ယွမ်ကိုကမ္ဘာ့အရံငွေကြေးဖြစ်လာစေရန် ရှီကျင့်ဖျင်တိုက်တွန်းနှိုးဆော်

တရုတ်သမ္မတ ရှီကျင့်ဖျင်သည် အမေရိကန်ဒေါ်လာ၏ လွှမ်းမိုးမှုကို စိန်ခေါ်ရန်အတွက် ယွမ်ငွေကို ဒုတိယမြောက် အဓိကကမ္ဘာ့အရံငွေကြေးအဖြစ် ဖော်ဆောင်လိုသော ၎င်း၏ရည်မှန်းချက်ကို အတိအလင်း ထုတ်ဖော်ပြောကြားခဲ့ပြီး ယွမ်ငွေတန်ဖိုး ဆက်လက်အားကောင်းနေ‌ရေးကို အဓိကအာရုံစိုက်လာခဲ့သည်။ ရှီကျင့်ဖျင်၏ “အားကောင်းလာမည့် ယွမ်ငွေ” အစီအစဉ်အရ ဒေါ်လာနှင့်လဲလှယ်ရာတွင် ယွမ်ငွေလဲလှယ်နှုန်းသည် ပြီးခဲ့သည့်နှစ်ကုန်ပိုင်းက ၁ ဒေါ်လာလျှင် ၇ ယွမ်အောက်သို့ ကျဆင်းသွားပြီးနောက် ဆက်လက်ကျဆင်းနေခဲ့သည်။ တရုတ်နိုင်ငံသည် တရုတ်ပြည်သူ့ဘဏ်မှ နေ့စဉ် ထုတ်ပြန်ပေးသော ရည်ညွှန်းငွေလဲလှယ်နှုန်း၏ အတက်အကျကို ၂ ရာခိုင်နှုန်းအထိ ခွင့်ပြုထားသည်။

ပြီးခဲ့သည့်လ ၃၁ ရက်နေ့က ကွန်မြူနစ်ပါတီ၏ သီအိုရီဂျာနယ်ဖြစ်သော ကျူရှီ ဂျာနယ်တွင် ဖော်ပြချက်တစ်ခု၌ ရှီက “နိုင်ငံတကာကုန်သွယ်မှု၊ ရင်းနှီးမြှုပ်နှံမှုနှင့် နိုင်ငံခြားငွေလဲလှယ်ရေးဈေးကွက်များတွင် ကျယ်ကျယ်ပြန့်ပြန့် အသုံးပြုနိုင်သော အရံငွေကြေးအဆင့်အတန်းကို ရရှိရန်အတွက် တရုတ်နိုင်ငံသည် အားကောင်းသော ငွေကြေးတစ်ခုကို တည်ထောင်ရမည်” ဟု ပြောကြားခဲ့ပါသည်။ ရှီ၏ ပြောကြားချက်သည် “အားကောင်းလာမည့် ယွမ်ငွေ” နှင့်ပတ်သက်၍ ယနေ့အထိ အရှင်းလင်းဆုံး လမ်းညွှန်ချက်ဖြစ်ကြောင်း ဖန်နစ်ရှယ်တိုင်းမ် က သုံးသပ်ခဲ့ပါသည်။ ရှီက ဆက်လက်၍ ယွမ်ငွေကို ကမ္ဘာ့အရံငွေကြေးအဖြစ် ကြီးထွားလာစေရန်အတွက် “ထိရောက်သော ငွေကြေးမူဝါဒကို အကောင်အထည်ဖော်နိုင်သော အားကောင်း ခိုင်မာသည့် ဗဟိုဘဏ်၊ နိုင်ငံတကာအဆင့် ၌ ယှဉ်ပြိုင်နိုင်စွမ်းရှိသော ဘဏ္ဍာရေးအဖွဲ့အစည်းများနှင့် ကမ္ဘာလုံးဆိုင်ရာ အရင်းအနှီးများကို ဆွဲဆောင်နိုင်ပြီး ဘဏ္ဍာရေးဈေးကွက်ကို လွှမ်းမိုးနိုင်သော နိုင်ငံတကာဘဏ္ဍာရေးဗဟိုဌာနတစ်ခု ရှိရန်လိုအပ်သည်” ဟု မှတ်ချက်ပြုပြောကြားခဲ့သည်။

ဤမှတ်ချက်သည် ၂၀၂၄ ခုနှစ်တွင် ပါတီအကြီးတန်းအရာရှိများကို ရှီပြောကြားခဲ့သော မိန့်ခွန်း၏ တစ်စိတ်တစ်ပိုင်းဖြစ်သော်လည်း ယခုမှသာ လူသိရှင်ကြား ထုတ်ပြန်ခဲ့ခြင်းဖြစ်သည်။

