ထောင်စုဝန်ကြီးဦးသောင်းဟန်ကပြောကြားခဲ့သည်။
ထို့ပြင် စီမံကိန်း ၃ ခုလုံးအား ၂၀၂၅ ခုနှစ်အတွင်း လျှပ်စစ်ဓာတ်အားထုတ်လုပ်နိုင်အောင်ဆောင် ရွက်ရမည်ဖြစ်ပြီး ဂွစီမံကိန်း၏ ပထမအဆင့် ၅၀ မဂ္ဂါဝပ်အား ၂၀၂၃ ခုနှစ်၊ဒီဇင်ဘာလတွင် တည် ဆောက်ရေးလုပ်ငန်းများ စတင်နိုင်ရန် ကုမ္ပဏီများမှ အားသွန်ခွန်စိုက်ကြိုးပမ်းသွားရန်လည်း ပြည်ထောင်စုဝန်ကြီးက တိုက်တွန်းပြောကြားခဲ့သည်။
ထို့ပြင် မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး H.E Mr. Chen Hai ကလည်း ယခုစီမံကိန်းများသည် မြန်မာနိုင်ငံ၏ ပထမဆုံးတည်ဆောက်မည့် လေအားလျှပ်စစ်စီမံကိန်းများဖြစ်၍ တရုတ်-မြန်မာ လျှပ်စစ်ကဏ္ဍပူးပေါင်းဆောင်ရွက်မှု၏ ခြေလှမ်းသစ်စတင်ခြင်းဖြစ်ပြီး နှစ်နိုင်ငံအတွက် အထူးအကျိုးဖြစ်ထွန်းစေမည်ဟု ပြောကြားခဲ့သည်။
မြန်မာနိုင်ငံ၏ ပြည်တွင်းလျှပ်စစ်ဓာတ်အားဖူလုံမှုနှင့် ၂၀၃၀ ပြည့်နှစ်တွင် နိုင်ငံတော်ဓာတ်အားစနစ်မှ တစ်နိုင်ငံလုံးလျှပ်စစ်ဓာတ်အားရရှိနိုင်ရေး ရည်မှန်းချက်ပြည့်မီစေရန် လျှပ်စစ်ကဏ္ဍတွင် ဆောင်ရွက်နေသည့်စီမံကိန်းများ၌ တရုတ်နိုင်ငံမှ ကုမ္ပဏီများက ပူးပေါင်းပါဝင်လျက်ရှိသည်ဟု လည်းပြောသည်။
အခမ်းအနားသို့ လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်၊ ဒု-ဝန်ကြီး ဦးအေးကျော်နှင့်တာဝန်ရှိသူများ မြန်မာနိုင်ငံဆိုင်ရာ တရုတ်နိုင်ငံ သံအမတ်ကြီး H.E. Mr. Chen Hai တို့တက်ရောက်ခဲ့ကြသည်။
MOA လက်မှတ်ရေးထိုးခဲ့သည့် အမ်းမြို့နယ်၊ ဂွမြို့နယ်နှင့် သံတွဲမြို့နယ်အတွင်းရှိ လေအားလျှပ်စစ်စီမံကိန်းများသည် စုစုပေါင်း ၃၆၀ မဂ္ဂါဝပ်ထုတ်လုပ်ပေးနိုင်မည့် ဒေသအကျိုးပြုစီမံကိန်းဖြစ်သည်။
လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီးဦးသောင်းဟန်ရှေ့တွင် လျှပ်စစ်စွမ်းအားဝန်ကြီးဌာန၊လျှပ်စစ်စွမ်းအားစီမံရေးဦးစီးဌာန ညွှန်ကြားရေးမှူးချုပ်ဒေါ်မိမိခိုင်၊ Yunnan Machinery and Equipment Import and Export Co., Ltd. (YMEC) ၏ Vice President Mr. Dong Fan နှင့် Primus Advanced Technologies Limited (PRIMUS)၏ Managing Director ဦးကျော်လှဝင်းတို့က(MOA)ရေးထိုးခဲ့ကြခြင်းဖြစ်သည်။