မြောက်ဥက္ကလာပ ပြည်သူ့ဆေးရုံကြီးအား ရွှေပေါက္ကံ – မော်ကျွန်းခွဲရုံမှတစ်ဆင့် 33kV ဓာတ်အားလိုင်းဖြင့် အရေးပေါ်လွှဲပြောင်းပေးထား
ရန်ကုန်အရှေ့ပိုင်းခရိုင်၊ မြောက်ဥက္ကလာပမြို့နယ်သို့ ဓာတ်အားဖြန့်ဖြူးပေးနေသည့် 33kV လှော်ကား – AaAb ဖီဒါဓာတ်အားလိုင်းတွင် ယနေ့ ဇူလိုင်လ ၁ ရက်နေ့ နံနက်ပိုင်းက ဓာတ်အားပြတ်တောက်မှု (အပြစ်ဖြစ်ပွားမှု) တစ်ခု ဖြစ်ပွားခဲ့သဖြင့် မြောက်ဥက္ကလာပမြို့နယ်ရှိ ရပ်ကွက်အများစုတွင် လျှပ်စစ်ဓာတ်အားပြတ်တောက်လျက်ရှိကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က အသိပေးထုတ်ပြန်ထားသည်။
အဆိုပါ ဓာတ်အားလိုင်း၌ အပြစ်ဖြစ်ပွားခဲ့ခြင်းဖြစ်ပြီး၊ ဖြစ်ပွားရခြင်း အကြောင်းအရင်းမှာ မင်္ဂလာဒုံမြို့နယ်၊ ပေါက်ကုန်းအပိုင်း (၅) ရှိ တာဝါတိုင်တွင် လျှပ်စစ်လိုင်းချိတ်ဆက်မှု (Connection) ပြတ်တောက်သွားခဲ့ခြင်းကြောင့် ဖြစ်ကြောင်း သိရသည်။
အဆိုပါ လိုင်းပြတ်တောက်မှုကြောင့် ဓာတ်အားပြတ်တောက်သွားခဲ့ရသည့် မြောက်ဥက္ကလာပ ပြည်သူ့ဆေးရုံကြီးအား လျှပ်စစ်ဓာတ်အား ပြတ်တောက်မှုမရှိစေရန်အတွက် ရွှေပေါက္ကံ – မော်ကျွန်းခွဲရုံမှတစ်ဆင့် 33kV ဓာတ်အားလိုင်းဖြင့် အရေးပေါ်လွှဲပြောင်းကာ ဓာတ်အားပြန်လည်ပေးထားကြောင်း YESC က ထုတ်ပြန်ချက်တွင် ဖော်ပြထားသည်။
လက်ရှိတွင် အပြစ်ဖြစ်ပွားခဲ့သည့် ဓာတ်အားလိုင်းအား မြို့နယ်လျှပ်စစ်ဝန်ထမ်းများနှင့် ဓာတ်အားဖြန့်ဖြူးရေးဌာန၊ တည်ဆောက်ရေးအဖွဲ့တို့ ပူးပေါင်းကာ အချိန်နှင့်တစ်ပြေးညီ အရေးပေါ် ပြုပြင်ဆောင်ရွက်လျက်ရှိကြောင်း သိရသည်။ယင်းသို့ ပြုပြင်ဆောင်ရွက်မှုများ ပြုလုပ်နေစဉ်ကာလအတွင်း မြောက်ဥက္ကလာပမြို့နယ်၊ (၄) ရပ်ကွက်နှင့် (ည) ရပ်ကွက်တို့မှအပ ကျန်ရှိသည့် ရပ်ကွက်များအားလုံးတွင် လျှပ်စစ်ဓာတ်အား ပြတ်တောက်လျက်ရှိမည်ဖြစ်ကြောင်း သိရသည်။