ရန်ကုန်၊ ဩဂုတ် – ၁၄
၂၀၂၆-၂၇ ရာသီ မြန်မာနေရှင်နယ်လိဂ်ပြိုင်ပွဲတွင် Video Assistant Referee (VAR) စနစ် အကောင်အထည်ဖော်အသုံးပြုနိုင်ရေးအတွက် ကမ္ဘာ့ဘောလုံးအဖွဲ့ချုပ် (FIFA) နှင့် အာရှဘောလုံးအဖွဲ့ချုပ် (AFC) တို့နှင့် ချိတ်ဆက်ဆောင်ရွက်လျက်ရှိကြောင်း လိဂ်အကြိုအစည်းအဝေးမှ သိရသည်။
၂၀၂၆-၂၇ ရာသီ မြန်မာနေရှင်နယ်လိဂ် ပထမအကျော့ပွဲစဉ်များကို ဩဂုတ် ၂၈ ရက်မှ ဒီဇင်ဘာ ၂၁ ရက်အထိ ကျင်းပသွားမည်ဖြစ်ပြီး ဒုတိယအကျော့ပွဲစဉ်များကို ၂၀၂၇ ခုနှစ် ဇန်နဝါရီ ၁ ရက်မှ မတ် ၁၄ ရက်အထိ ကျင်းပသွားမည်ဖြစ်သည်။ ယခုရာသီပြိုင်ပွဲတွင် အသင်း ၁၂ သင်း ဝင်ရောက်ယှဉ်ပြိုင်မည်ဖြစ်သည်။
ရာသီကြိုဖွင့်ပွဲအဖြစ် MFF Charity Shield 2026 ပွဲစဉ်ကို ဩဂုတ် ၂၅ ရက် ညနေ ၅ နာရီတွင် ရန်ကုန်မြို့၊ သုဝဏ္ဏအားကစားကွင်း၌ ကျင်းပမည်ဖြစ်ပြီး မြန်မာနေရှင်နယ်လိဂ်ချန်ပီယံ ရှမ်းယူနိုက်တက်အသင်းနှင့် League Cup ချန်ပီယံ ရန်ကုန်ယူနိုက်တက်အသင်းတို့ ယှဉ်ပြိုင်ကစားကြမည်ဖြစ်သည်။
မြန်မာ့လက်ရွေးစင်အသင်း ပါဝင်ယှဉ်ပြိုင်ခဲ့သည့် အာဆီယံဟွန်ဒိုင်းဖလားပြိုင်ပွဲတွင်လည်း VAR စနစ်ကို အသုံးပြုခဲ့ပြီး မလေးရှားနှင့် စင်ကာပူနိုင်ငံတို့ရှိ Video Operation Rooms (VOR) များမှတစ်ဆင့် ပွဲစဉ်များကို စောင့်ကြည့်ကာ ဗဟိုထိန်းချုပ်မှုပုံစံဖြင့် ဆောင်ရွက်ခဲ့ကြောင်း သိရသည်။
မြန်မာနေရှင်နယ်လိဂ်တွင် VAR စနစ် အကောင်အထည်ဖော်အသုံးပြုနိုင်ပါက အရေးပါသည့် ပွဲစဉ်ဆုံးဖြတ်ချက်များကို ပြန်လည်စစ်ဆေးနိုင်မည်ဖြစ်သဖြင့် ဒိုင်လူကြီးများ၏ ဆုံးဖြတ်ချက်ပိုင်းဆိုင်ရာ တိကျမှန်ကန်မှု မြင့်မားလာစေရန်နှင့် ပြိုင်ပွဲအရည်အသွေး ပိုမိုကောင်းမွန်လာစေရန် အထောက်အကူပြုနိုင်မည်ဖြစ်သည်။