ငလျင်ဒဏ်ခံတံတားစနစ်သစ်ပါ ဒုဋ္ဌဝတီတံတား ဆောင်ရွက်နေ
မန္တလေးတိုင်းဒေသကြီးနှင့် စစ်ကိုင်းတိုင်းဒေသကြီးတို့တွင် ဆောင်ရွက်လျက်ရှိသည့် ဝန်ထမ်းအိမ်ရာတည်ဆောက်ရေးနှင့် ပြင်ဆင်ထိန်းသိမ်းရေးလုပ်ငန်းများကို ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်က မေ ၂၃ ရက်တွင် သွားရောက်ကြည့်ရှုစစ်ဆေးခဲ့ကြောင်း သိရသည်။
မန္တလေးတိုင်းဒေသကြီးတွင် ဝန်ထမ်းအိမ်ရာ (၂၆) လုံး၊ စုစုပေါင်း အခန်း (၃၈၆) ခန်းကို တည်ဆောက်လျက်ရှိပြီး လုပ်ငန်းများကို သတ်မှတ်ကာလအတွင်း ပြီးစီးစေရန်နှင့် ရေရှည်တည်တံ့ခိုင်မြဲမှုရှိစေရန် စနစ်တကျဆောင်ရွက်ရန် ဒုတိယဝန်ကြီးက မှာကြားခဲ့သည်။
ထို့ပြင် အသုံးပြုသည့် ဆောက်လုပ်ရေးပစ္စည်းများ၏ အရည်အသွေးစံချိန်စံညွှန်းပြည့်မီရေးကို သက်ဆိုင်ရာအရည်အသွေးထိန်းသိမ်းရေးအဖွဲ့များက အနီးကပ်ကြီးကြပ်စစ်ဆေးရန်နှင့် ရေ၊ လျှပ်စစ်နှင့် မီတာစနစ်များ ပြည့်စုံစွာတပ်ဆင်ရန်လည်း လမ်းညွှန်ခဲ့သည်။
စစ်ကိုင်းတိုင်းဒေသကြီးတွင်လည်း အရာထမ်း/အမှုထမ်းများအတွက် ဝန်ထမ်းအိမ်ရာအသစ် (၇) လုံး၊ စုစုပေါင်း အခန်း (၁၁၂) ခန်းကို တည်ဆောက်လျက်ရှိကြောင်း သိရသည်။ အဆိုပါအိမ်ရာများတွင် လမ်း၊ ရေနှင့် လျှပ်စစ်မီးစနစ်များအပါအဝင် အခြေခံအဆောက်အဦများကို တစ်ပြိုင်နက်တည်း ပြီးစီးအောင် ဆောင်ရွက်ရန် လိုအပ်ကြောင်း ဒုတိယဝန်ကြီးက ပြောကြားခဲ့သည်။
ထို့နောက် ဒုတိယဝန်ကြီးနှင့်အဖွဲ့သည် ငလျင်ဒဏ်ကြောင့် ပျက်စီးခဲ့သည့် အနီရောင်အဆင့်နှင့် လိမ္မော်ရောင်အဆင့် ဝန်ထမ်းအိမ်ရာများ ပြင်ဆင်ပြီးစီးမှုနှင့် ဝန်ထမ်းနေရာချထားမှု အခြေအနေများကို လိုက်လံကြည့်ရှုစစ်ဆေးခဲ့ကြောင်း သိရသည်။
ဆက်လက်၍ ရန်ကုန်–မန္တလေး အမြန်လမ်း မိုင်တိုင်အမှတ် (၃၅၈/၁) ရှိ ဒုဋ္ဌဝတီတံတား (၁၀၀၀ ပေ) အသစ်တည်ဆောက်ရေးလုပ်ငန်းခွင်သို့ သွားရောက်စစ်ဆေးခဲ့သည်။
အဆိုပါတံတားသည် ငလျင်ဒဏ်ခံနိုင်သည့် ERADI-QUAKE Bearing စနစ်ကို အသုံးပြု၍ မြန်မာနိုင်ငံတွင် ပထမဆုံး တပ်ဆင်တည်ဆောက်သည့် တံတားတစ်စင်းဖြစ်ကြောင်း သိရသည်။
ရန်ကုန်–မန္တလေး အမြန်လမ်းသည် လမ်းပန်းဆက်သွယ်ရေးအတွက် အရေးပါသည့်လမ်းကြောင်းဖြစ်သဖြင့် ဒုဋ္ဌဝတီတံတားကို သတ်မှတ်ကာလအတွင်း အရည်အသွေးစံချိန်စံညွှန်းနှင့်အညီ ပြီးစီးအောင် ဆောင်ရွက်ရန် ဒုတိယဝန်ကြီး ဦးမျိုးမြင့်က တိုက်တွန်းခဲ့သည်။