ယနေ့ ဧပြီလ (၆) ရက်တွင် ကျင်းပမည့် တတိယအကြိမ် ပြည်ထောင်စုလွှတ်တော် ပထမပုံမှန်အစည်းအဝေး တတိယနေ့တွင် နိုင်ငံတော် သမ္မတက အဆိုပြုသည့် ပြည်ထောင်စုအစိုးရအဖွဲ့၏ ဝန်ကြီးဌာနအရေအတွက်နှင့် ဝန်ကြီးများ၏ စာရင်းကို လွှတ်တော်သို့ တင်ပြသွားရန်ရှိနေသည်။
ထို့ပြင် ပြည်ထောင်စုရွေးကောက်ပွဲကော်မရှင် အဖွဲ့ဝင်ဦးရေ၊ ဥက္ကဋ္ဌနှင့် အဖွဲ့ဝင်များ၏ အမည်စာရင်း၊ နိုင်ငံတော်ဖွဲ့ စည်းပုံအခြေခံဥပဒေဆိုင်ရာခုံရုံး ဥက္ကဋ္ဌ၊ အဖွဲ့ဝင်များ၏ အမည်စာရင်း၊ ပြည်ထောင်စုရှေ့နေချုပ်အဖြစ်ခန့်အပ်တာဝန်ပေးသင့်သည့် ပုဂ္ဂိုလ်၏ အမည်စာရင်း၊ ပြည်ထောင်စုစာရင်းစစ်ချုပ်အဖြစ် ခန့်အပ်တာဝန်ပေးသင့်သည့် ပုဂ္ဂိုလ်၏ အမည်စာရင်းတို့ကိုလည်း လွှတ်တော်သို့တင်ပြသွားမည်ဖြစ်ကြောင်း သိရသည်။
အလားတူ ပြည်ထောင်စုတရားလွှတ်တော်ချုပ် တရားသူကြီးများ ဦးရေသတ်မှတ်နိုင်ရေးနှင့် ပြည်ထောင်စုတရားသူကြီးချုပ်အဖြစ် ခန့်အပ်တာဝန်ပေးသင့်သည့် ပုဂ္ဂိုလ်၏ အမည်စာရင်းတို့ကိုလည်း လွှတ်တော်သို့ တင်ပြမည်ဖြစ်ကြောင်း သိရသည်။
ယင်းကဲ့သို့ တင်ပြပြီးနောက် ပြည်ထောင်စုလွှတ်တော် ကိုယ်စားလှယ်များအနက်မှ ကန့်ကွက်လိုသည့် လွှတ်တော်ကိုယ်စားလှယ်ရှိပါက အမည်စာရင်း တင်သွင်းနိုင်ကြောင်း ပြည်ထောင်စုလွှတ်တော်နာယကက ကြေညာမည်ဖြစ်သည်။
အကယ်၍ ကန့်ကွက်သူရှိပါက အစည်းဝေးနောက်ရက်တွင် ကန့်ကွက်ဆွေးနွေးနိုင်မည်ဖြစ်ကာ လွှတ်တော်၏ အဆုံးအဖြတ်ရယူသွားရမည်ဖြစ်သည်။
ယနေ့ ပြည်ထောင်စုလွှတ်တော် အစည်းအဝေးကို အစီအစဉ် (၁၉) ရပ်ဖြင့် ကျင်းပရန်လျာထားကြောင်းလည်း လွှတ်တော်သတင်းရင်းမြစ်များထံမှ သိရသည်။