မြန်မာနေရှင်နယ်လိဂ် -၂ သို့ တန်းတက်ကစားခွင့်ရရှိမည့် MNL-2 Promotion Amateur Club Tournament 2025 ပြိုင်ပွဲကျင်းပပြုလုပ်သွားမည်ဖြစ်ကြောင်း မြန်မာနေရှင်လိဂ်ကော်မတီထံမှ သိရသည်။
ပြိုင်ပွဲကို လာမည့် မတ် (၂၂) ရက်၌ စတင်ကျင်းပသွားမည်ဖြစ်ကာ ယင်းပြိုင်ပွဲသို့ ဝင်ရောက်ယှဉ်ပြိုင်မည့် အထက်မြန်မာပြည်/အောက်မြန်မာပြည် Amateur လိဂ်ပြိုင်ပွဲများမှ ကလပ်အသင်းများနှင့် အခြားဝင်ရောက်ယှဉ်ပြိုင်လိုသည့် A mateur ကလပ်အသင်းများ စာရင်းပေးသွင်းနိုင်ပြီဖြစ်ကြောင်း ဆိုသည်။
ပြိုင်ပွဲသို့ ဝင်ရောက် ယှဉ်ပြိုင်ရန် စာရင်းပေးသွင်းမှုအား ၂၀၂၅ ခုနှစ် ဖေဖော်ဝါရီ (၄) ရက် နောက်ဆုံးထား၍ မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ်သို့ စာရင်းပေးသွင်းနိုင်ကြောင်း အသိပေးထားသည်။
MNL-2 Promotion Amateur Club Tournament 2025 ပြိုင်ပွဲတွင် ဗိုလ်လုပွဲသို့ တက်ရောက်သည့် ပထမ၊ ဒုတိယရရှိသည့် အသင်းနှစ်သင်းသည် လာမည့် MNL-2 League 2025 အမှတ်ပေးဘောလုံးပြိုင်ပွဲသို့ ဝင်ရောက် ယှဉ်ပြိုင်ခွင့်ရမည်ဖြစ်ကြောင်း သိရသည်။
အဆိုပါ ပြိုင်ပွဲမှတဆင့် တန်းတက်ကစားခွင့်ရသည့် အသင်းများအနေဖြင့် ကမ္ဘာ့ဘောလုံးအဖွဲ့ချုပ်(FIFA)၊ အာရှဘောလုံးအဖွဲ့ချုပ်(AFC)တို့မှ ချမှတ်ထားသည့် ပရော်ဖက်ရှင်နယ်ကလပ် Criteria များ ဖြစ်သည့် FIFA Connect (National Online Registration System), AFC Club Licensing Criteria များကို လိုက်နာဆောင်ရွက်ရမည်ဖြစ်သည်ဟု ဆိုသည်။
MNL-2 Promotion Amateur Club Tournament 2025 ပြိုင်ပွဲသို့ ပါဝင်ယှဉ်ပြိုင်မည့် အသင်းများအနေဖြင့် MNL-2 League 2025 သို့ တန်းတက်ကစားခွင့်ရပါက အသင်းအား အဆင့်အတန်းမီစွာ ယှဉ်ပြိုင်နိုင်ရန် လိုအပ်ပြီးရေရှည်ဖွဲ့စည်း ယှဉ်ပြိုင်နိုင်သည့် ဘဏ္ဍာရေးအင်အားတောင့်တင်း ခိုင်မာရန် လိုအပ်သည်ဟုလည်း ဖြည့်စွက်အသိပေးထားသည်။