မြန်မာနှင့် ထိုင်း နှစ်နိုင်ငံအကြား ဖြတ်သန်းစီးဆင်းနေသည့် မယ်ဆိုင်ချောင်းနှင့် မယ်ဟုတ်ချောင်းအတွင်း သဲနှုန်းတူးဖော်ရေးလုပ်ငန်းကို ၂၀၂၅ ခုနှစ်၊ ဖေဖော်ဝါရီလမှ စတင်၍ လုပ်ဆောင်သွားရန် နှစ်ဘက်တာဝန်ရှိသူများ သဘောတူညီချက် ရရှိခဲ့ကြောင်း နိုင်ငံခြားရေးဝန်ကြီးဌာန ၏ ထုတ်ပြန်ချက်အရ သိရသည်။
ထိုင်းနိုင်ငံက အိမ်ရှင်အဖြစ် လက်ခံကျင်းပပြုလုပ်သည့် တတိယအကြိမ် မြန်မာ-ထိုင်း မယ်ဆိုင်-မယ်ဟောက် ချောင်းရေခွဲဝေအသုံးချရေးနှင့် မြစ်ကြောင်းထိန်းသိမ်းရေးဆိုင်ရာ ဆပ်ကော်မတီ အစည်းအဝေးသို့ ရှမ်းပြည်နယ် အစိုးရအဖွဲ့ အတွင်းရေးမှူး ဦးဆောင်သော မြန်မာကိုယ်စားလှယ်အဖွဲ့နှင့်အတူ မြန်မာကောင်စစ်ဝန်ချုပ်ရုံး၊ ချင်းမိုင်မြို့မှ ကောင်စစ်ဝန်ချုပ် ဦးမင်းကျော်လင်း တက်ရောက်ခဲ့ကြောင်း သိရသည်။
အဆိုပါ အစည်အဝေးကို မြန်မာနိုင်ငံနှင့် ထိုင်းနိုင်ငံတို့အကြား နယ်နိမိတ်အဖြစ် စီးဆင်းနေသော မယ်ဆိုင်ချောင်းနှင့် မယ်ဟုတ်ချောင်းအတွင်း သဲနုန်းတူးဖော်ခြင်းကိစ္စရပ် ဖြေရှင်းဆောင်ရွက်ရန် ပြုလုပ်ခဲ့ကြောင်း သိရသည်။
ထို့ပြင် နှစ်နိုင်ငံ နယ်နိမိတ်မျဉ်းပေါ်တွင် ကျူးကျော်ဆောက်လုပ်ထားသော အဆောက်အဦများနှင့် ပတ်သက်၍ ဖြေရှင်းဆောင်ရွက်ရေးကိစ္စနှင့် မယ်ဆိုင်-မယ်ဟောက် ချောင်းရေ ခွဲဝေအသုံးချရေးကိစ္စတို့ကို ဆွေးနွေးရန် ရည်ရွယ်ချက်ဖြင့် ကျင်းပပြုလုပ်ခဲ့ကြောင်း သိရသည်။
၎င်းအစည်းအဝေးတွင် ၂၀၂၄ ခုနှစ်၊ စက်တင်ဘာလအတွင်း မယ်ဆိုင်-မယ်ဟောက်ချောင်းတွင် ရေကြီးရေလျှံမှု ကြီးမားစွာ ဖြစ်ပွားခဲ့သည့်ကိစ္စမျိုး နောက်ထပ်မဖြစ်ပွားစေရေး အမြန်ဆုံး ဖြေရှင်းရန်၊ ၂၀၂၅ ခုနှစ်၊ ဖေဖော်ဝါရီလမှစတင်၍ သဲနှုန်းတူးဖော်ရေးလုပ်ငန်းကို ဆောင်ရွက်ရန် သဘောတူညီချက်ရရှိခဲ့သည်။
ထို့ပြင် နယ်နိမိတ်မျဉ်းပေါ်တွင် ကျူးကျော်ဆောက်လုပ်ထားသော အဆောက်အဦများနှင့် ပတ်သက်၍ ဖြေရှင်းဆောင်ရွက်ရေးနှင့် မယ်ဆိုင်-မယ်ဟောက် ချောင်းရေ ခွဲဝေအသုံးချရေးကိစ္စတို့ကိုလည်း အောင်မြင်စွာ အကောင်အထည်ဖော်နိုင်ရေး နှစ်ဘက်တာဝန်ရှိသူများအကြား သဘောတူညီချက် ရရှိခဲ့ကြောင်း သိရသည်။