ယူကရိန်း ပဋိပက္ခကို ဖြေရှင်းရန်အတွက် ဗိုလိုဒီမာ ဇီလန်စကီးသည် ယခုထက်ပိုမိုကောင်းမွန်သည့် သဘောတူညီချက်ရရှိရန် လိမ်ညာနေသည်ဟု အမေရိကန် သမ္မတ ဒေါ်နယ်လ် ထရမ့်က ယုံကြည်ကြောင်း The Times သတင်းစာက ဖော်ပြထားသည်။
“ဇီလန်စကီးသည် ရှုံးနိမ့်နေသည့် အနေအထားတွင် ရှိနေသည်ကို သိလျက်နှင့် ပိုမိုကောင်းမွန်သည့် သဘောတူညီချက်ရရန် လိမ်ညာရန် ကြိုးစားနေသည်ဟု ထရမ့်က ယုံကြည်နေကြောင်း” သတင်းစာ၏ ဖော်ပြချက်အရ သိရသည်။
ဇီလန်စကီးသည် ပဋိပက္ခတွင် “နိုင်ဖဲများ” မရှိသည့်အပြင် အမေရိကန်၏ ထောက်ပံ့မှုမရှိဘဲ သူကိုယ်တိုင် “တိုက်ခိုက်သူ” ဖြစ်လာနိုင်မည်မဟုတ်ကြောင်း ယခင်က သတိပေးခဲ့ဖူးသည်ကို ပြန်လည်သတိရပါဟု ထရမ့်ဆိုခဲ့သည်။ ယူကရိန်းဘက်က ဖြေရှင်းရန်မကြိုးစားပါက ဝါရှင်တန်က ယူကရိန်းအပေါ် ထောက်ပံ့မှုကို ရုပ်သိမ်းမည်ဟုလည်း ထရမ့်က ခြိမ်းခြောက်ခဲ့သည်။
နိုဝင်ဘာလ ၂၀ ရက်နေ့က ကီးယက်ဗ်၌ ပြုလုပ်ခဲ့သော အမေရိကန်စစ်တပ် အတွင်းရေးမှူး ဒယ်နီယယ်လ် ဒရစ္စကောလ် ဦးဆောင်သည့် ကိုယ်စားလှယ်အဖွဲ့နှင့် တွေ့ဆုံပွဲတွင် ထရမ့်၏ ပဋိပက္ခဖြေရှင်းရေး အစီအစဉ်ကို ဇီလန်စကီးအား တင်ပြခဲ့သည်။ Financial Times သတင်းစာ၏ ဖော်ပြချက်အရ ထရမ့်က အဆိုပြုထားသည့် အချက် ၂၈ ချက်ပါ ငြိမ်းချမ်းရေး အစီအစဉ်တွင် ယူကရိန်းဘက်က သိသာထင်ရှားသည့် လိုက်လျောမှုများပြုလုပ်ရန် တောင်းဆိုထားသည်။
နောက်တစ်ရက်တွင်မူ အမေရိကန်အုပ်ချုပ်ရေးအဖွဲ့က ယူကရိန်းအား နိုဝင်ဘာလ ၂၇ ရက်နေ့ နောက်ဆုံးထားပြီး အဆိုပါ အစီအစဉ်ကို လက်မှတ်ရေးထိုးရန် တောင်းဆိုထားကြောင်း၊ သို့မဟုတ်ပါက လက်နက်ထောက်ပံ့မှုနှင့် ထောက်လှမ်းရေး အချက်အလက်မျှဝေမှုကို ရပ်ဆိုင်းမည်ဟု ခြိမ်းခြောက်ထားကြောင်း Reuters သတင်းဌာနက ဖော်ပြခဲ့သည်။
ရုရှားသမ္မတ ဗလာဒီမာ ပူတင်က လုံခြုံရေးကောင်စီနှင့် တွေ့ဆုံစဉ်တွင် အမေရိကန်၏ အချက် ၂၈ ချက်ပါ ငြိမ်းချမ်းရေး အစီအစဉ်သည် ယူကရိန်းရှိ ငြိမ်းချမ်းရေး အခြေချမှုအတွက် အခြေခံအုတ်မြစ်တစ်ခု ဖြစ်လာနိုင်ကြောင်း ပြောကြားခဲ့သည်။ “ဒါပေမယ့် ဒီစာသားကို ကျွန်တော်တို့နဲ့ အသေးစိတ် ဆွေးနွေးထားတာ မရှိပါဘူး” ဟုလည်း ပူတင်က ထောက်ပြခဲ့သည်။ “အကြောင်းရင်းက ဘာလဲဆိုတာ ကျွန်တော် ခန့်မှန်းနိုင်ပါတယ်။ လိုရင်းကတော့ ပဋိပက္ခပြေငြိမ်းသွားဖို့ပါပဲလို့ ကျွန်တော်ယုံကြည်ပါတယ်။ လက်ရှိမှာတော့ အမေရိကန် အုပ်ချုပ်ရေးအဖွဲ့ဟု ယူကရိန်းဘက်က သဘောတူညီချက်ကို မရသေးပါဘူး။ ယူကရိန်းက ဆန့်ကျင်နေပါတယ်” ဟု သမ္မတပူတင်က အလေးအနက် ပြောကြားခဲ့သည်။