ရန်ကုန်၊ ဇွန် ၁၅
မြန်မာ့စိုက်ပျိုးရေးကုန်စည်ပြပွဲ Agri-Tech Myanmar 2025 ကို ဇွန်လ ၂၇ ရက် နေ့မှ ၂၉ ရက် နေ့အထိ ရန်ကုန်မြို့၌ ကျင်းပမည်ဖြစ်ကြောင်း ပွဲစီစဉ်သူ ဦးဇာနည်က ရှင်းဟွာသို့ ပြောကြားခဲ့ပါသည်။
အဆိုပါ ကုန်စည်ပြပွဲသည် စိုက်ပျိုးရေးကဏ္ဍတွင် ပါဝင်သည့် တောင်သူများနှင့် လုပ်ငန်းရှင်များကို ချိတ်ဆက်ကာ ကုန်ကြမ်းနှင့် ကုန်ချော စိုက်ပျိုးရေးနှင့် မွေးမြူရေးထွက်ကုန် နှစ်မျိုးစလုံးအတွက် ပြည်တွင်းပြည်ပ စျေးကွက်ချဲ့ထွင်ရာတွင် အထောက်အကူ ဖြစ်စေကြောင်း ၎င်းက ပြောကြားခဲ့သည်။
ကုန်စည်ပြပွဲတွင် ခင်းကျင်းပြသထားသည့် စိုက်ပျိုးရေးပြခန်း ၃၄ ခန်း၊ စွမ်းအင်ဆိုင်ရာ ပြခန်း ၁၄ ခန်း၊ ဟိုတယ်၊ စားသောက်ဆိုင်နှင့် ကော်ဖီဆိုင် ၃၄ ခန်း၊ စားသောက်ကုန်ထုတ်လုပ်သည့် ပြခန်း ၁၆ ခန်းနှင့် SME စားသောက်ကုန်များ ပြသသည့် ပြခန်း ၉ ခန်းတို့ အပါအဝင် ကုန်စည်ပြပွဲတွင် စုစုပေါင်း ၁၀၇ ခန်း ပါဝင်ပြသမည်ဖြစ်ကြောင်း ၎င်းက ပြောသည်။
ဆန်နှင့် ဆီစက်များကဲ့သို့ စိုက်ပျိုးရေးဆိုင်ရာ စက်များနှင့် ထုတ်ကုန်များအပြင် အစားအသောက် ပြုပြင်ထုတ်လုပ်ခြင်းနှင့် ထုပ်ပိုးခြင်းဆိုင်ရာ စက်ကိရိယာများ၊ အနံ့အရသာ ကုန်ကြမ်းများနှင့် ပြည်တွင်းထုတ် ဝိုင်ကိုလည်း ပြပွဲတွင် ပြသသွားမည်ဖြစ်ကြောင်း ၎င်းက ဆက်လက်ပြော ကြားခဲ့သည်။
ကုန်စည်ပြပွဲတွင် စိုက်ပျိုးရေးနှင့် ရိတ်သိမ်းချိန်လွန် လက်တွေ့ နှီးနှောဖလှယ်ပွဲများ၊ ပြပွဲပြသသူများမှ ၎င်းတို့၏ထုတ်ကုန်မိတ်ဆက်ခြင်းနှင့် လယ်ယာထွက်ကုန်ပစ္စည်းများရောင်းချခြင်းစသည့် အထူးအစီအစဉ်များ ပါရှိမည်ဖြစ်ကြောင်း ၎င်းက ပြောကြားခဲ့သည်။
Ref: ရှင်းဟွာ