ပြီးဆုံးခဲ့ပြီဖြစ်သည့်၂၀၂၄ ဖူဆယ်ဘောလုံးရာသီအပြီးတွင် ချန်ပီဆုဖလားကို MIU FC အသင်းက စုစုပေါင်း ရမှတ် (၅၂)မှတ် ဖြင့် ရှုံးပွဲမရှိ ဆွတ်ခူးရရှိခဲ့သည်။
ယမန်နေ့ မတ်လ (၁၆) ရက်တွင် MFF Vita Max Futsal League (I) 2024- 2025 နောက်ဆုံးပွဲစဉ်များ ယှဉ်ပြိုင်အပြီး၊ ဆုပေးပွဲ အခမ်းအနားကို တဆက်တည်းကျင်းပခဲ့ကြသည်။
ဆုပေးပွဲ အခမ်းအနားတွင် MFF Vita Max Futsal League (I) 2024- 2025 ပြိုင်ပွဲ နောက်ဆုံးပွဲစဉ်တွင် တာဝန်ယူကိုင်တွယ်ခဲ့သော ဒိုင်လူကြီးများကို ပေးအပ်သော အမှတ်တရ ဆုတံဆိပ်များနှင့် ပြိုင်ပွဲတွင် အသန့်ရှင်းဆုံး အသင်းဆု ရရှိသော Generations FC အသင်းကို ပေးအပ်သော အမှတ်တရဆုနှင့် ဆုကြေးငွေကျပ် (၅)သိန်းကို မြန်မာနိုင်ငံဘောလုံးအဖွဲ့ချုပ် ဖူဆယ်နှင့် သဲသောင်ပြင် ကော်မတီ ဒုတိယ ဥက္ကဋ္ဌ ဦးနိုင်သောင်းထိုက်က ချီးမြှင့်ခဲ့သည်။
ထို့နောက် ပြိုင်ပွဲ၏ အကောင်းဆုံး ဂိုးသမားဆု ရရှိခဲ့သော MIU FC အသင်းမှ မိုင်စိုးမြတ်ထွေးနှင့် ပြိုင်ပွဲ၏ အကောင်းဆုံး ကစားသမား ဆု ရရှိသော MH Dream Team FC အသင်းမှ ငြိမ်းမင်းစိုး တို့ကို ပေးအပ်ချီးမြှင့်သည့် အမှတ်တရဆုနှင့် ဆုကြေးငွေကျပ် (၅) သိန်းစီကို မြန်မာ့လက်ရွေးစင် ဖူဆယ် အသင်းနည်းပြချုပ် Mr. Pattaya ပေးအပ်ခဲ့သည်။
ထို့နောက် ပြိုင်ပွဲ၏ စတုတ္ထဆု ရရှိသော VUC FC အသင်းကို ဖူဆယ်နှင့် သဲသောင်ပြင် လိဂ်ကော်မတီ ဥက္ကဋ္ဌ ဦးကြည်မင်းသိန်း က ဆုကြေးငွေ ကျပ် သိန်း (၃၀)ကို ပေးအပ်ခဲ့ပြီး ပြိုင်ပွဲ၏ တတိယဆု ရရှိသော YRG FCအသင်းကို Cen tury Beverage Co,Ltd မှ မန်နေးဂျင်း ဒါရိုက်တာ ဦးစိုင်းဝင်းအောင် က တစ်ဦးချင်း ဆုတံဆိပ်များနှင့် ဆုကြေးငွေကျပ် သိန်း (၅၀) ကို ပေးအပ်ခဲ့သည်။
ဒုတိယဆု ရရှိသော MH Dream Team အသင်းကို ဖူဆယ်နှင့် သဲသောင်ပြင် ကော်မတီ ဥက္ကဋ္ဌ ဦးဝင်းသော် က တစ်ဦးချင်း ဆုတံဆိပ်များနှင့် ဆုကြေးငွေကျပ် သိန်း (၁၀၀) ကိုပေးအပ်ခဲ့သည်။
ဆက်လက်၍ ပထမဆု ရရှိခဲ့သော MIU FC အသင်းကို ရန်ကုန်တိုင်း ဒေသကြီးအစိုးရအဖွဲ့ လူမှုရေးရာဝန်ကြီး ဦးဌေးအောင် က တစ်ဦးချင်းဆုများနှင့် ဆုကြေးငွေ ကျပ် သိန်း (၁၅၀) ကို ချီးမြှင့်ပေးအပ်ခဲ့သည်။
ထို့နောက် ချန်ပီယံ ဆုဖလားအား ရရှိခဲ့သော MIU FC အသင်းကို အာရှဘောလုံးအဖွဲ့ချုပ် အကြီးတန်းဒုတိယ ဥက္ကဋ္ဌနှင့် မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်က ချန်ပီယံဆုဖလား ပေးအပ်ခဲ့သည်။