ဆေးတက္ကသိုလ်များ၏ အလုပ်သင်ဆရာဝန်လေ့ကျင့်သင်ကြားရေးဆေးရုံကြီးများတွင် အလုပ်သင်ဆရာဝန် (သစ်လွင်) အဖြစ် (၁၂၄၀)ဦးသည် အောက်တိုဘာ ၁ ရက်မှ စတာဝန်ထမ်းဆောင်မည် ဖြစ်ကြောင်း သိရသည်။
ထို မောင်မယ်သစ်လွင် အလုပ်သင်ဆရာဝန်များကို ကြိုဆိုပွဲအား နေပြည်တော်ရှိ ကျန်းမာရေးဝန်ကြီးဌာန၌ Semi-virtual စနစ်ဖြင့် ကျင်းပခဲ့သေးပြီး ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက အလုပ်သင်ဆရာဝန်သင်တန်းကာလသည် သင်ယူတတ်မြောက်ထားသော ဆေးပညာရပ်ဆိုင်ရာ အသိပညာများကို လက်တွေ့ကျကျအသုံးချပြီး လူနာများကို ကျန်းမာရေးစောင့်ရှောက်မှုပေးနိုင်မည့် အချိန်ကာလဖြစ်ကြောင်း ပြောကြားသည်။
ထို့အပြင် အလုပ်သင်ဆရာဝန်များ မဖြစ်မနေတတ်မြောက်ထားရမည့် လက်တွေ့ကျွမ်းကျင်မှု (Procedural Skills)များကို မိမိတို့ ဆရာ/ဆရာမများ၊ အတွေ့အကြုံရှိသော လုပ်ဖော်ကိုင်ဖက်များထံမှ စာတွေ့ရော၊ လက်တွေ့ (Hands on Training)ပါ သေချာစွာဆည်းပူး လေ့လာနိုင်မည့် ကာလလည်းဖြစ်ကာ အလုပ်သင်ဆရာဝန်ကာလပြီးဆုံးပါက ဆရာဝန်များအဖြစ် နိုင်ငံ့တာဝန်များကို ဆက်လက်ထမ်းဆောင်ကြရမည်ဖြစ်သည့်အတွက် မိမိတို့၏ ဆေးပညာ ပိုမိုတိုးတက်လာအောင် ဘွဲ့လွန်သင်တန်းများကို ဆက်လက်တက်ရောက်နိုင်ရေး ကြိုးစားကြရမည်ဖြစ်ကြောင်း တိုက်တွန်းပြောကြားသည်။
ထိုကြိုဆိုပွဲသို့ ဆေးတက္ကသိုလ်(၁) ရန်ကုန်မှ အလုပ်သင်ဆရာဝန် ၃၀၂ ဦး၊ ဆေးတက္ကသိုလ် မန္တလေးမှအလုပ်သင်ဆရာဝန် ၂၈၁ ဦး၊ ဆေးတက္ကသိုလ် (၂) ရန်ကုန်မှ ၃၃၄ ဦး၊ ဆေးတက္ကသိုလ် မကွေးမှ ၁၆၆ ဦး၊ ဆေးတက္ကသိုလ် တောင်ကြီးမှ ၁၀၄ ဦး တက်ရောက်ကြပြီး Inperson စနစ်ဖြင့် နေပြည်တော် ပြည်သူ့ဆေးရုံကြီး ခုတင်(၁၀၀၀)မှ ၅၃ ဦး စုစုပေါင်း ၁၂၄၀ ဦးတို့ တက်ရောက်ခဲ့ကြကြောင်းလည်း သိရသည်။
photo – MOH