မြန်မာပြည်သူများနှင့် ထိတွေ့ဆက်ဆံမှု မြှင်တင်ရန် အမေရိကန် သံရုံးဒုတိယအကြီးအကဲ ပြန်လည်ရောက်ရှိ

မြန်မာပြည်သူများနှင့် အမေရိကန်ပြည်ထောင်စု၏ ထိတွေ့ဆက်ဆံမှုများ မြှင့်တင်ရန် သံရုံး ဒုတိယအကြီးအကဲ ဒေါက်ဂ်ဆောန်နစ်ခ် ကို ကြိုဆိုကြောင်း အမေရိကန်သံရုံး(ရန်ကုန်)က ယနေ့စက်တင်ဘာ၁၁ ရက်နေ့တွင် လူမှုကွန်ယက်စာမျက်နှာမှတဆင့် အသိပေးထားသည်။

၄င်းသည် မြန်မာပြည်တွင် သမ္မတ ဦးသိန်းစိန်လက်ထက် က ၃နှစ်ခန့် တာဝန်ထမ်း​ဆောင်ခဲ့ဖူးပြီး ယခု ပြန်လည်ရောက်ရှိလာခြင်းဖြစ်သည်။

ယခု အကြိမ် မြန်မာနိုင်ငံသို့ မရောက်မီ ယခင်က ၄င်းသည် ကိုလံဘိုရှိ အမေရိကန်သံရုံးတွင် သံရုံးဒုတိယအကြီးအကဲအဖြစ်လည်းကောင်း၊ သြစတေးလျနိုင်ငံ ကင်ဘာရာမြို့ရှိ အမေရိကန်သံရုံးတွင် စီးပွားရေးအကြံပေးဆိုင်ရာ ဒုသံအမတ် အဖြစ်လည်းကောင်း တာဝန်ထမ်းဆောင်ခဲ့သည်။

ဒေါက်ဂ်သည် ၂၀၁၇ ဇူလိုင်မှ ၂၀၁၉ အထိ အမေရိကန်နိုင်ငံခြားရေးဝန်ကြီးဌာနအောက်ရှိ အရှေ့အာရှနှင့် ပစိဖိတ်ရေးရာဌာန၏ စီးပွားရေးမူဝါဒဆိုင်ရာရုံးတွင် ညွှန်ကြားရေးမှူးအဖြစ် အာရှပစိဖိတ် စီးပွားရေးပူးပေါင်းဆောင်ရွက်မှုအဖွဲ့ (APEC) နှင့် ဒေသတွင်း စီးပွားရေးမူဝါဒများနှင့် ပတ်သက်သည့် အမေရိကန်အစိုးရ၏ ပါဝင်ဆောင်ရွက်မှုများအတွက် တာဝန်ယူခဲ့သည်။

၂၀၁၄ မှ ၂၀၁၇ အထိ ဆူဗာရှိ အမေရိကန်သံရုံးတွင် သံရုံး၏ဒုတိယအကြီးအကဲဖြစ် တာဝန်ထမ်းဆောင်ခဲ့စဉ်က ဒေါက်ဂ်ဆွန်းနစ်ခ်သည် ဖီဂျီ၊ ကီရီဘာတီ၊ နာအူရူ၊ တွန်ဂါနှင့် တူဗာလူနိုင်ငံများတွင် အမေရိကန်ပြည်ထောင်စု၏ စီးပွားရေး၊ နိုင်ငံရေးနှင့် လုံခြုံရေးဆိုင်ရာ အကျိုးစီးပွားများကို မြှင့်တင်ပေးခဲ့သူဖြစ်သည်။

အမေရိကန်-မြန်မာ နှစ်နိုင်ငံဆက်ဆံရေး အပြောင်းအလဲများ အရှိန်အဟုန်မြင့်ခဲ့သည့် ၂၀၁၁ မှ ၂၀၁၄ အထိ ကာလများတွင် သူသည် ရန်ကုန်မြို့ရှိ အမေရိကန်သံရုံး၏ နိုင်ငံရေးနှင့် စီးပွားရေးဌာနကို ဦးဆောင်ခဲ့ပါသည်။

