မြန်မာနိုင်ငံရှိ ဒေသအချို့တွင်ဖြစ်ပေါ်နေသည့် အကြမ်းဖက်မှုဖြစ်စဉ်များကြောင့် ယာယီနေရပ်စွန့်ခွာနေရသူတစ်ဦးလျှင် တစ်လငွေကျပ်(၂ဝဝဝဝ)နှုန်းဖြင့် ၂ဝ၂၅ ခုနှစ်၊ ဇန်နဝါရီလမှ ဒီဇင်ဘာလအထိ လစဉ်ထောက်ပံ့ပေးသွားမည်ဖြစ်ကြောင်း နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်၏ပြောကြားချက်အရ သိရသည်။
၎င်းမှ ဖေဖော်ဝါရီ ၁၁ ရက်နံနက်ပိုင်းက ပြည်ထောင်စုအဆင့် MSME ထုတ်ကုန်ပြပွဲနှင့်ပြိုင်ပွဲဖွင့်ပွဲသို့တက်ရောက်လာသည့် တိုင်းနှင့်ပြည်နယ်အသီးသီးမှ ဝန်ကြီးချုပ်များအားတွေ့ဆုံစဉ် ပြောကြားခဲ့ခြင်းဖြစ်သည်။
” နိုင်ငံတော်အနေနဲ့ အကြမ်းဖက်ဖြစ်စဉ်တွေကြောင့် ယာယီနေရပ်စွန့်ခွာနေရတဲ့ပြည်သူတွေအတွက် ထောက်ပံ့ငွေပေးရာမှာ တစ်ယောက်ကို တစ်လငွေကျပ်(၂ဝဝဝဝ)နှုန်းနဲ့ ၂ဝ၂၅ ခုနှစ် ဇန်နဝါရီလကနေ ဒီဇင်ဘာလအထိ လစဉ်ထောက်ပံ့ပေးသွားမှာပါ” ဟု နစက ဥက္ကဋ္ဌက ပြောသည်။
ထို့ကြောင့် နေပြည်တော်အပါအဝင် တိုင်းနှင့်ပြည်နယ်အစိုးရအဖွဲ့များ၏ သဘာဝဘေးစီမံခန့်ခွဲမှုရန်ပုံငွေစာရင်းအမှတ်များသို့ လွှဲအပ်ပေးသွားမည်ဖြစ်၍ ထောက်ပံ့ငွေများပေးအပ်ရာတွင် သက်ဆိုင်ရာနယ်မြေများအလိုက် ယာယီနေရပ်စွန့်ခွာနေရသူများအားလုံးပါဝင်မှုရှိစေရေး၊ စာရင်းတွင်မပါဝင်ဘဲကျန်နေခဲ့ရသူများမရှိစေရေး၊ စနစ်တကျထိထိရောက်ရောက်ထောက်ပံ့ပေးအပ်နိုင်ရေးတို့အတွက် ဝိုင်းဝန်းဆောင်ရွက်သွားကြရမည်ဟု မှာကြားသည်။
ထို့ပြင် ယခုကောက်ယူရရှိထားသည့် စာရင်းတွင်မပါဝင်ဘဲ ထပ်မံကောက်ယူရရှိလာမည့် ယာယီနေရပ်စွန့်ခွာနေရသူများ၏ စာရင်းကိုလည်း စိစစ်ကောက်ယူ၍ ထပ်မံတင်ပြတောင်းခံသွားရန်နှင့် စနစ်တကျစိစစ်ထောက်ပံ့ပေးသွားရန်လိုသည်ဟုလည်း မှာကြားခဲ့သည်။
ထို့နောက် နစက ဥက္ကဋ္ဌမှ အကြမ်းဖက်ဖြစ်စဉ်များကြောင့် ယာယီနေရပ်စွန့်ခွာနေရသူများအတွက် ထောက်ပံ့ငွေများကို နေပြည်တော်အပါအဝင် တိုင်းနှင့်ပြည်နယ်ဝန်ကြီးချုပ်များထံပေး အပ်ခဲ့ကြောင်း သိရသည်။