မြန်မာ့တပ်မတော်နှင့် မြောက်ပိုင်းအဖွဲ့များ တိုက်ပွဲဖြစ်ပွားနေသည့်အတွက် (၁၀၅)မိုင် ကုန်သွယ်ရေးဇုန်အနီးတွင် ပိတ်မိနေသူများကို မူဆယ်အခြေစိုက် ပရဟိတအသင်းများမှ ယနေ့ နိုဝင်ဘာ (၃၀) ရက် နံနက်ပိုင်းမှ စတင်ကာ ကယ်ထုတ်ပေးနေကြောင်း သိရသည်။
ပြီးခဲ့သည့် ရက်ပိုင်းက စတင်ကာ နှစ်ဘက်တိုက်ပွဲများ ပြင်းထန်နေသည့်အတွက် ၁၀၅ မိုင် ကုန်သွယ်ရေးစခန်းနှင့် အနီးပတ်ဝန်းကျင်တွင် ဒေသခံပြည်သူ ထောင်နှင့်ချီ ပိတ်မိနေခြင်းဖြစ်ကြောင်း မူဆယ်အခြေစိုက် ပရဟိတအသင်းများထံမှ စုံစမ်းသိရသည်။
ယင်းကဲ့သို့ ပိတ်မိနေသည့် ပြည်သူများကို ယနေ့ နံနက် (၈) နာရီဝန်းကျင်မှ စတင်ကာ သွားရောက်ကယ်ထုတ်ပေးနေပြီး လက်ရှိအချိန်ထိ ပိတ်မိနေသည့် ပြည်သူ (၄၀၀) ဝန်းကျင်ကို ကယ်ထုတ်ထားနိုင်ကြောင်း မူဆယ်အခြေစိုက် ကမ်းလက်လူမှုကူညီရေးအသင်းထံမှ သိရသည်။
” ကယ်ဆယ်ရေးကား (၁၅) စီးလောက်သွားတယ်ခင်ဗျ။ ပထမတစ်ခေါက် ပြန်ဆင်းလာပြီးပြီ ၊ အခု နောက်တစ်ခေါက်လည်း ပြန်ဆင်းလာနေပြီ။ တစ်ခေါက်ကို လူ (၂၀၀) နီးပါးလောက်ပါတယ်။ တစ်နေ့လုံး တိုက်ရမှာပါဗျ။ လူကတော့ ထောင်ချီတယ်ဗျ” ဟု ကမ်းလက် လူမှုကူညီရေး အသင်းမှ တာဝန်ရှိသူတစ်ဦးက ပေါ်ပြူလာနယူးစ်သို့ ပြောသည်။
လက်ရှိတွင် ပိတ်မိနေသူများထဲမှ မိမိအစီအစဉ် (ဆိုင်ကယ်/ အိမ်စီးကား)ဖြင့် မူဆယ်ဘက်သို့ လာရောက်နေသူများလည်း ရှိနေပြီး ၁၀၅ မိုင် ကုန်သွယ်ရေးဇုန်အတွင်း ပိတ်မိနေသူ အမြောက်အများ ကျန်ရှိနေသေးကြောင်း ပရဟိတအသင်းများထံမှ သိရသည်။
ယနေ့နံနက်ပိုင်းတွင် ၁၀၅ မိုင် ကုန်သွယ်ရေးဇုန်တွင် တိုက်ပွဲ ဖြစ်ပွားခြင်း မရှိသော်လည်း ဒရုန်းများ ပျံဝဲနေသည်ကို တွေ့ရသည့်အတွက် လုံခြုံရေးအခြေအနေကို ကြည့်၍ ကယ်ထုတ်နေရကြောင်းလည်း ပရဟိတအဖွဲ့များက ဆိုသည်။
” ကျွန်တော်တို့ သွားတည်းက တပ်ဂိတ်ဖြတ်ရတယ်ဗျာ။ ပူးပေါင်းအဖွဲ့တွေကိုလည်း ဖြတ်ရတယ်။ ကျွန်တော်တို့လည်း အသက်စွန့်ပြီး သွားနေရတာ ။ ၁၀၅ မိုင်က ကုန်သွယ်ရေးဇုန်မှာ ပူးပေါင်းအဖွဲ့တွေက ပစ်ခတ်တာတော့ မရှိဘူး။ ဒါပေမဲ့ ကားတွေ ပေးမဖြတ်ဘူး။ သူတို့ပိတ်ထားတဲ့ အပေါ် ဂိုဒေါင်းဝင်းတွေထဲမှာ စစ်ရှောင်ချင်တဲ့သူတွေများတယ်။ ဒါပေမဲ့ ကျွန်တော်တို့တွေ ကျော်လို့မရတော့ သယ်လို့မရဘူးဖြစ်နေတယ်ဗျ” ဟု ကယ်ဆယ်ရေးသွားရောက်လုပ်ဆောင်နေသည့် ကမ်းလက်လူမှုကူညီရေးအသင်းမှ တာဝန်ရှိသူတစ်ဦးက ပြောသည်။
မူဆယ်မှ ၁၀၅ မိုင်ကုန်သွယ်ရေး စခန်းသို့ သွားရောက်ရာတွင် အစစ်အဆေးများ ရှိနေပြီး စစ်ဘေးရှောင်များကိုလည်း မှတ်ပုံတင်မရှိပါက ခေါ်မလာရန် လမ်းရှိ စစ်တပ်ဂိတ်များက မှာကြားထားကြောင်းလည်း သိရသည်။
မူဆယ်မြို့ အနီးတဝိုက်နှင့် ၁၀၅ မိုင် ကုန်သွယ်ရေးဇုန် အနီးရှိ တပ်မတော် ဗျူဟာကုန်းနှင့် နမ့်ပေါ်တံတားရှိ စစ်တပ်စခန်းကို မြောက်ပိုင်း မဟာမိတ် (၃) ဖွဲ့က ပြီးခဲ့သည့် ရက်ပိုင်းအတွင်းက စတင်တိုက်ခိုက်နေခြင်း ဖြစ်ပြီး တပ်မတော်မှလည်း လေကြောင်းနှင့် မြေပြင်မှပါ ပြန်လည် တိုက်ခိုက်လျက် ရှိနေခြင်းဖြစ်သည်။
အဆိုပါ တိုက်ပွဲများအတွင်း အရပ်သား ပြည်သူ (၆) ဦးထက်မနည်း ေ-သဆုံးခဲ့ပြီး ထိခိုက်ဒဏ်ရာရှိမှုနှင့် ပြည်သူပိုင်အဆောက်အဦအချို့နှင့် ကုန်သွယ်ရေးစခန်းအတွင်းရှိ အဆောက်အဦအချို့ ထိခိုက်ပျက်စီးမှုများ ရှိနေကြောင်း သိရသည်။
