မွန်ပြည်နယ်အတွင်း လေပြင်းတိုက်ခတ်ကာ မိုး သည်းထန်စွာရွာသွန်း၍ နေအိမ်များပျက်စီးကာ သစ်ပင်လဲကျမှုများဖြစ်ပေါ်ခဲ့
မွန်ပြည်နယ်အတွင်း၌ မေ ၂၀ ရက်(ယနေ့)နံနက်ပိုင်းမှစတင်ကာ လေပြင်းတိုက်ခတ်ပြီးမိုးသည်း ထန်စွာရွာသွန်းမှုကြောင့် နေအိမ်များပျက်စီးကာ သစ်ပင်လဲကျမှုများ၊လျှပ်စစ်ဓာတ်တိုင်လဲကျမှုများဖြစ်ပေါ်ခဲ့သည်ဟု ဒေသခံများထံမှ သိရသည်။
မုဒုံမြို့နယ်၊ကမာဝက်မြို့၊ဝဲကလိကျေးရွာတွင် နံနက် ၈ နာရီခွဲခန့်မှစတင်၍ လေပြင်းတိုက်ခတ်ကာ မိုးသည်းထန်စွာရွာသွန်းခဲ့သဖြင့် နေအိမ် ၁၃ လုံးအမိုးလန်ခြင်း၊အကာများပျက်စီးခြင်းနှင့်ယိုင်နဲ့သွားခြင်းများဖြစ်ပေါ်ပေါ်ခဲ့သည်။
“အားလုံးပေါင်း ၁၃ လုံးပေါ့ အဲဒီထဲကမှ ၁၁ လုံးက အမိုးအကာတွေလန်တယ် ၂ လုံးကတော့လုံးဝကိုပျက်စီးသွားတာ အမိုးတွေလွင့်ထွက်သွားတဲ့အိမ်တွေဆိုရင် သွပ်မိုးတွေလည်းပါတော့ အန္တ ရာယ်မရှိအောင် လေတိုက်တာလျော့သွားတဲ့အချိန်ကြမှပြန်လုပ်ရတယ် လေကအတော်ပြင်းတယ် သစ်ပင်တွေကော ဓာတ်တိုင်တွေကောလဲကျသွားတာ”ဟုမုဒုံမြို့အခြေစိုက်လူမှုကူညီရေးအသင်း ဝင်တစ်ဦးကပြောသည်။
ပျက်စီးမှုများဖြစ်ပေါ်ခဲ့သည့် နေအိမ်များအား လူ မှုကူညီရေးအသင်းများနှင့်ကျေးရွာတာဝန်ရှိသူ များက ပြန်လည်ပြုပြင်မှုများပြုလုပ်ပေးလျက်ရှိကြောင်း သိရသည်။
အလားတူ နံနက် ၉ နာရီ ၂၀ မိနစ်ခန့်တွင်လည်း သံဖြူဇရပ်မြို့နယ်၊ဆင်ဖုံးရပ်ကွက်တွင် လေပြင်းတိုက်ခတ်ကာ မိုးသည်းထန်စွာရွာသွန်းခဲ့၍ သစ် ပင်လဲကျမှုများဖြစ်ပေါ်ခဲ့သဖြင့် သံဖြူဇရပ်မြို့ နယ်မီးသတ်စခန်းမှတပ်ဖွဲ့ဝင်များက ရှင်းလင်းပေးခဲ့ကြသည်။
ထို့ပြင် ပေါင်မြို့နယ်၊နတ်ကြီးချောင်ကျေးရွာရှိ ရန်ကုန်-မော်လမြိုင်သွားကားလမ်းတွင် မွန်းတည့် ၁၂ နာရီခွဲကျော်က သစ်ပင်များလဲကျကာလမ်း ပိတ်နေသဖြင့် ပေါင်မြို့နယ်မီးသတ်စခန်းမှတပ်ဖွဲ့ဝင်များက ရှင်းလင်းပေးခဲ့ကြကြောင်း သိရသည်။
အလားတူ ပေါင်မြို့နယ်၊ရင်းငြိမ်တောင်ရပ်ကွက်၊ ၂ လမ်းတွင် လေပြင်းတိုက်ကာ မိုးသည်းထန်စွာရွာသွန်းခဲ့သဖြင့် မွန်းလွဲ ၂ နာရီခွဲခန့်၌ သစ်ပင်များလဲကျမှုအား မီးသတ်တပ်ဖွဲ့ဝင်များနှင့်လူမှုကူညီရေးအသင်းဝင်များက ဖယ်ရှားရှင်းလင်းခဲ့ကြသည်။
ထို့အတူ မုတ္တမမြို့၊ကော့စိုင်ကျေးရွာတွင် နေ့လည် ၃ နာရီခွဲခန့်က လေပြင်းတိုက်ခတ်ပြီး မိုး သည်းထန်စွာရွာသွန်းခဲ့သဖြင့် သစ်ပင်များလဲကျမှုအား မုတ္တမနယ်မြေမီးသတ်စခန်းမှတပ်ဖွဲ့ဝင်များက ရှင်းလင်းပေးခဲ့ကြသည်။
ထို့ပြင် မွန်းလွဲ ၂ နာရီခွဲခန့်တွင်လည်း သထုံမြို့နယ်၊ကျောက်တန်းကျေးရွာရှိ ဘုန်းတော်ကြီးကျောင်းဝင်းအတွင်း လေပြင်းတိုက်ခတ်ကာ မိုးသည်းထန်စွာရွာသွန်းမှုကြောင့် သစ်ပင်များလဲကျခဲ့သဖြင့် သထုံမြို့နယ်မီးသတ်စခန်းမှတပ်ဖွဲ့ဝင်များက ရှင်းလင်းခဲ့ကြသည်။
အဆိုပါ ဖြစ်စဥ်များ၌ လူထိခိုက်ဒဏ်ရာရရှိမှုများ မဖြစ်ပေါ်ခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်နှင့်ဒေသခံများထံမှ သိရသည်။