ရှီ၏ “အားကောင်းလာမည့် ယွမ်ငွေ” မဟာဗျူဟာသည် အမေရိကန်သမ္မတ ဒေါ်နယ်ထရမ့်ပ်ကြောင့် ဒေါ်လာဈေး ကျဆင်းလာမှုနှင့် ချိန်ညှိလိုက်ပါက ယွမ်ငွေတန်ဖိုးကို ပိုမိုမြင့်တက်စေဖွယ် ရှိပေသည်။ ထရမ့်ပ်သည် မကြာသေးမီက ဒေါ်လာဈေး ကျဆင်းခြင်းကို “အလွန်ကောင်းမွန်သည်” ဟု ချီးကျူးခဲ့ပြီး ကျဆင်းလာသည့် ငွေကြေးတန်ဖိုးကို လက်ခံကြောင်း အရိပ်အယောင်ပြခဲ့သည်။ ဒေါ်လာဈေး ကျဆင်းခြင်းသည် အမေရိကန် ပို့ကုန်လုပ်ငန်းရှင်များ၏ ယှဉ်ပြိုင်နိုင်စွမ်းကို မြှင့်တင်ပေးနိုင်ပြီး ထရမ့်ပ် ကာလရှည်ကြာ ဝေဖန်ခဲ့သော ကြီးမားသည့် ကုန်သွယ်ရေးလိုငွေပြမှုကို ဖြေရှင်းရန် အထောက်အကူဖြစ်စေနိုင်သည်။ နောက်ထပ် ဗဟိုဘဏ်ဥက္ကဋ္ဌ ဖြစ်လာနိုင်ခြေရှိသူ ကီဗင်ဝပ်ရှ် သည် လက်ရှိဥက္ကဋ္ဌ ဂျီရုမ်း ပေါင်းဝဲလ် ထက် ပိုမိုဖြေလျှော့သော ငွေကြေးမူဝါဒကို ကျင့်သုံးနိုင်သည်ဟူသော မျှော်လင့်ချက်များကလည်း ဒေါ်လာကို ဆက်လက်အားနည်း စေမည်ဟူသော ခန့်မှန်းချက်များကို ဖြစ်ပေါ်စေသည်။ တစ်ချိန်တည်းမှာပင် တရုတ်ပြည်သူ့ဘဏ် ဒုတိယဥက္ကဋ္ဌ ကျိုလန် က ပြီးခဲ့သည့်လ အစည်းအဝေးတစ်ခုတွင် “တရုတ်နိုင်ငံအနေဖြင့် ကုန်သွယ်ရေး အသာစီးရရန်အတွက် ယွမ်ငွေတန်ဖိုး ချခြင်းကို အသုံးပြုရန် ရည်ရွယ်ချက်မရှိပါ” ဟု ပြောကြားခဲ့သည်။

ရုရှား၊ အီရန်နှင့် အခြားနိုင်ငံများအပေါ် အမေရိက ဦးဆောင်သော ဘဏ္ဍာရေးဆိုင်ရာ ပိတ်ဆို့အရေးယူမှုများကြောင့် ကမ္ဘာလုံးဆိုင်ရာ ကုန်သွယ်မှု အခြေချမှုများတွင် ယွမ်ငွေ၏ ပါဝင်မှုမှာ လျင်မြန်စွာ မြင့်တက်လာခဲ့သည်။

သို့သော်လည်း ယွမ်ငွေအနေဖြင့် ကမ္ဘာ့အရံငွေကြေးဖြစ်လာရန် စိန်ခေါ်မှုကြီးများ ရှိနေသေးကြောင်း ကျွမ်းကျင်သူများက ထောက်ပြကြပေသည်။ တရုတ်အစိုးရ၏ ငွေလဲလှယ်နှုန်းအပေါ် ထိန်းချုပ်မှုနှင့် အရင်းအနှီးဈေးကွက်များတွင် လွတ်လပ်မှုမရှိခြင်းစသည့် ကန့်သတ်ချက်များသည် ယွမ်ငွေ၏ အဆင့်အတန်းကို ဆက်လက်ဖိနှိပ်ထားဆဲဖြစ်သည်။ အမေရိကန်ဒေါ်လာ၏ လွှမ်းမိုးမှု အားနည်းသွားလျှင်ပင် ယွမ်ငွေမဟုတ်ဘဲ ယူရိုငွေကသာ ထိုနေရာကို အစားထိုးနိုင်ဖွယ်ရှိကြောင်း လေ့လာဆန်းစစ်သူအများစုက ငြင်းဆိုကြသည်။ အပြည်ပြည်ဆိုင်ရာ ငွေကြေးရန်ပုံငွေအဖွဲ့ ၏ အဆိုအရ ဗဟိုဘဏ်များ၏ နိုင်ငံခြားငွေ သီးသန့်အရံငွေများတွင် ဒေါ်လာ၏ ပါဝင်မှုမှာ ၂၀၀၁ ခုနှစ်တွင် ၅၉.၄ ရာခိုင်နှုန်းရှိရာမှ ပြီးခဲ့သည့်နှစ် တတိယသုံးလပတ်တွင် ၅၆.၉ ရာခိုင်နှုန်းအထိ ကျဆင်းသွားခဲ့ပြီး ယူရို၏ ပါဝင်မှုမှာ ၁၉.၃ ရာခိုင်နှုန်းမှ ၂၀.၃ ရာခိုင်နှုန်းသို့ မြင့်တက်လာခဲ့သည်။ ဆန့်ကျင်ဘက်အနေဖြင့် ယွမ်ငွေ၏ ပါဝင်မှုမှာ ၂.၉ ရာခိုင်နှုန်းမှ ၁.၉ ရာခိုင်နှုန်းသို့ ကျဆင်းသွားခဲ့ပေသည်။

Ref: သယ်ချိုဆန်းဒေးလီး