ထိုင်းနိုင်ငံမှ အိမ်ရှင်အဖြစ်လက်ခံ၍ ၂၀၂၆ ခုနှစ်၊ ဇန်နဝါရီ ၂၀ ရက်မှ ဇန်နဝါရီ ၂၆ ရက်အထိ (၁၃) ကြိမ်မြောက် အာဆီယံမသန်စွမ်းအားကစားပြိုင်ပွဲကို အားကစားနည်း (၁၉) နည်းဖြင့်ကျင်းပမည်ဖြစ်ရာ မြန်မာနိုင်ငံမှ အားကစားနည်း (၁၁) နည်းတွင်ဝင်ရောက်ယှဥ်ပြိုင်သွားမည်ဖြစ်သည်။
မြန်မာနိုင်ငံမသန်စွမ်းအားကစားအဖွဲ့ချုပ်မှ ရေကူး၊ ပြေးခုန်ပစ်၊ စစ်တုရင်၊ အလေးမ၊ ဂိုးလ်ဘော၊ ဘောလုံး၊ ဘော်လီဘော၊ စားပွဲတင်တင်းနစ်၊ ေ-သနတ်ပစ်၊ ဘိုစီယာ၊ ဘိုးလင်းအားကစားနည်းတို့တွင် ဝင်ရောက်ယှဉ်ပြိုင်သွားမည်ဖြစ်ရာ ရန်ကုန်မြို့၌ စခန်းဝင်လေ့ကျင့်မှုများပြုလုပ်လျက်ရှိသည်။
အဆိုပါ စခန်းဝင်လေ့ကျင့်နေသည့် မသန်စွမ်းအားကစားသမားများ၊ အုပ်ချုပ်/နည်းပြများအား မြန်မာနိုင်ငံအိုလံပစ်ကော်မတီဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်မှ ဒီဇင် ဘာ ၂၉ ရက်ကတွေ့ဆုံခဲ့သည်။
ထိုသို့ တွေ့ဆုံပြီးနောက် နိုင်ငံ့ဂုဏ်ဆောင်နိုင်သည့် အားကစားသမားများဖြစ်အောင် အစွမ်းကုန်ကြိုးစားခဲ့ကြရန်၊ နိုင်ငံတော်မှ ထိုက်ထိုက်တန်တန်ဖြင့် ပေးအပ်ချီးမြှင့်သည့် ဂုဏ်ပြုချီးမြှင့်ငွေများကိုရရှိအောင် နောက်ဆုံးအချိန်ထိ မလျော့သောစိတ်ဓာတ်ဖြင့်ကြိုးစားကြရန်၊ နိုင်ငံတော်ကလည်း သတ်မှတ်ထားသည့်အတိုင်း ဆုကြေးငွေများကို ထိုက်ထိုက်တန်တန်ချီးမြှင့်ပေးသွားမည်ဖြစ်၍ မသန်ပေမယ့် စွမ်းဆောင်နိုင်သူများဖြစ်ကြောင်း သက်သေပြရန်၊ မိမိနိုင်ငံ၊ မိမိအားကစားအဖွဲ့ချုပ်၏ ဂုဏ်သိက္ခာကိုပိုမိုမြှင့်တင့်နိုင်သည့် အားကစားသမားကောင်းဖြစ်အောင် ယှဉ်ပြိုင်ကြိုးစားကြရန်တို့ကို မှာကြားခဲ့သည်။
ထို့နောက် ပြည်ထောင်စုဝန်ကြီးမှ မြန်မာနိုင်ငံမသန်စွမ်းသူများအားကစားအဖွဲ့ချုပ်အစည်းအဝေးခန်းမ၌ ပြိုင်ပွဲဝင်ရောက်ယှဉ်ပြိုင်ရာတွင်အသုံးပြုမည့် အထောက်အကူပြုပစ္စည်းများနှင့် အားကစားနည်းအလိုက်ပြိုင်ပွဲဝင်ဝတ်စုံများ ခင်းကျင်းပြသထားမှုများကို ကြည့်ရှုစစ်ဆေးခဲ့သည်။