မန္တလေးတိုင်း ခရိုင်(၇)ခုအတွင်းရှိ တက္ကသိုလ်ဝင်တန်းစာမေးပွဲ ပြန်လည်ဖြေဆိုမည့် ကျောင်းသား/သူများအတွက် သင်ကြားရေးစခန်းများဖွင့်လှစ် ပို့ချပေးနေကြောင်း သိရသည်။
အဆိုပါ လေ့ကျင့်သင်ကြားပို့ချမှုကို ဘာသာရပ်များအလိုက် တက္ကသိုလ်ပါမောက္ခများ၊ ကျောင်းများရှိ သီအိုရီပိုင်း ဆရာ/ဆရာမများက ရက်ပေါင်း(၅၀)ခန့်အတွင်း ပြန်လည်လေ့ကျင့်သင်ကြားပို့ချခြင်းများကို အပြီးပြုလုပ်သွားမည်ဖြစ်ကြောင်း သိရသည်။
“ပါမောက္ခတွေ သင်ကြားပေးပြီး ကျောင်းက ဆရာမတွေက ပြန် ဂိုက်လိုင်းပေးတယ်။ အားလုံးပြန်ဖြေကြရတာဆိုတော့ ဒီနှစ် မကြိုးစားလိုက်ရင် နောင်နှစ်က တစ်နှစ်လုံးပြန်ကြိုးစားရမှာ။ အခုက ပါမောက္ခတွေ လာသင်ပေးတဲ့အတွက် စာမေးပွဲအတွက် ပိုအထောက်အပံ့ဖြစ်ပါတယ်။ လိုအပ်တာရှိရင်လည်း အကူအညီတောင်းကြဖို့ ပြောပါတယ်”ဟု မန္တလေး မြို့အမှတ် (၁၆)အခြေခံပညာ အထက်ကျောင်းတွင် တက်ရောက်နေသည့် ကျောင်းသူတစ်ဦးက ပြောသည်။
ထို့ပြင် သင်ကြားရေး စခန်းများအလိုက် ဗလာစာအုပ်၊ ခဲတံ၊ ဘောလ်ပင်အစရှိသည့် စာရေးကိရိယာအစုံကို ထောက်ပံ့ပေးအပ်ထားရှိကြောင်း ဆိုသည်။
ပြီးခဲ့သည့် မတ်(၂၈)ရက် မွန်းလွဲပိုင်းအချိန်က ၇ ဒဿမ ၇ အဆင့်ရှိ အင်အားပြင်း ငလျင်လှုပ်ခတ်မှုကြောင့် မန္တလေးတက္ကသိုလ်၌ ထားရှိသည့် ကချင်ပြည်နယ်၊ မန္တလေးတိုင်း၊ စစ်ကိုင်တိုင်းနှင့် နေပြည်တော်ကောင်စီနယ်မြေတို့ရှိ အဖြေလွှာများ မီးလောင်ဆုံးရှုံးခဲ့ရသဖြင့် တက္ကသိုလ်ဝင်တန်းစာမေးပွဲများ ပြန်လည်ဖြေဆိုသွားကြရမည်ဖြစ်သည်။
အဆိုပါ တက္ကသိုလ်ဝင်တန်း စာမေးပွဲကို ၂၀၂၅ ခုနှစ် ဇွန် (၁၆) ရက်မှ (၂၁)ရက်အထိ ပြန်လည်ဖြေဆိုသွားကြရမည်ဖြစ်ကြောင်း မြန်မာနိုင်ငံစာစစ်ဦးစီဌာန အသိပေးထုတ်ပြန်ထားသည်။