တရုတ်နိုင်ငံနှင့် မြန်မာနိုင်ငံရှိ အထည်ချုပ်လုပ်ငန်းရှင်ပေါင်း (၁၀၀) ခန့် လာရောက်ခင်းကျင်းပြသခဲ့သည့် “မြန်မာ့အထည်အလိပ်နှင့် စက်ယန္တရားကုန်စည်ပြပွဲ ၂၀၂၃” ကို ယနေ့ ဒီဇင်ဘာလ (၈) ရက်တွင် ရန်ကုန်မြို့၊ အင်းလျားလိတ်ဟိုတယ်ရှိ ရန်ကုန်ကွန်ဗန်းရှင်းစင်တာ၌ ကျင်းပပြုလုပ်ခဲ့ကြောင်း သိရသည်။
ဖွင့်ပွဲအခမ်းအနားကို ရန်ကုန်တိုင်းဒေသကြီးအစိုးရအဖွဲ့၊ ဝန်ကြီးချုပ် ဦးစိုးသိန်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးမင်းမင်း၊ တရုတ်သံရုံး (မြန်မာ)မှ သံအမတ်ကြီး၊ တရုတ်နိုင်ငံ Zhejiang ပြည်နယ်မှ ကူးသန်းရောင်းဝယ်ရေးဦးစီးဌာန၊ UMFCCI, CECCM, MGMA, CTGA, JGMA, KOGAM တို့မှ တာဝန်ရှိသူများ တက်ရောက်ခဲ့ကြောင်း သိရသည်။
“မြန်မာ့အထည်လိပ်နှင့် အထည်ချုပ်ကဏ္ဍအတွက် အဖိုးတန်တဲ့ လုပ်ငန်းအချိတ်အဆက်တွေ၊ ဝယ်လက်အသစ်တွေ၊ စက်ပစ္စည်းနဲ့ နည်းပညာပိုင်းဆိုင်ရာ ဆန်းသစ်တီထွင်မှုများ၊ စိတ်ကူးစိတ်သန်းများကို တစ်ဦးနဲ့တစ်ဦး ဖလှယ်ခွင့်ရရှိမယ်ဆိုတာ ယုံကြည်ပါတယ်”ဟု ရန်ကုန်တိုင်း ဝန်ကြီးချုပ် ဦးစိုးသိန်းက ပြောသည်။
ပြပွဲကို ၂၀၂၃ ခုနှစ် ဒီဇင်ဘာ ၈၊ ၉၊ ၁၀ ရက် (၃ ရက်ကြာ) ပြုလုပ်မည်ဖြစ်ပြီး တရုတ်နိုင်ငံမှ ကုန်ပစ္စည်း အမှတ်တံဆိပ် (၂၈) ခု၊ အထည်လိပ်နှင့် အဝတ်အထည်၊ ဖိနပ်နှင့် အိတ်ထုတ်လုပ်သည့် လုပ်ငန်းရှင်များ အဝတ်အထည်ဆိုင်ရာပစ္စည်း လုပ်ငန်းရှင်များမှ ပြခန်းပေါင်း (၁၀၀) ကျော်ဖြင့် ပြသလျက် ရှိကြောင်း သိရသည်။
“တရုတ်-မြန်မာ နှစ်နိုင်ငံ အထည်အလိပ်နဲ့ အထည်ချုပ်လုပ်ငန်းများ ပိုမိုတိုးတက်စေရန် ရည်ရွယ်ပြီးတော့ မြန်မာနိုင်ငံအထည်ချုပ် လုပ်ငန်းရှင်များအသင်းနဲ့ China Textile and Garment Association of Myanmar တို့ ပူးပေါင်းပြုလုပ်တဲ့ ကုန်စည်ပြပွဲဖြစ်တဲ့အတွက်ကြောင့် နှစ်နိုင်ငံအထည်အလိပ်ကဏ္ဍအတွက် အလားအလာကောင်းများ ရရှိစေမှာဖြစ်ပါတယ်”ဟု စီးပွားရေးနှင့် ကူးသန်းရောင်းဝယ်ရေးဝန်ကြီး ဌာန၊ ဒုတိယဝန်ကြီး ဦးမင်းမင်းက ပြောသည်။
ပြပွဲအတွင်း မြန်မာနိုင်ငံအထည်ချုပ်လုပ်ငန်းရှင်များအသင်း (MGMA) နှင့် မြန်မာနိုင်ငံရှိ ပြည်ပအထည်ချုပ် လုပ်ငန်းရှင်အသင်းများ ဖြစ်သည့် ကိုရီးယား KOGAM၊ ဂျပန် JGMA ၊ ဟောင်ကောင် HKMMA တို့မှ အသင်းဝင် CMP စက်ရုံများမှ သက်ဆိုင်ရာ Pavilion များတွင် ခင်းကျင်းပြသထားကြောင်း သိရသည်။
၎င်းစက်ရုံများမှလည်း အီးယူ၊ ဂျပန် အမှတ်တံဆိပ်နှင့် အခြားသော နိုင်ငံတကာအမှတ်တံဆိပ်များဖြစ်သော Made in Myanmar နိုင်ငံတကာထုတ်ကုန် အဝတ်အထည်များကို ပြသခဲ့ပြီး Made in Myanmar ထုတ်ကုန်များဖြစ်သည့် အဝတ်အထည်၊ ပြည်တွင်းထုတ် ဖိနပ်နှင့် အိတ်များကိုလည်း Fashion Show အနေဖြင့် ပြသခဲ့ကာ ပြည်တွင်း SME လုပ်ငန်းများအား အရောင်းမြှင့်တင်ခြင်း၊ မိတ်ဆက်ခြင်းများ ပြု လုပ်ခဲ့ကြောင်း သိရသည်။
