မတ်လ၂၈ရက်က လှုပ်ခတ်ခဲ့သည့် ပြင်းအား ၇.၇ ရစ်ခ်တာစကေးမန္တလေးငလျင်ကြီးကြောင့် ငလျင်သင့်ဒေသအချို့တွင် မြေသားအက်ကွဲမှုများ ကြီးမားစွာ ဖြစ်ပေါ်ခဲ့သည်။
လက်တွေ့ကွင်းဆင်းမှတ်တမ်းရယူခဲ့သည့် TBSM-The Spirit of Brotherhood Missionအဖွဲ့၏ လူမှုကွန်ယက်တွင် ရေးသားထားချက်အရ စစ်ကိုင်းပြတ်ရွေ့ကြောတစ်လျှောက် ကီလိုမီတာ ၅၀၀ ကျော် (၃၄၂မိုင်)ခန့်ရှိသည့် အကွာအဝေးအတွင်း မြေလွှာအက်ကွဲမှုများဖြစ်ပေါ်ခဲ့သည်ဟု ဆိုသည်။
တွေ့ရှိချက်အရ ဘေးတိုက်ရွေ့လျားမှု strike slip motion ကြောင့်ဖြစ်ပေါ်သည်ဟု ယူဆရသည့် ပင်မအက်ကွဲကြောင်းသည် တိုက်တာ အဆောက်အဦး၊ ရေအောက်ကြမ်းပြင်၊ ထန်းပင်ပါမကျန် ကွဲအက်ထွက်စေပြီး အပြိုင်ဖြစ်ပေါ်နေသည့် အက်ကွဲကြောင်းငယ်အနီး ပေတစ်ရာ နှစ်ရာတဝိုက်၌ ဝေ့ဝိုက် လှုပ်ရှားမှု sheer wave ကြောင့် ဖြစ်ပေါ်သည်ဟု ယူဆရသည့် S ပုံစံ ပုံပျက်မြေအနေအထားများတွေ့ရှိရကြောင်း သိရသည်။
လက်တွေ့ကွင်းဆင်းမှတ်တမ်းရယူခဲ့သည့် TBSM-The Spirit of Brotherhood Missionအဖွဲ့သည်လည်း မြေပြင်အခြေအနေအရ သွားလာရိုက်ကူးခွင့်ကန့်သတ်ချက်နှင့် တခြားမမျှော်မှန်းနိုင်သည့် အခြေအနေ ကန့်သတ်ချက်များကြောင့် လက်လှမ်းမီသလောက်သာ လုပ်နိုင်သေးကြောင်းလည်း ဖော်ပြထားသည်။
ဓာတ်ပုံ-Nyo Min(fb)