ယနေ့ ဇန်နဝါရီ(၈)ရက်၊ ညနေ (၆)နာရီအချိန်၌ ရှမ်းယူနိုက်တက်နှင့် မလေးရှားနိုင်ငံ တီရန်ဂါနူးအသင်းတို့ယှဉ်ပြိုင်ကစားမည့် AFF Shopee Cup ပွဲစဉ်အား ကွင်းအတွင်းလာရောက်ကြည့်ရှုမည့် ပရိတ်သတ်တိုင်းအတွက် လက်မှတ်စီစဉ်ပေးမည်ဟု ရှမ်းယူနိုက်တက်အသင်း အသိပေးထားသည်။
အဆိုပါ AFF Shopee Cup ပြိုင်ပွဲကို ရှမ်းယူနိုက်တက်အသင်းအနေဖြင့် Myanmar National League ချန်ပီယံအဖြစ် ဝင်ရောက် ကစားခွင့်ရခြင်းဖြစ်ပြီး တီရန်ဂါနူး အသင်းအနေဖြင့် Malaysia Cup-2023 ဒုတိယဆုရ အသင်းဖြစ်သည့်အတွက် ဝင်ရောက်ကစားခွင့်ရရှိခြင်းဖြစ်သည်။
ယနေ့ ယှဉ်ပြိုင်ကစားမည့် အသင်း(၂) သင်းသည် AFF Shopee Cup ပွဲစဉ်အတွင်း ရှမ်းယူနိုက်တက်အသင်းအနေဖြင့် သန်ဟွာအသင်းကို (၃)ဂိုး(၁)ဂိုးဖြင့် ရှုံးနိမ့်ထားသလို PSM အသင်းကို (၄)ဂိုး(၃)ဂိုးဖြင့် ရှုံးနိမ့်ထားပြီး နှစ်ပွဲကစား(၂)ပွဲရှုံး ရလဒ်ထွက်ပေါ်ထားသည်။
အလားတူ တီရန်ဂါနူးအသင်း အနေဖြင့်လည်း ဆဗေးရန်းအသင်းကို (၃)ဂိုး(၂)ဂိုးဖြင့် ရှုံးနိမ့်ထားပြီး သန်ဟွာအသင်းကို (၂)ဂိုးစီဖြင့် သရေရလဒ်ထွက်ပေါ်ထားကြောင်း သိရသည်။
ရှမ်းယူနိုက်တက်နှင့် တီရန်ဂါနူးပွဲစဉ်ကို Sky Net Sport X ရုပ်သံလိုင်းမှတဆင့် တိုက်ရိုက်ထုတ်လွှင့် ပြသမည်ဖြစ်ကြောင်း သိရသည်။