(၁၉)ကြိမ်မြောက် ဘင်းမ်စတက် နိုင်ငံခြားရေးဝန်ကြီးများအစည်းအဝေးကို မတ် ၉ ရက်မွန်းလွဲ ၂ နာရီခွဲက ဗွီဒီယိုကွန်ဖရင့်စနစ်ဖြင့်ကျင်းပရာ ဘင်းမ်စတက်အလှည့်ကျဥက္ကဋ္ဌ ထိုင်းနိုင်ငံ ဒု-ဝန်ကြီးချုပ်နှင့်နိုင်ငံခြားရေးဝန်ကြီး မစ္စတာဒွန်ပရာမွတ်(ဒ်)ဝီနိုင်းက သဘာပတိအဖြစ်ဆောင်ရွက်ခဲ့သည်။
ဘင်းမ်စတက်လယ်ယာစိုက်ပျိုးရေးနှင့်စားနပ်ရိက္ခာဖူလုံရေးကဏ္ဍ၏ ဦးဆောင်နိုင်ငံအဖြစ် တာဝန်ယူထားသည့် မြန်မာနိုင်ငံက ဘင်းမ်စတက်အတွင်းရေးမှူးရုံးနှင့်ညှိနှိုင်း၍ ဘင်းမ်စတက်လယ်ယာစိုက်ပျိုးရေးပူးပေါင်းဆောင်ရွက်မှုလုပ်ငန်းစီမံချက်(၂၀၂၃-၂၀၂၇)ပြုစုရေးဆွဲခဲ့ပြီး ၂၀၂၂ ခုနှစ်၊နိုဝင်ဘာ ၁၀ ရက်က ဒုတိယအကြိမ် ဘင်းမ်စတက် စိုက်ပျိုးရေးဝန်ကြီးများ အစည်းအဝေးတွင်အတည်ပြုနိုင်ခဲ့သည်ဟု ဒု-ဝန်ကြီးဦးကျော်မျိုးထွဋ်ကပြောသည်။
ဘင်းမ်စတက်ဒေသတွင်း စားနပ်ရိက္ခာဖူလုံရေးအတွက် နည်းလမ်းများရှာဖွေဖော်ထုတ်ရန် ၂၀၂၃ ခုနှစ်၊ဇန်နဝါရီလအတွင်းက မြန်မာနိုင်ငံမှ ဦးဆောင်၍ “ဘင်းမ်စတက်စားနပ်ရိက္ခာဖူလုံရေးနှင့် ရေရှည်တည်တံ့သည့် စားနပ်ရိက္ခာစနစ်များဆိုင်ရာ ဒေသတွင်းဆွေးနွေးပွဲ”ကျင်းပခဲ့သည်ဟု ပြောသည်။
“ဘင်းမ်စတက်မူဘောင်အောက်မှာရှိတဲ့ ကတိကဝတ်တွေနဲ့ပူးပေါင်းဆောင်ရွက်မှုတွေကို တိုးမြှင့်သွားဖို့လိုအပ်သလို ဘင်းမ်စတက်ပဋိညာဉ်စာတမ်းမှာ ပြဋ္ဌာန်းထားသည့် အခြေခံမူတွေကို ဘင်းမ်စတက်အဖွဲ့ဝင်နိုင်ငံအားလုံးက အလေးထားလိုက်နာကျင့်သုံးဖို့လိုပါတယ်”ဟု ဒု-ဝန်ကြီးဦးကျော်မျိုးထွဋ်ကပြောသည်။
အစည်းအဝေးတွင် ၂၀၂၃ ခုနှစ်၊မတ် ၈ ရက်က ထိုင်းနိုင်ငံမှ ဗွီဒီယိုကွန်ဖရင့်စနစ်ဖြင့် ကျင်းပခဲ့သည့် (၂၃)ကြိမ်မြောက် ဘင်းမ်စတက်အဆင့်မြင့်အရာရှိကြီးများ အစည်းအဝေးအစီရင်ခံစာအား ဆွေးနွေးအတည်ပြုခဲ့ကြပြီး (၁၉)ကြိမ်မြောက် ဘင်းမ်စတက် နိုင်ငံခြားရေးဝန်ကြီးများ အစည်းအဝေး၏ ပူးတွဲထုတ်ပြန်ချက်ကို အဖွဲ့ဝင်နိုင်ငံအားလုံး၏ တူညီဆန္ဒဖြင့် အတည်ပြုခဲ့သည်။
အစည်းအဝေးသို့ ဘင်းမ်စတက်အဖွဲ့ဝင်နိုင်ငံများဖြစ်သည့် ဘင်္ဂလားဒေ့ရှ်၊ ဘူတန်၊ အိန္ဒိယ၊ နီပေါနှင့် သီရိလင်္ကာနိုင်ငံတို့မှ နိုင်ငံခြားရေးဝန်ကြီးများ/ဒု-ဝန်ကြီးများနှင့်ဘင်းမ်စတက်အတွင်းရေးမှူးချုပ်တို့တက်ရောက်ခဲ့ကြသည်။
