မူဆယ်ခရိုင်ပြင်ပ သန်းခေါင်စာရင်း ကိုင်ဆောင်သူများ တရုတ်ပြည်အတွင်း ဝင်ထွက်ခွင့်ရရန် နှစ်နိုင်ငံတာဝန်ရှိသူများ ဆွေးနွေးနေ

မူဆယ်ခရိုင်ပြင်ပ နေထိုင်သူများပါ တရုတ် – မြန်မာ နယ်စပ်ဂိတ်များမှတဆင့် တရုတ်နိုင်ငံဘက်အခြမ်းသို့ ဝင်ထွက်ခွင့်ရရန် နှစ်နိုင်ငံ တာဝန်ရှိသူများ ဆွေးနွေးနေကြောင်း သိရသည်။

တရုတ် – မြန်မာ နယ်စပ် ရွှေလီနှင့် ကျယ်ခေါင်မြို့များသို့ မြန်မာဘက်ခြမ်းမှ သွားရောက်အလုပ်လုပ်ကိုင်လိုသည့် ရွှေ့ပြောင်းလုပ်သားများအား နယ်စပ်ဖြတ်ကျော်ခွင့် ယာယီနိုင်ငံကူးလက်မှတ်ဖြင့် ဝင်ထွက်ခွင့်ပြုနိုင်ရေး မူဆယ်ခရိုင် တာဝန်ရှိသူများနှင့် တရုတ်နိုင်ငံ ဒေသအာဏာပိုင်များအကြားဆွေးနွေးနေ‌ခြင်းဖြစ်ကြောင်း ဒေသခံများထံမှ သိရသည်။

” လောလောဆယ်တော့ မူဆယ်ခရိုင်ထဲက အိမ်ထောင်စုဇယားရှိသူတွေပဲ ဝင်လို့ရသေးတယ်။ နှစ်နိုင်ငံ ဆွေးနွေးတုန်းပေါ့ ။ ဘာမှတော့ မထူးခြားသေးဘူး ။ ဆွေးနွေးနေဆဲအဆင့်ပဲ ရှိသေးတာပေါ့”ဟု မူဆယ်အခြေစိုက်လူသားချင်းစာနာထောက်ထားမှုအကူညီပေးရေးကွန်ရက် ဒုဥက္ကဋ္ဌ ဦးစိန်လှအောင်က ပေါ်ပြူလာနယူး(စ်)သို့ပြောသည်။

ပြီးခဲ့သည့် ဖေဖေါ်ဝါရီလ (၆) ရက်က တရုတ်ဒေသဆိုင်ရာ အာဏာပိုင်များနှင့် မူဆယ်ခရိုင်တာဝန်ရှိသူများအကြားအွန်လိုင်းမှတဆင့် တွေ့ဆုံဆွေးနွေးခဲ့ခြင်းဖြစ်ကြောင်း သိရသည်။

အဆိုပါ တွေ့ဆုံဆွေးနွေးမှုတွင် မူဆယ်ခရိုင်ပြင်ပ အိမ်ထောင်စု ဇယားကိုင်ဆောင်သူများအား နယ်စပ်ဖြတ်ကျော်ခွင့် ယာယီနိုင်ငံကူးလက်မှတ်(BP)ဖြင့် ဖြတ်ကျော် ဝင်ရောက်ခွင့်ပြုရန်၊ ကျင်စန်းကျော့ဂိတ်ရှိ ကုန်တင်ယာဉ် မောင်နှင်သူများအား ယာယီနိုင်ငံကူးလက်မှတ်(BP)ဖြင့် တရုတ်နိုင်ငံအတွင်း ဖြတ်ကျော်မောင်းနှင်ခွင့်ပြုရန် ၊ တရားဝင်ခွင့်ပြုချက်ဖြင့် ဝင်ရောက်သူများအား တရုတ် အာဏာပိုင်များအနေဖြင့် နိုင်ငံသားစိစစ်ရေးကတ် စစ်ဆေးခြင်းများ မပြုလုပ်ရန် စသည့်အချက်များကို ဆွေးနွေးခဲ့ကြောင်း သိရသည်။

လက်ရှိတွင် တရုတ်အစိုးရအနေဖြင့် ပြီးခဲ့သည့် ဇန်နဝါရီ လဆန်းပိုင်းကပင် စတင်ကာ နှစ်နိုင်ငံ နယ်စပ်ဂိတ်များအား ပြန်လည်ဖွင့်လှစ်ပေးထားသော်လည်း မြန်မာအာဏာပိုင်များမှ ကိုဗစ်အကြောင်းပြချက်ဖြင့် နှစ်နိုင်ငံ နယ် စပ်ဖြတ်ကျော် ဝင်ရောက်ခွင့်ကို ကန့်သတ်ထားခြင်း ဖြစ်သည်။

အဆိုပါ ကန့်သတ်ချက်များအရ မူဆယ်ခရိုင်အတွင်း အိမ်ထောင်စု ဇယားကိုင်ဆောင်သူများကိုသာ ယာယီနိုင်ငံကူးလက်မှတ်များထုတ်ပေးကာ တရုတ်နိုင်ငံဘက်ခြမ်းသို့ ထွက်ခွာခွင့်ပြုထားပြီး တရုတ် – မြန်မာ ဗဟိုအစိုးရချင်း နားလည်မှုဖြင့် ပြန်လည်ဝင်ရောက်မည့် နေရပ်ပြန်များကိုသာ မြန်မာဘက်ခြမ်းသို့ ဝင်ရောက်ခွင့်ပြုထားကြောင်း သိရသည်။

လက်ရှိတွင် တရုတ် – မြန်မာ နယ်စပ်ဂိတ်ဖြစ်သည့် နန်းတော်ဂိတ်မှတဆင့် ရှမ်းပြည်နယ်မြောက်ပိုင်း မူဆယ်ခရိုင်အတွင်း နေထိုင်သည့် အိမ်ထောင်စုဇယားရှိသူများကို တရုတ်နိုင်ငံအတွင်းသို့ ဝင်ရောက်ခွင့် ပြုထားပြီး အခြားမြို့နယ်များမှ ရွှေ့ပြောင်း လုပ်သား အများစုမှာ မူဆယ်မြို့တွင်ပိတ်မိနေဆဲ ဖြစ်ကြောင်း သိရသည်။