ယနေ့ မတ်လ(၂၉)ရက်တွင် One Championship က ကြီးမှူးကျင်းပသည့် One Friday Fight – 57 ပွဲ၌ ဒုခေါင်တွဲဆိုင်းအဖြစ် ထိုးသ-တ်မည့် မြန်မာဖိုက်တာ သန့်ဇင်မှာ အူအတက်ပေါက်သည့်အတွက် ပါဝင်ယှဉ်ပြိုင်နိုင်တော့မည်မဟုတ်ဘဲ အခြားတွဲဆိုင်းတစ်ခုအား အစားထိုးသွားမည် ဖြစ်ကြောင်း သိရသည်။
One ၏ ထုတ်ပြန်ချက်အရ သန့်ဇင်နှင့် မွေထိုင်းဖိုက်တာ Tai Sor Jo ၏ ပွဲစဉ်အစား ထိုင်းနိုင်ငံသားမွေထိုင်းဖိုက်တာ Humpangna နှင့် ဥဇဘတ်ကစ္စတန် နိုင်ငံသား Shakhriyor Jurayev တို့ ယှဉ်ပြိုင်ထိုးသ-တ်သွားမည်ဖြစ်သည်။
ယခင် တွဲဆိုင်း (၁၂)ဆိုင်းသတ်မှတ်ထားရာမှ ယခုတွင် တွဲဆိုင်း (၁၁)ဆိုင်းသာ ယှဉ်ပြိုင်ထိုးသ-တ်သွားမည်ဖြစ်သည်။
ယနေ့ ပြုလုပ်မည်ပွဲစဉ်တွင် ကနဦး ရိုးရာလက်ဝှေ့ဖိုက်တာများဖြစ်သည့် စိုးလင်းဦး၊ သန့်ဇင်နှင့် မိုးထက်အောင်တို့ပါဝင်မည်ဖြစ်သော်လည်း သန့်ဇင်မှာ ပွဲပျက်ခဲ့ရသည့်အတွက် စိုးလင်းဦးနှင့် မိုးထက်အောင်တို့ ပွဲသာ ကျန်ရှိတော့မည်ဖြစ်သည်။
မြန်မာ့ရိုးရာလက်ဝှေ့ ထိပ်တန်း ဖိုက်တာ သံမဏိ စိုးလင်းဦး အနေဖြင့် ပေါ်တူဂီ ဖိုက်တာ Fabio ဖြင့် ယှဉ်ပြိုင်ထိုးသ-တ်ရမည်ဖြစ်ကာ၎င်း၏ ပြိုင်ဘက် ဖိုက်တာ Fabio မှာ ထိုင်းဖိုက်၏ နာမည်ကြီးကစားသမားများနှင့် ယှဉ်ပြိုင်ထိုးသ-တ်ဖူးသူတစ်ဦးဖြစ်ပြီး တိုက်စစ်ဖွင့်ကစား သူတစ်ဦးဖြစ်သည်။
အလားတူ မိုးထက်အောင်အနေဖြင့်လည်း ပွဲစဉ်၏ ပထမဦးဆုံးပွဲအနေဖြင့် ဂျပန်နိုင်ငံသားဖိုက်တာ Tomoya Maruyama ဖြင့် ယှဉ်ပြိုင်ကစားသွားရမည်ဖြစ်ပြီး ပြိုင်ဘက်ဖြစ်သူမှာ ကစ်ဘောက်ဆာ လက်သီးချက်များနှင့် အမြင့်ကန်ချက်များအားကောင်းသူတစ်ဦးဖြစ်ကြောင်း သိရသည်။
One Friday Fight – 57 ပွဲစဉ်များကို ယနေ့ မတ်လ (၂၉) ရက် ည(၇)နာရီခွဲအချိန်၌ ပြုလုပ်သွားမည်ဖြစ်ပြီး၊ One Championship Facebook Page မှ တိုက်ရိုက် Live ထုတ်လွှင့်ပြသသွားမည်ဖြစ်သည်။
ဓာတ်ပုံ-One Championship