မြန်မာနိုင်ငံနှင့် ကိုက်ညီမည့် ခေတ်မီဆေးဘက်ဆိုင်ရာနှင့် ဆေးရုံသုံးပစ္စည်းများ ပြည်တွင်း၌ ထုတ်လုပ် ဖြန့်ချိနိုင်ရေး ဆွေးနွေးမှု တစ်ရပ် ပြုလုပ်

မြန်မာနိုင်ငံ၏ လိုအပ်ချက်နှင့် ကိုက်ညီသည့် ခေတ်မီဆေးဘက်ဆိုင်ရာနှင့် ဆေးရုံသုံးပစ္စည်းများ ပြည်တွင်းတွင် ထုတ်လုပ် ဖြန့်ချိနိုင်ရေး ကျန်းမာရေးဝန်ကြီးဌာနနှင့် ပေကျင်းဟုန်ဖန်း ရင်းနှီးမြှုပ်နှံမှု ကုမ္ပဏီလိမိတက်မှ ဦးဆောင်သည့် ကိုယ်စားလှယ်အဖွဲ့တို့ တွေ့ဆုံဆွေးနွေးခဲ့ကြကြောင်း သိရသည်။

ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းအား ပေကျင်းဟုန်ဖန်း ရင်းနှီးမြှုပ်နှံမှုကုမ္ပဏီလိမိတက်မှ Mr. Zhou Xiaofeng ဦးဆောင်သည့် ကိုယ်စားလှယ်အဖွဲ့မှ ဖေဖော်ဝါရီ(၂၇) ရက်က ကျန်းမာရေးဝန်ကြီး ဌာန၊ အစည်းအဝေးခန်းမ၌ လာရောက် တွေ့ဆုံစဉ် ထည့် သွင်းဆွေးနွေးခဲ့ခြင်း ဖြစ်သည်။

ထိုသို့တွေ့ဆုံဆွေးနွေးရာတွင် ပေကျင်းဟုန်ဖန်းရင်းနှီးမြှုပ်နှံမှု ကုမ္ပဏီလိမိတက်မှ မြန်မာနိုင်ငံ၏ လိုအပ်ချက်နှင့် ကိုက်ညီသည့် ခေတ်မီဆေးဘက်ဆိုင်ရာနှင့် ဆေးရုံသုံးပစ္စည်းများ၊ ရောဂါရှာဖွေရေး ကိရိယာများ၊ စက်ပစ္စည်းများ၊ ဓါတ်ခွဲစမ်းသပ်စစ်ဆေးသည့် ကိရိယာများအား ပြည်တွင်းတွင်ထုတ်လုပ် ဖြန့်ချိနိုင်ရေးနှင့် ရင်းနှီးမြှုပ်နှံမှု ဆောင်ရွက်နိုင်ရေးကိစ္စရပ်များကို ဆွေးနွေးခဲ့ကြကြောင်း သိရသည်။

ထို့ပြင် မြန်မာနိုင်ငံနှင့် တရုတ်နိုင်ငံတို့အကြား လက်ရှိပူးပေါင်းဆောင်ရွက်နေသည့် ကျန်းမာရေး စောင့်ရှောက်မှု လုပ်ငန်းများနှင့် ဆေးရုံများ အချင်းချင်း ဆေးကုသမှု လုပ်ငန်းများအား ပူးပေါင်းဆောင်ရွက်နိုင်မည့် ကိစ္စရပ်များကိုလည်း ထည့်သွင်းဆွေးခဲ့ကြောင်း သိရသည်။

အလားတူ တရုတ်နိုင်ငံမှ ထုတ်လုပ်သည့်ခေတ်မီဆေးဘက်ဆိုင်ရာနှင့် ဆေးရုံသုံးပစ္စည်းများအား မြန်မာနိုင်ငံတွင် မိတ်ဆက်ပြသနိုင်ရေး ကိစ္စရပ်များ အစရှိသည်တို့ကို ရင်းနှီးပွင့်လင်းစွာ ဆွေးနွေးခဲ့ကြောင်း သိရသည်။

အဆိုပါ ဆွေးနွေးပွဲသို့ ကျန်းမာရေးဝန်ကြီးဌာန ဒုတိယဝန်ကြီးနှင့် ညွှန်ကြားရေးမှူးချုပ်များ၊ ပေကျင်း ဟုန်ဖန်းရင်းနှီး မြှုပ်နှံမှုကုမ္ပဏီမှ ကိုယ်စားလှယ်များ၊ ကျန်းမာရေးဝန်ကြီး ဌာနမှ တာဝန်ရှိပုဂ္ဂိုလ်များ တက်ရောက်ခဲ့ကြကြောင်း သိရသည်။