မန္တလေးမြို့ ဧရာဝတီမြစ်ရေတိုးဝင်လာမှု အန္တရာယ်ကို မပေါ့ဆကြရန်နှင့် အမြဲသတိရှိကြရန် မန္တလေးတိုင်း လူမှုကယ်ဆယ်ရေးဗဟိုကော်မတီက ယနေ့တွင် တို-က်တွန်းနှိုးဆော်ထားသည်။
“ငလျင် ရဲ့ နောက်ဆက်တွဲ ဆိုးကျိုးအနေနဲ့ မျက်စိနဲ့မြင်ရနိုင်တဲ့ မြေသားကြံ့ခိုင်မှုလျော့နည်းသွားတဲ့ အက်ကွဲကြောင်းဖြစ်စဉ်တွေကလည်း အများအပြားဖြစ်ပေါ်ခဲ့ပါတယ်။ အနှံ့အပြားလဲ ရှိခဲ့ပါတယ်။ ဒါကြောင့်မလို့ ကျွန်တော်တို့ မြစ်ကမ်းဘေးမှာ နေထိုင်တဲ့ပြည်သူတွေ အနေနဲ့ သာမန်မြစ်ရေဝင်ရောက်မှုသာမက မြေသားကြံ့ခိုင်မှု လျော့နည်းသွားခြင်း ဖြစ်စဉ်တွေဖြစ်ခဲ့တဲ့ဒေသတွေ ကိုယ်တိုင် ငလျင်ဒဏ်ကိုပြင်းပြင်းထန်ထန် ခံစားခဲ့ရတဲ့ဒေသတွေအနေနဲ့ ရေတိုးဝင်လာမှု အန္တရာယ်ကို မပေါ့ဆကြဖို့ အမြဲသတိရှိကြဖို့လဲ ကျွန်တော်တို့က တို-က်တွန်းပါတယ် အကြံပြုပါတယ်”ဟု မြန်မာနိုင်ငံလူမှုကယ်ဆယ်ရေးအဖွဲ့ ဗဟိုကော်မတီ ဒုတိယဥက္ကဌ ဦးလှိုင်မင်းဦး ပြောကြားထားသည်။
လက်ရှိ မြန်မာနိုင်ငံ လူမှုကယ်ဆယ်ရေးအဖွဲ့အနေဖြင့် သဘာဝဘေးအန္တရာယ် ကြုံတွေ့လာပါက ကူညီကယ်ဆယ်ရန် စနစ်တကျ စုဖွဲ့ပြင်ဆင်ခြင်း၊ လေ့ကျင့်သင်ကြားခြင်းဖြင့် အသင့်ပြင်ဆင်ထားပြီးဖြစ်ကြောင်း ဆိုသည်။
ထို့ကြောင့် ငလျင်သင့်ဒေသအပါအဝင် နိုင်ငံတစ်ဝန်းရှိ မြစ်ချောင်းများအနီးနှင့်မြေနိမ့်ပိုင်းနေထိုင်သူ ပြည်သူများအနေဖြင့် သဘာဝဘေးအန္တရာယ်ကြုံတွေ့လာပါက မြန်မာနိုင်ငံ လူမှုကယ်ဆယ်ရေးအဖွဲ့အပြင် ဒေသတွင်းလူမှုကယ်ဆယ်ရေးအဖွဲ့များနှင့် သက်ဆိုင်ရာ အုပ်ချုပ်ရေးပိုင်းတာဝန်ရှိသူများဖြင့် ပူးပေါင်းပါဝင်ကြရန် တို-က်တွန်းနှိုးဆော်ထားသည်။