မိန့်ခွန်းကို တည်းဖြတ်ပြင်ဆင်မှုကြောင့် ဘီဘီစီက ဒေါ်လာ ၁၀ ဘီလီယံအထိ နစ်နာကြေးပေးရန် ဒေါ်နယ်လ် ထရမ့် တရားစွဲပြီ

၂၀၂၁ ခုနှစ်တွင် ထရမ့်ကို ထောက်ခံသူများက အမေရိကန် ကက်ပီတယ်လ် အဆောက်အအုံကို မုန်တိုင်းထန်စီးနင်းခြင်းမပြုမီ အမေရိကန်သမ္မတ ဒေါ်နယ်လ် ထရမ့် ဝါရှင်တန်၌ ပြောကြားခဲ့သည့် မိန့်ခွန်းကို ဘီဘီစီ (BBC)သတင်းဌာနမှ တည်းဖြတ်ပြင်ဆင်မှုနှင့်ပတ်သက်၍ ထရမ့်က တရားစွဲဆိုခဲ့ရာ နစ်နာကြေးအဖြစ် ဒေါ်လာ ၁၀ ဘီလီယံအထိ တောင်းဆိုထားသည်။

လွန်ခဲ့သော တစ်နှစ်ကျော်ခန့်က ထုတ်လွှင့်ခဲ့သည့် Panorama အစီအစဉ်တွင် သူ၏မိန့်ခွန်းကို ဘီဘီစီက “ရည်ရွယ်ချက်ရှိရှိ၊ အငြိုးတကြီး၊ လှည့်ဖြားသည့်သဘောဖြင့်” တည်းဖြတ်ခဲ့သည်ဟု ထရမ့်က စွပ်စွဲထားသည်။

တနင်္လာနေ့ ညနေပိုင်းက တင်သွင်းခဲ့သည့် တရားစွဲဆိုမှုတွင် ထရမ့်က အချက်နှစ်ချက်အတွက် တစ်ခုလျှင် ဒေါ်လာ ၅ ဘီလီယံစီ နစ်နာကြေး တောင်းခံခဲ့သည်။ ယင်းတို့မှာ ဘီဘီစီက ၎င်းအား အသရေဖျက်မှု ကျူးလွန်ကြောင်း စွပ်စွဲခြင်းနှင့် ဖလော်ရီဒါပြည်နယ်၏ “လှည့်ဖြားမှုနှင့် မတရားသော ကုန်သွယ်မှုလုပ်ထုံးလုပ်နည်းဥပဒေ”ကို ချိုးဖောက်ခြင်းတို့ ဖြစ်သည်။

တရားစွဲဆိုမှုနှင့်ပတ်သက်၍ ဘီဘီစီက ချက်ချင်း တုံ့ပြန်ခြင်း မရှိသေးပေ။ ယခင်ကမူ ယင်းသို့ တည်းဖြတ်မှုသည် “ဆုံးဖြတ်ချက် အမှား” ဖြစ်ကြောင်း ဝန်ခံခဲ့ပြီး ထရမ့်ကို တောင်းပန်ခဲ့သော်လည်း အသရေဖျက်မှု တောင်းဆိုရန် ဥပဒေအရ အခြေခံမရှိကြောင်းကိုမူ အခိုင်အမာ ပြောခဲ့သည်။

ဘီဘီစီ၏ ညွှန်ကြားရေးမှူးချုပ် တင်မ် ဒေးဗီး နှင့် ဘီဘီစီသတင်းဌာန အကြီးအကဲ ဒေဘိုရာ တားနက်စ် တို့သည်လည်း ဤကိစ္စကြောင့် လွန်ခဲ့သည့်လကတည်းက ရာထူးမှ နုတ်ထွက်သွားခဲ့ကြသည်။

တရားစွဲဆိုမှုကို အမေရိကန် ဖလော်ရီဒါပြည်နယ် တောင်ပိုင်းခရိုင် တရားရုံးတွင် တင်သွင်းခဲ့ခြင်း ဖြစ်သည်။