မလေးရှားဝန်ကြီးချုပ်နှင့် သက်ဆင် မြန်မာ့အရေး ဆွေးနွေး

ထိုင်းနိုင်ငံဝန်ကြီးချုပ်ဟောင်း သက်ဆင် ရှင်နာဝပ်ထရာသည် မလေးရှားဝန်ကြီးချုပ် အန်ဝါ အီဘရာဟင်နှင့် ဇိမ်ခံရွက်လှေတစ်စီးပေါ်တွင် တွေ့ဆုံခဲ့ပြီး နှစ်နိုင်ငံဆက်ဆံမှုအားကောင်း ခိုင်မာရေး၊ မြန်မာ့အကျပ်အတည်း ဖြေရှင်းရေးနှင့် ထိုင်းတောင်ပိုင်းဒေသ ငြိမ်းချမ်းမှုပြန်လည်ရရှိရေးအပါအဝင် ကိစ္စရပ်များအပေါ် ဆွေးနွေးခဲ့ကြသည်။

သက်ဆင်ကို မစ္စတာအန်ဝါ၏ အာဆီယံရေးရာ အကြံပေးအဖြစ် ခန့်အပ်ခဲ့ပြီးနောက်တွင် ယခုကဲ့သို့ တွေ့ဆုံဆွေးနွေးခဲ့ကြခြင်းဖြစ်သည်။

သောကြာနေ့က Thai Rath သတင်းစာ၏ ၇၅ နှစ်မြောက် နှစ်ပတ်လည်အခမ်းအနားကို တက်ရောက်ခဲ့ပြီးနောက် ဆွေးနွေးခဲ့ခြင်းဖြစ်သည်။ စိုက်ပျိုးရေးဝန်ကြီးဟောင်း Thamanat Prompow နှင့်အတူ ဗုဒ္ဓဟူးနေ့က ဖူးခက်မှ Satun ပြည်နယ် Koh Lipe သို့ သူ ရွက်လှေစီးခဲ့သည်ဟု သက်ဆင်က သတင်းထောက်များကို ပြောကြားခဲ့သည်။

နောက်နေ့မနက်ပိုင်းတွင် သူသည် ကျွန်းပေါ်ရှိ Bulow Casa Grand View Resort တွင် ထာမာနတ်နှင့် မနက်စာအတူစားခဲ့သည်။ ထို့နောက် သက်ဆင်သည် ရွက်လှေစီးကာ ထိုင်း-မလေးရှားရေကြောင်းနယ်နိမိတ်အနီး ပင်လယ်ပြင်တွင် မစ္စတာအန်ဝါနှင့် တွေ့ဆုံဆွေးနွေးခဲ့သည်ဟု ဆိုသည်။

အစည်းအဝေးတွင် ထိုင်းတောင်ပိုင်းအခြေအနေ၊ ထိုင်းနိုင်ငံ စီးပွားရေး၊ မြန်မာနိုင်ငံအကျပ်အတည်း၊ အာဆီယံနှင့် ကမ္ဘာ့ရေးရာများအပေါ် ဆွေးနွေးခဲ့ကြသည်ဟု သက်ဆင်က ပြောဆိုခဲ့သည်။ အာဆီယံ အဖွဲ့ဝင်နိုင်ငံများ စည်းလုံးညီညွတ်ပြီး ပိုမိုခိုင်မာသော အသိုက်အဝန်းတစ်ခုဖြစ်လာရန် လိုအပ်ကြောင်းကို သူ အလေးအနက်ပြောကြားခဲ့သည်ဟု ဆိုခဲ့သည်။

“လူဦးရေ သန်း ၇၀၀ ကျော်ရှိတဲ့ ဒီဒေသဟာ အရေးပါတဲ့ အင်အားစုတစ်ခုဖြစ်လာဖို့ အတူတကွလက်တွဲလုပ်ဆောင်ရပါမယ်” ဟု သူက ပြောဆိုသည်။

မစ္စတာအန်ဝါကလည်း သူ၏ ချစ်မိတ်ဆွေ သက်ဆင်နှင့် တွေ့ဆုံခဲ့ကာ ထိုင်းတောင်ပိုင်း ငြိမ်းချမ်းရေးးနှင့် မြန်မာအကျပ်အတည်း အပါအဝင် နှစ်နိုင်ငံနှင့် ဒေသတွင်းအရေးများကို ဆွေးနွေးခဲ့သည်ဟု X တွင် ပို့စ်တင် ပြောဆိုခဲ့သည်။

မလေးရှား၏ အာဆီယံဥက္ကဌ၏ အလွတ်သဘော အကြံပေးအဖြစ် သူ့၏ စွမ်းဆောင်ရည်အပါအဝင် ကျယ်ကျယ်ပြန့်ပြန့်နှင့် အကျိုးများသော ဆွေးနွေးမှု၊ ထိတွေ့ဆက်ဆံခဲ့ရမှုအတွက် ထိုင်းဝန်ကြီးချုပ်ဟောင်း၊ ချစ်ခင်‌သောမိတ်ဆွေ ဒေါက်တာ သက်ဆင်ရှင်နာဝပ်ထရာနှင့် တွေ့ဆုံရခြင်းကို ဝမ်းသာကြောင်း သူက ပြောကြားခဲ့သည်။

Ref: ဘန်ကောက်ပို့စ်