၂၀၀၅ မှ ၂၀၀၇ ထိ ဒေါက်ဂ်သည် အမေရိကန်နိုင်ငံခြားရေးဝန်ကြီးဌာန၏ ဗီယက်နမ်ဆိုင်ရာ စီးပွားရေးအရာရှိအဖြစ် တာဝန်ထမ်းဆောင်ခဲ့ပြီး ၂၀၀၇ မှ ၂၀၁၀ အထိ ဟိုချီမင်းမြို့ရှိ အမေရိကန် ကောင်စစ်ဝန်ချုပ်ရုံး၏ စီးပွားရေးဌာနကို ဦးဆောင်ခဲ့ပါသည်။

ထိုငါးနှစ်တာကာလအတွင်း အမေရိကန်-ဗီယက်နမ် နှစ်နိုင်ငံ ကုန်သွယ်ရေးနှင့်ရင်းနှီးမြှုပ်နှံမှုများ ဆယ်ဆအထိ တိုးတက်လာခဲ့ဖူးသည်။

အမေရိကန်နိုင်ငံခြားရေးဝန်ကြီးဌာနတွင် တာဝန်ထမ်းဆောင်စဉ် စီးပွားရေးနှင့် ရင်းနှီးမြှုပ်နှံမှုဆိုင်ရာကိစ္စရပ်များကို အထူးပြုကိုင်တွယ်ရင်း သူသည် ဆလိုဗေးနီးယားနိုင်ငံ လူဘလီယာနာနှင့် တရုတ်နိုင်ငံ ပေကျင်းမြို့ရှိ အမေရိကန်သံရုံးများတွင် တာဝန်ကျခဲ့ပြီး တရုတ်နိုင်ငံ ရှန့်ယန်းမြို့ရှိ အမေရိကန်ကောင်စစ်ဝန်ရုံးတွင်လည်း တာဝန်ထမ်းဆောင်ခဲ့ဖူးသူဖြစ်သည်။တရုတ်နှင့် မြန်မာ တို့၏ ဓ​လေ့စရိုက်များကိုနားလည်သည့် အ​မေရိကန်လူမျိုးဖြစ်ခြင်းကလည်း ​ဒေသတွင်းပထဝီနိုင်ငံ​ရေးတွင် အားလုံးအဆင်​ပြေ​စေမည့် အခင်းအကျင်းကို လုပ်​ဆောင်​ပေးနိုင်မည်ဟု​မျှော်လင့်စရာဖြစ်သည်။

ဒေါက်ဂ်သည် ပိစ်ကောစတနာ့ဝန်ထမ်းဟောင်းတစ်ဦးလည်းဖြစ်ပြီး ဗဟိုအာဖရိကသမ္မတနိုင်ငံနှင့် ပစိဖိတ်တောင်ပိုင်းကျွန်းနိုင်ငံတစ်ခုဖြစ်သည့် နျူးအေးနိုင်ငံတို့တွင် တာဝန်ထမ်းဆောင်ခဲ့ဖူးသည်။ သူသည် မင်နီဆိုတာပြည်နယ်၊ နော့သ်ဖီးလ်မြို့ရှိ ကာလ်တန်ကောလိပ်ကျောင်းဆင်းတစ်ဦးလည်းဖြစ်သည်။

ဇနီးဖြစ်သူ ဝင်နီ က သူနှင့်အတူ ရန်ကုန်မြို့သို့ လိုက်ပါလာခဲ့ပါသည်။ သူတို့၏ သားသမီးနှစ်ဦးမှာမူ တက္ကသိုလ်တွင် ပညာသင်ကြားလျက် ရှိ​ကြောင်းသိရသည်။

Ref:mm.usembassy.gov