ယနေ့ ဒီဇင်ဘာ ၅ ရက်တွင် ရန်ကုန်တိုင်းဒေသကြီးမီးသတ်ဦးစီးဌာန၏ လမ်းညွှန်ဦးဆောင်မှုဖြင့် မီးသတ်ဦးစီးဌာနနှင့် Times City Complex ဝန်ထမ်းများမှ မီးဘေးလုံခြုံရေးနှင့် ဘေးအန္တရာယ်လွတ်မြောက်ရေး ပူးပေါင်းလေ့ကျင့်ခြင်း (Fire Safety Drill) ကို နံနက် ၁၀ နာရီ၌ Times City Jewellery Mall ရှေ့တွင် လက်တွေ့သရုပ်ပြ လေ့ကျင့်ဆောင်ရွက်ခဲ့သည်။
အဆိုပါ လက်တွေ့သရုပ်ပြ လေ့ကျင့်မှုကို မီးသတ်ဌာနချုပ်မှ INSARAG medium Team တပ်ဖွဲ့ဝင်များနှင့် ကယ်ဆယ်ရေးအတွက် အထူးလေ့ကျင့်ထားသည့် ကယ်ဆယ်ရေးတပ်ဖွဲ့ဝင်များ အပါအဝင် သက်ဆိုင်ရာနယ်မြေအသီးသီးမှ မီးသတ်တပ်ဖွဲ့ဝင်များ စုစုပေါင်းတပ်ဖွဲ့ဝင် အင်အား ၂၁၀ ဖြင့် ပါဝင်ဆောင်ရွက်ခဲ့ခြင်းဖြစ်ကြောင်း သိရသည်။
ယာဉ်စက်အင်အားအနေဖြင့် 48 Platform ယာဉ် ၂ စီး၊ LUF 60 ၄ စီး၊ LUF Nano ၃ စီး၊ Firefighting၊ Water Bowser ရေသယ်ယာဉ်နှင့် တိုင်းဒေသကြီးအစိုးရအဖွဲ့မှ ဖြည့်ဆည်းပေးထားသော လူနာတင်ယာဉ်ကားများဖြင့် ပူးပေါင်းဆောင်ရွက်ခဲ့သည်။
အဆိုပါ လေ့ကျင့်ဆောင်ရွက်မှုနှင့်ပတ်သက်ပြီး ရန်ကုန်တိုင်းဒေသကြီး မီးသတ်ဦးစီးမှူးရုံးမှ ညွှန်ကြားရေးမှူး ဦးမင်းစမ်းအေးက “မီးဘေးလုံခြုံရေးနဲ့လုပ်ငန်းစဉ်တွေကိုဆောင်ရွက်တဲ့အခါ ကျွန်တော်တို့ရဲ့ရည်မှန်းချက်တာဝန်(၄)ရပ်ဖြစ်တဲ့ မီးဘေးလုံခြုံရေး၊ ရှာဖွေကယ်ဆယ်ရေး၊ မီးငြှိမ်းသတ်ရေးနဲ့ ပြည်သူ့အကျိုးပြုလုပ်ငန်းများဆောင်ရွက်ရေးဆိုတဲ့ ရည်မှန်းချက်တွေကို အကောင်အထည်ဖော်ဆောင်ရွက်ခြင်းဖြစ်ပါတယ်။ နှစ်စဉ်နှစ်တိုင်း အထပ်မြင့်အဆောက်အဦး မီးငြှိမ်းသတ်ရေးလုပ်ငန်းစဉ်တွေကို စဉ်ဆက်မပြတ် လေ့ကျင့်ဆောင်ရွက်လျက်ရှိပါတယ်ဟု ပြောသည်။
ဒါ့အပြင် မီးသတ်တပ်ဖွဲ့သည် မီးငြှိမ်းသတ်ရေးနှင့် ရှာဖွေကယ်ဆယ်ရေးမှာ အဓိကလုပ်ငန်းစဉ်တွေဖြစ်သဖြင့် ပြည်သူများအနေဖြင့်လည်း သဘာဝဘေးအန္တရာယ်တွေဖြစ်ပေါ်လာပါက 191 Report ကို အမြဲတမ်းဆက်သွယ်ဆောင်ရွက်သတင်းပေးပါဟု ထပ်လောင်းပြောကြားခဲ့သည်။