မူးယစ်ဆေးဝါးထုတ်လုပ်ရာတွင်အသုံးပြုသည့် အစပျိုးဓာတုပစ္စည်းများသည် ပြည်တွင်းထွက်ကုန်မဟုတ်ဘဲ ပြည်ပမှမှောင်ခိုတင်သွင်းလာခြင်းဖြစ်သည်ဟု ဩစတြီးယားနိုင်ငံ၊ ဗီယင်နာမြို့အခြေစိုက် ကုလသမဂ္ဂနှင့် အခြားနိုင်ငံတကာအဖွဲ့အစည်းများဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီးဦးမင်းသိမ်းက ပြောသည်။
ဖေဖော်ဝါရီ ၂ ရက်ကကျင်းပသည့် အပြည်ပြည်ဆိုင် ရာမူးယစ်ဆေးဝါးထိန်းချုပ်ရေးဘုတ်အဖွဲ့မှ မကြာမီထုတ်ဝေမည့် ၂၀၂၅ ခုနှစ်အတွက် နှစ်စဉ်အစီရင်ခံစာနှင့် အစပျိုးဓာတုပစ္စည်းဆိုင်ရာအစီရင်ခံစာများနှင့်ပတ်သက်သည့် ရှင်းလင်းပွဲတွင်ပြောကြားခဲ့ခြင်းဖြစ်သည်။
ထိုသို့ ပြည်ပမှ မှောင်ခိုတင်သွင်းလာခြင်းဖြစ်၍ ယင်းထောက်ပံ့ရေးလမ်းကြောင်းများကို ဖြတ်တောက်ရန်အ ရေးကြီးကာ မူးယစ်ဆေးဝါးတိုက်ဖျက်ရေးလုပ်ငန်းများအား INCB၊ UNODC နှင့် အခြားသက်ဆိုင်ရာ မိတ်ဖက်အဖွဲ့အစည်းများနှင့် ဆက်လက်ပူးပေါင်းဆောင် ရွက်သွားမည်ဟု ပြောသည်။
ထို့ပြင် မြန်မာအမြဲတမ်းကိုယ်စားလှယ်က ထိန်းချုပ်ဓာတုပစ္စည်းများလမ်းလွှဲတင်သွင်းမှုကို ထိရောက်စွာတားဆီးနိုင်ရန် “ဆိပ်ကမ်းတစ်ခုတည်းမှ ဝင်/ထွက်ခွင့်ပြုသည့်စနစ်”ကျင့်သုံးနေမှု၊ ၂၀၂၆ ခုနှစ်၊ ဇန်နဝါရီလတွင် ရှမ်းပြည်နယ်မြောက်ပိုင်း၊ မိုင်းရယ်မြို့နယ်အနီး၌ မူးယစ်ဆေးဝါးနှိမ်နှင်းရေး အထူးစစ်ဆင်ရေးများပြုလုပ်ခဲ့ရာ၌ အကြီးမားဆုံးမူးယစ်ဆေးဝါးထုတ်လုပ်သည့် နေရာများရှာဖွေဖော်ထုတ်နိုင်ခဲ့မှုတို့ကို ရှင်းလင်းပြောကြားသည်။
ထို့အတူ ဒေသတွင်းနှင့် နိုင်ငံတကာအဆင့် မူးယစ်ဆေးဝါးတားဆီးနှိမ်နင်းရေးလုပ်ငန်းများ အရှိန်အဟုန်မြှင့် ပူးပေါင်းဆောင်ရွက်နေမှု၊ စိန်ခေါ်မှုများစွာရှိနေမှုတို့ကိုလည်းရှင်းလင်းပြောကြားခဲ့သည်။