အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) ဥက္ကဋ္ဌ ဒုတိယဗိုလ်ချုပ်ကြီး ရာပြည့် ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့သည် ဇွန် ၁၇ ရက်က ရှမ်းပြည်နယ်အရှေ့ပိုင်းရှိ မိုင်းလား အထူးဒေသ(၄)သို့ သွားရောက်ခဲ့ကြောင်း သိရသည်။
ခရီးစဉ်အတွင်း NSPNC ကိုယ်စားလှယ်အဖွဲ့သည် အထူးဒေသ(၄) ငြိမ်းချမ်းရေးနှင့် စည်းလုံးရေးကော်မတီ ဥက္ကဋ္ဌ ဦးထိန်လင်းနှင့် တာဝန်ရှိသူများအား တွေ့ဆုံခဲ့ပြီး အပြန်အလှန်နားလည်ယုံကြည်မှု တိုးမြှင့်ရေး၊ ငြိမ်းချမ်းရေးလုပ်ငန်းစဉ်များ မြှင့်တင်ရေး၊ ပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေး၊ မူးယစ်ဆေးဝါးတိုက်ဖျက်ရေးနှင့် အစားထိုးသီးနှံစိုက်ပျိုးရေးလုပ်ငန်းများအပြင် ပညာရေး၊ ကျန်းမာရေးနှင့် ယဉ်ကျေးမှုကဏ္ဍများဆိုင်ရာ ကိစ္စရပ်များကို ဆွေးနွေးခဲ့ကြကြောင်း သိရသည်။
ဒုတိယဗိုလ်ချုပ်ကြီး ရာပြည့်က အစိုးရသစ်အနေဖြင့် ငြိမ်းချမ်းရေးဖြစ်စဉ်ကို အဓိကဦးစားပေးဆောင်ရွက်လျက်ရှိပြီး အထူးဒေသ(၄)အပါအဝင် သက်ဆိုင်ရာအဖွဲ့အစည်းများအား တွေ့ဆုံဆွေးနွေးမှုများ ပြုလုပ်ရန် ဖိတ်ခေါ်ထားကြောင်း ပြောကြားခဲ့သည်။
ထို့ပြင် အဖွဲ့အစည်းများအကြား အပြန်အလှန်နားလည်ယုံကြည်မှုများကို ပွင့်လင်းရိုးသားသော ဆွေးနွေးမှုများနှင့် ညှိနှိုင်းဆောင်ရွက်မှုများမှတစ်ဆင့် တဖြည်းဖြည်း တိုးမြှင့်တည်ဆောက်သွားမည်ဖြစ်ကြောင်းနှင့် ဒေသတွင်း တည်ငြိမ်အေးချမ်းရေးနှင့် ရေရှည်ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့သည်။
အထူးဒေသ(၄) ငြိမ်းချမ်းရေးနှင့် စည်းလုံးရေးကော်မတီ ဥက္ကဋ္ဌ ဦးထိန်လင်းကလည်း ငြိမ်းချမ်းရေး၊ အမျိုးသားပြန်လည်သင့်မြတ်ရေး၊ ဒီမိုကရေစီဖော်ဆောင်ရေး၊ ပညာရေးနှင့် စီးပွားရေးဖွံ့ဖြိုးတိုးတက်ရေးဆိုင်ရာ နိုင်ငံတော်၏ မူဝါဒများကို ထောက်ခံကြောင်း ပြောကြားခဲ့သည်။
ထို့အပြင် နိုင်ငံတော်အဆင့် ငြိမ်းချမ်းရေးလုပ်ငန်းစဉ်များတွင် အပြုသဘောဆောင်စွာ ပါဝင်ဆောင်ရွက်သွားမည်ဖြစ်ပြီး နယ်စပ်ဒေသ တည်ငြိမ်အေးချမ်းရေးနှင့် ဒေသခံတိုင်းရင်းသားပြည်သူများ၏ လူမှုဘဝဖွံ့ဖြိုးတိုးတက်ရေးအတွက် ဆက်လက်ပူးပေါင်းဆောင်ရွက်သွားမည်ဖြစ်ကြောင်း ဆွေးနွေးပြောကြားခဲ့သည်။