ရခိုင်ပြည်နယ်၊ ကျောက်ဖြူမြို့နယ် မဒေးကျွန်းရှိ မုန်တိုင်းဒဏ်သင့် စာသင်ကျောင်းနှင့် ဆေးပေးခန်းအတွက် လိုအပ်သည့် အထောက်အကူပစ္စည်းများကို CNPC ကုမ္ပဏီက လှူဒါန်းခဲ့ပြီး၊ ပျက်စီးနေသည်တို့ကို ပြန်လည်ပြုပြင်မွမ်းမံပေးခဲ့ကြောင်း ယင်းကုမ္ပဏီထံမှ သိရသည်။
ထိုသို့လှူဒါန်းခဲ့ရာတွင် မေလ၂၄ရက်နေ့၌ ဆန်၊ ဆီ၊ မိုးကာအင်္ကျီ၊ မိုးကာဖိနပ်၊ ထီးများနှင့် အရေးပေါ်မီးသီးများ အစရှိသည့် ပစ္စည်းများကိုဆေးခန်းနှင့် စာသင်ကျောင်းတို့မှ တာဝန်ရှိသူများထံသို့ CNPC ကုမ္ပဏီ၏ Made Island Operation Center က လွှဲပြောင်းပေးအပ်လှူဒါန်းခဲ့သည်။ ထို့အပြင် ပျက်စီးသွားသော နေအိမ်များကို ပြုပြင်ရန်အတွက် ကုမ္ပဏီမှ ဆောက်လုပ်ရေးအဖွဲ့တစ်ဖွဲ့ ဖွဲ့စည်းခဲ့ပြီး ပြန်လည်ပြုပြင်မွမ်းမံမှုများပြုလုပ်ပေးခဲ့ကြောင်း သိရသည်။
ကုမ္ပဏီအနေဖြင့် တတ်နိုင်သမျှ ဆက်လက်ထောက်ပံ့ကူညီပေးသွားမည်ဖြစ်ကြောင်းနှင့် မုန်တိုင်းဒဏ်သင့်ပြည်သူများ ပုံမှန်အတိုင်းသို့ အမြန်ဆုံး ပြန်လည်ရောက်ရှိစေရန် ဆုတောင်းပေးလျှက်ရှိကြောင်း ကုမ္ပဏီမှ ပြောသည်။
မေလ၁၄ရက်နေ့ နေ့လယ်ခန့်မှစတင်၍ အင်အား အလွန့်အလွန်ကောင်းသော စူပါဆိုင်ကလုန်းမုန်တိုင်း “မိုခါ” သည် မြန်မာနိုင်ငံအနောက်ဘက်ခြမ်း ရခိုင်ပြည်နယ် စစ်တွေ၊ ကျောက်ဖြူ စသည့်ဒေသများသို့ တိုက်ခတ်ခဲ့သည်။ မုန်တိုင်း၏ အမြင့်ဆုံးလေတိုက်နှုန်းမှာ တစ်နာရီလျှင် ၂၀၉ ကီလိုမီတာမှ ၂၂၀ ကီလိုမီတာအထိရှိခဲ့သဖြင့် မုန်တိုင်းဒဏ်သင့်ဒေသများတွင် ထိခိုက်ပျက်စီးမှုများစွာဖြစ်ပေါ်ခဲ့သည်။
လက်ရှိအချိန်ထိ CNPC ကုမ္ပဏီသည် မြန်မာနိုင်ငံတွင် စုစုပေါင်း အမေရိကန်ဒေါ်လာ ၂၉ ဒသမ ၂၈၈၂သန်းကို အသုံးပြုကာ ပညာရေး၊ ကျန်းမာရေး၊ လမ်းပန်းဆက်သွယ်ရေး၊ ရေပေးဝေရေး၊ လျှပ်စစ်မီးရရှိရေးစသည့် ကဏ္ဍများတွင် လူမှုအကျိုးပြုလုပ်ငန်းပေါင်း ၃၃၄ ခု အကောင်အထည်ဖော်ဆောင်ရွက်ခဲ့ပြီး၊ ရခိုင်ပြည်နယ်တစ်ခုထဲတွင်ပင် လူမှုအကျိုးပြုလုပ်ငန်းပေါင်း ၁၁၂ ခု ဆောင်ရွက်ခဲ့သည်။ မုန်တိုင်းတိုက်ခတ်ခြင်း၊ ရေကြီးခြင်း၊ ငလျင်လှုပ်ခြင်းစသည့် သဘာဝဘေးဒဏ်သင့်ဒေသခံများအတွက် အလှူငွေနှင့် ပစ္စည်းများကိုလည်း လှူဒါန်းခဲ့သည်။ သဘာဝဘေးအန္တရာယ်ဆိုင်ရာ ကယ်ဆယ်ရေးလုပ်ငန်းပေါင်း ၂၄ ခုအတွက် စုစုပေါင်း အမေရိကန်ဒေါ်လာ ၅၀၀၀၀၀ ခန့် လှူဒါန်းခဲ့ပြီးဖြစ်ကြောင်း သိရသည်။
