ကချင်ပြည်နယ်၊ မြစ်ကြီးနားမြို့ရှိ ဧရာဝတီမြစ်ရေမှာ ယနေ့ ဇွန်(၂)ရက် နံနက် (၁၀)နာရီခွဲ နောက်ပိုင်းအချိန်၌ ပြန်လည်ကျဆင်းလာပြီဖြစ်သည်ဟု မြစ်ကြီးနားမြို့ မိုးလေဝသနှင့် ဇလဗေဒဦးစီးဌာန တာဝန်ရှိသူတစ်ဦးထံက သိရသည်။
ယနေ့ နံနက်ပိုင်း (၄)နာရီအချိန်တွင် မြစ်ကြီးနားမြို့ဧရာဝတီမြစ်ရေမှာ အတက်အကျမရှိဘဲ ငြိမ်သက်နေရာမှ နံနက် (၁၀)နာရီခွဲဝန်းကျင်တွင် (၅)စင်တီမီတာခန့် ပြန်လည်ကျဆင်းလာခြင်းဖြစ် ကြောင်း ဆိုသည်။
“ရေစကျပြီလို့ ပြောလို့ရပါတယ်။ စကျကျခြင်းမှာ အကျတော့နှေးမှာပါ။ နာရီဝက်အတွင်းမှာ ငါးစင်တီမီတာလောက် ကျတယ်ဆိုရင် မဆိုးပါဘူး၊ တစ်နာရီကို တစ်ဆယ်စင်တီမီတာလောက်သွားမယ့်သဘောရှိတယ်။ ဘယ်လောက်ဆက်ကျမလဲဆိုတာ ကျွန်တော့်တို့ ဆက်ကြည့်နေ
ပါတယ်။ ရေကျတာတော့သေချာသွားပါပြီ”၎င်းက ပြောကြားသည်။
မြစ်ကြီးနားမြို့တွင် ယမန်နေ့ ဇွန် (၁) ရက် နံနက် (၆) နာရီခန့်မှစတင်၍ မိုးသည်းထန်စွာ ရွာသွန်းပြီးနောက်ဧရာဝတီမြစ်ရေမြင့်တက်ကာ မြေနိမ့်ပိုင်းရပ်ကွက်များအတွင်းသို့ ရေဝင်ရောက်မှုများဖြစ်ပေါ်ခဲ့ပြီး ဒေသခံရေဘေးသင့်သူများ ညပိုင်းအထိ ကယ်ဆယ်ရွှေ့ပြောင်းမှုများပြု လုပ်ခဲ့ရသည်။
ယမန်နေ့က ဧရာဝတီမြစ်ရေမှာ စိုးရိမ်ရေမှတ် (၁,၁၀၅)စင်တီမီတာအထက် (၁,၁၂၀)စင်တီမီတာသို့ ရောက်ရှိနေရာမှ ပြန်လည်ကျဆင်းနေခြင်းလည်းဖြစ်သည်။