ပြည်သူများ လက်ရှိအသုံးပြုနေသည့် မိုဘိုင်းဖုန်းများ အခွန်ပေးဆောင်ရန် မလိုအပ်ဘဲ ဆက်လက်အသုံးပြုနိုင်
မြန်မာနိုင်ငံတွင် မိုဘိုင်းလက်ကိုင်ဖုန်းများနှင့် မိုဘိုင်းကွန်ရက်အသုံးပြု ဆက်သွယ်ရေးစက်ပစ္စည်းများ၏ မူရင်းအမှတ်အသားဖြစ်သည့် IMEI ကို မှတ်ပုံတင်စစ်ဆေးနိုင်ရန် ဗဟိုမိုဘိုင်းစက်ပစ္စည်း သက်သေခံမှတ်ပုံတင်စနစ် (Central Equipment Identity Register – CEIR) ကို ၂၀၂၆ ခုနှစ် မတ်လ ပထမပတ်မှ စတင်အသုံးပြု ဆောင်ရွက်သွားမည်ဖြစ်ကြောင်း CEIR နှင့် EIR စနစ် စီမံကိန်းဦးစီးကော်မတီက အသိပေးကြေညာခဲ့သည်။
အဆိုပါစနစ်ကို မိုဘိုင်းလက်ကိုင်ဖုန်း အသုံးပြုသူများအနေဖြင့် စံချိန်စံညွှန်းနှင့် ကိုက်ညီပြီး နိုင်ငံတော်သို့ ကျသင့်အခွန်များ ပေးဆောင်ထားသည့် ဖုန်းများကို ယုံကြည်စိတ်ချစွာ အသုံးပြုနိုင်စေရန် ရည်ရွယ်၍ ဆောင်ရွက်ခြင်းဖြစ်ကြောင်း သိရသည်။
လက်ရှိ ပြည်သူများ အသုံးပြုနေသည့် မိုဘိုင်းဖုန်းများကို အခွန်ပေးဆောင်ရန် မလိုအပ်ဘဲ ဆက်လက်အသုံးပြုနိုင်ရန် CEIR စနစ်ရှိ ခွင့်ပြုစာရင်းတွင် အလိုအလျောက် ထည့်သွင်းပေးသွားမည်ဖြစ်ပြီး၊ ထိုစာရင်းတွင် ပါဝင်နိုင်ရေးအတွက် ၂၀၂၆ ခုနှစ် မတ်လ ၃၁ ရက်နေ့ မတိုင်မီ ဆက်သွယ်ရေးကွန်ရက်များဖြစ်သည့် MPT၊ ATOM၊ Ooredoo နှင့် Mytel တို့၏ SIM ကဒ်များ ထည့်သွင်း၍ ဖွင့်လှစ်အသုံးပြုထားရန် လိုအပ်ကြောင်း ထုတ်ပြန်ထားသည်။
ထို့ပြင် ပြည်ပမှ မိုဘိုင်းလက်ကိုင်ဖုန်းများနှင့် ဆက်သွယ်ရေးပစ္စည်းများကို တင်သွင်းလိုသည့် ကုမ္ပဏီများအနေဖြင့် သတ်မှတ်လုပ်ထုံးလုပ်နည်းများအတိုင်း ဆောင်ရွက်ရမည်ဖြစ်ပြီး ကျသင့်အခွန်များ ပေးဆောင်ပြီးပါက CEIR စနစ်၏ ခွင့်ပြုစာရင်းတွင် ထည့်သွင်းပေးသွားမည်ဖြစ်ကြောင်း သိရသည်။
၂၀၂၆ ခုနှစ် ဧပြီလ ၁ ရက်နေ့မှ စတင်၍ CEIR ခွင့်ပြုစာရင်းတွင် မပါရှိသည့် မိုဘိုင်းဖုန်းများကို မိုဘိုင်းကွန်ရက်များနှင့် ချိတ်ဆက်အသုံးပြုချိန်မှစ၍ ရက်ပေါင်း ၃၀ အတွင်း ယာယီအသုံးပြုခွင့်သာ ရရှိမည်ဖြစ်ပြီး ယင်းကာလအတွင်း ကျသင့်အခွန်နှင့် ဒဏ်ကြေးများ ပေးဆောင်ပြီးမှသာ ဆက်လက်အသုံးပြုနိုင်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
အသုံးပြုသူများအနေဖြင့် မိမိတို့၏ မိုဘိုင်းဖုန်း IMEI နံပါတ်ကို CEIR ဝက်ဘ်ဆိုက်ဖြစ်သည့် www.ceir.gov.mm တွင် ထည့်သွင်းစစ်ဆေးနိုင်ပြီး အီလက်ထရောနစ်ငွေပေးချေမှု နည်းလမ်းများဖြင့် ကျသင့်အခွန်နှင့် ဒဏ်ကြေးများကို ပေးဆောင်နိုင်မည်ဖြစ်သည်။
ထို့အပြင် နယ်စပ်ဒေသများနှင့် အင်တာနက်ရရှိရန်ခက်ခဲသည့် ဒေသများရှိ ပြည်သူများအတွက် ပြည်တွင်းအခွန်များဦးစီးဌာနရုံးများနှင့် အကောက်ခွန်ဦးစီးဌာနရုံးများတွင်လည်း ကျသင့်အခွန်နှင့် ဒဏ်ကြေးများကို ပေးဆောင်နိုင်မည်ဖြစ်ကြောင်း သိရသည်။
အသေးစိတ်သိရှိလိုပါက CEIR ဝက်ဘ်ဆိုက်တွင် ကြည့်ရှုနိုင်ပြီး CEIR Call Center နံပါတ်များဖြစ်သည့် ၁၅၇၇ နှင့် ၁၇၅၅ သို့ ရုံးချိန်အတွင်း ဆက်သွယ်မေးမြန်းနိုင်ကြောင်း သိရသည်။