ကရင်ပြည်နယ်၊ မြဝတီမြို့နယ်ရှိ ရွှေကုက္ကိုလ်နယ်မြေအား နိုဝင်ဘာ ၁၈ ရက်မှစတင်၍ရှင်းလင်းမှုများပြုလုပ်ခဲ့ရာ ယနေ့ နိုဝင်ဘာ ၂၂ ရက်တွင်လည်း အွန်လိုင်းလိမ်လည်မှုနှင့် လောင်းကစားမှုများကျူးလွန်ပြီး ထွက်ပြေးတိမ်းရှောင်ပုန်းအောင်းနေထိုင်လျက်ရှိသည့် ပြည်ပနိုင်ငံသား (၂၂၃) ဦးကို ထိန်းသိမ်းနိုင်ခဲ့ကြောင်း သိရသည်။
တရုတ်နိုင်ငံသား (၁၀၀) ဦး၊ ဗီယက်နမ်နိုင်ငံသား (၁၄) ဦး၊ မလေးရှားနိုင်ငံသား (၆) ဦး၊ အီသီရိုးပီးယားနိုင်ငံသား (၁၅) ဦး၊ နမီးဘီးယားနိုင်ငံသား (၂) ဦး၊ အင်ဒိုနီးရှားနိုင်ငံသား (၁၃) ဦး၊ ယူဂန်ဒါနိုင်ငံသား (၁၁) ဦး၊ အိန္ဒိယနိုင်ငံသား (၁၁) ဦး၊ ဇင်ဘာဘွေနိုင်ငံသား (၁) ဦး၊ ဖိလစ်ပိုင်နိုင်ငံသား (၇) ဦး၊ ပါကစ်စတန်နိုင်ငံသား (၆) ဦး၊ ရဝမ်ဒါနိုင်ငံသား (၃) ဦး၊ ကင်ညာနိုင်ငံသား (၂၄) ဦး၊ နိုင်ဂျီးဒီးယားနိုင်ငံသား (၄) ဦး၊ နီပေါနိုင်ငံသား (၁) ဦး၊ ကိုးရီးယားနိုင်ငံသား (၁) ဦး၊ အီဂျစ်နိုင်ငံသား (၁) ဦး၊ မာဒါတက်စတာနိုင်ငံသား (၁) ဦး၊ တရုတ်(တိုင်ပေ) ၂ ဦးတို့ကိုထိန်းသိမ်းနိုင်ခဲ့ကြောင်း သိရသည်။
ထို့ကြောင့် နိုဝင်ဘာ ၁၈ ရက်မှ ယနေ့ နိုဝင်ဘာ ၂၂ ရက်အထိ ရွှေကုက္ကိုလ်နယ်မြေအတွင်းမှ ပြည်ပနိုင်ငံသား (၁,၅၉၀) ဦးကို ကွန်ပျူတာ (၂,၈၉၃) လုံး၊ မိုဘိုင်းဖုန်း (၂၁,၇၅၀) လုံး၊ star Link ဘန်း (၁၀၁) လုံး၊ Router (၂၁) လုံးနှင့် လုပ်ငန်းသုံးပစ္စည်းအများအပြားနှင့်အတူ သိမ်းဆည်းထိန်းသိမ်းနိုင်ခဲ့ကြောင်း သိရသည်။
ထိန်းသိမ်းနိုင်ခဲ့သည့် ပြည်ပနိုင်ငံသားများကို သက် ဆိုင်ရာနိုင်ငံများသို့ ပြန်လည်လွှဲပြောင်းပေးနိုင်ရေးအတွက်ဆောင်ရွက်လျက်ရှိပြီး မြဝတီမြို့နယ်၊ ပူလွဲပူ ကျေးရွာအုပ်စု၊ ရွှေကုက္ကိုလ်မြိုင်ကျေးရွာ၊ လုံထင်းဝန်းရှိ အဆောက်အအုံ၌ ထိန်းသိမ်းထားကြောင်း သိရသည်။
၂၀၂၅ ခုနှစ်၊ ဇန်နဝါရီ ၃၀ ရက်မှ နိုဝင်ဘာ ၂၂ ရက်အထိ မြန်မာနိုင်ငံအတွင်းသို့ တရားမဝင်ဝင်ရောက်လာသည့် ပြည်ပနိုင်ငံသား (၁၂,၄၆၈) ဦးကိုထိန်းသိမ်းနိုင်ခဲ့ကာ (၁၁,၈၉၃) ဦးကိုစစ်ဆေးခဲ့ပြီး (၉,၉၇၈) ဦးကိုထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ် ထုံးလုပ်နည်းများနှင့်အညီ စနစ်တကျပြည်နှင်လွှဲပြောင်းပေးခဲ့ပြီးဖြစ်ကာ ကျန်ရှိသည့် ပြည်ပနိုင်ငံသား (၂,၄၉၀) ဦးကိုလည်း သက်ဆိုင်ရာနိုင်ငံများသို့လွှဲပြောင်းပေးရန် အသင့်ဖြစ်နေပြီဖြစ်၍ ကောင်းမွန်စွာထိန်းသိမ်းစောင့်ရှောက်ထားကြောင်း သိရသည်။