မြန်မာ-တရုတ်နှစ်နိုင်ငံ နယ်နိမိတ်ချင်းထိစပ်လျက်ရှိ၍ နှစ်နိုင်ငံကုန်သွယ်မှုကဏ္ဍ၌ နယ်စပ်ဒေသကုန် သွယ်ရေးသည် နှစ်နိုင်ငံပြည်သူများ၏ လူမှုစီးပွားဘဝတိုးတက်ရေးကို တိုက်ရိုက်အထောက်အကူပြုနေသဖြင့် နယ်စပ်ဂိတ်များမှာ အလွန်အရေးပါသည့်အခြေအနေတွင်ရှိနေသည်။
ထို့ကြောင့် နယ်စပ်ဒေသတည်ငြိမ်အေးချမ်း၍ ကုန် သွယ်ရေးလုပ်ငန်းများပြန်လည်စတင်နိုင်ရေးနှင့်ပတ်သက်၍ နိုင်ငံတော်လုံခြုံရေးနှင့် အေးချမ်းသာ ယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်မှ ယနေ့ သြဂုတ် ၃၁ ရက်နံနက်ပိုင်းက တရုတ်နိုင်ငံ၊ တီယန်ကျင်းမြို့၊ Tangle Hotel ၌ ကျင်းပသော မြန်မာနိုင်ငံတွင်ရင်းနှီးမြှုပ်နှံလိုသည့်ပုဂ္ဂိုလ်များနှင့် ရင်းနှီးမြှုပ်နှံထားသည့် တရုတ်စီး ပွားရေးလုပ်ငန်းရှင်များ၊ စီးပွားရေးပညာရှင်များနှင့် တာဝန်ရှိသူများတက်ရောက်သော မြန်မာ-တရုတ် စီးပွားရေးပူးပေါင်းဆောင်ရွက်မှုမြှင့်တင်ရေးတွေ့ဆုံပွဲတွင် ပြောကြားခဲ့ခြင်းဖြစ်သည်။
” မြန်မာ-တရုတ် နယ်စပ်ဒေသမတည်ငြိမ်မှုတွေကြောင့် ယူနန်စီးပွားရေးကိုလည်း ထိခိုက်နေတာကိုတွေ့ရပါတယ်။ ဒါ့ကြောင့် နှစ်နိုင်ငံနယ်စပ်ဂိတ်တွေ ပြန်ပြီးဖွင့်လှစ်နိုင်မယ်ဆိုရင် ကုန်စည်စီးဆင်းမှုတွေ အရင်ထက်ပိုမိုတိုးတက်အောင်ဆောင်ရွက်နိုင်မှာဖြစ်ပါတယ်”ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
ထို့ပြင် မြန်မာနိုင်ငံ၊ အရှေ့မြောက်ဒေသမှတစ်ဆင့် ယူနန်ပြည်နယ်၊ စီချွမ်ပြည်နယ်၊ ချုံချင့်မြူနီစပယ်ဒေသ၊ ကွမ်ရှီးပြည်နယ်၊ နန်နင်းမြို့အထိ ကုန်သွယ်ရေးလမ်းကြောင်းအား တိုးချဲ့ဆောင်ရွက်နိုင်မည်ဖြစ်ရာ ယင်း လမ်းကြောင်းသည် တရုတ်-မြန်မာ နှစ်နိုင်ငံလုံးအတွက် အဓိကကုန်သွယ်ရေးလမ်းကြောင်းဖြစ်လာမည့်အပြင် တရုတ်နိုင်ငံ၊ အရှေ့တောင်ပိုင်းဒေသ၊ အလယ်ပိုင်းနှင့် တောင်ပိုင်းဒေသများမှ မြန်မာနိုင်ငံကိုပေါင်းကူးတံတားအဖြစ်အသုံး ပြုပြီး အာဆီယံနိုင်ငံများကိုလည်း စီးပွားရေးဆိုင် ရာကုန်သွယ်ချိတ်ဆက်မှုများလုပ်ဆောင်လာနိုင်မည်ဟု ပြောသည်။
ထို့ကြောင့် နှစ်နိုင်ငံနယ်စပ်ဒေသတည်ငြိမ်အေးချမ်းရေးနှင့် လုံခြုံရေးကိုဦးစွာအလေးထားပူးပေါင်းဆောင်ရွက်ရမည်ဖြစ်ကာ မိမိတို့အနေဖြင့် နှစ်နိုင်ငံကြား နယ်စပ်ကုန်သွယ်ရေးဂိတ်များမှတစ်ဆင့် ကုန်သွယ်မှုနှင့် ရင်းနှီးမြှုပ်နှံမှုများကို ယခုထက်ပိုမိုတိုးမြှင့်သွားလိုသည်ဟု ပြောကြားခဲ့သည်။