မြန်မာနိုင်ငံအနေဖြင့် နိုင်ငံ၏ စီးပွားရေးတိုးတက်မှု မက်ခရိုစီးပွားရေးအခြေအနေပေါ် မူတည်ပြီး ဗဟိုဘဏ်အနေဖြင့် အတိုးနှုန်းပြင်ဆင်ခြင်းကို လိုအပ်သလို ဆောင်ရွက်သွားဖို့ရှိကြောင်း ဗဟိုဘဏ်ဒုတိယဥက္ကဋ္ဌ (၂) ဒေါက်တာလင်းအောင်က ပြောကြားထားသည်။
ယနေ့ကျင်းပပြုလုပ်သည့် နိုင်ငံတော်စီမံအုပ်ချုပ်ရေးကောင်စီသတင်းထုတ်ပြန်ရေးအဖွဲ့၏ ၂၂ ကြိမ်မြောက် သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။
“၂၀၂၁ ခုနှစ်နောက်ပိုင်းကစပြီး အမေရိကန်နိုင်ငံအပါအဝင် ကမ္ဘာ့နိုင်ငံများမှာ ငွေကြေးဖောင်းပွမှုနှုန်းမြင့်တက်ခဲ့ပါတယ်။ ဖွံ့ဖြိုးပြီးနိုင်ငံနဲ့ ဖွံ့ဖြိုးဆဲနိုင်ငံအချို့များဆိုရင် ငွေကြေးဖောင်းပွမှုနှုန်းကိုလျှော့ချနိုင်ဖို့အတွက် အတိုးနှုန်းမြှင့်တင်မှုတွေကို ၂၀၂၂ ခုနှစ်မေလကနေစတင်ပြီး ဆောင်ရွက်ခဲ့ပါတယ်။ မြန်မာနိုင်ငံမှာလည်း ငွေကြေး ဖောင်းပွမှုနှုန်းတွေ အထိုက်အလျောက်မြင့်တက်လျက်ရှိပါတယ်။
ဒီလိုမြင့်တက်ရခြင်းဟာ လုပ်ခလစာမြင့်တက်ခြင်း၊ ငွေကြေးပမာဏမြင့်တက်ခြင်း၊ ဝယ်လိုအားမြင့်တက်ခြင်းတွေကြောင့်မဟုတ်ဘဲသွင်းကုန်တန်ဖိုးတွက်ချက်ရာမှာ ငွေလဲလှယ်နှုန်းတွေမြင့်တက်နေတဲ့အတွက် သွင်းကုန်တန်ဖိုးမြင့်တက်ခြင်း၊ ကုန်သွယ်မှုလိုငွေ မြင့်မားလာခြင်း၊ နိုင်ငံခြားလိုငွေများပြားလာရာမှတစ်ဆင့် ကုန်စည်ဈေးနှုန်းမြင့်တက်ခဲ့ခြင်း၊ စားသုံးသူဈေးဆနှုန်းကိန်းမြင့်တက်လာခြင်းတို့ကြောင့်ပဲ ဖြစ်ပါတယ်။
အတိုးနှုန်းမြှင့်တင်တဲ့နည်းလမ်းကို ဆောင်ရွက်မယ်ဆိုရင် နိုင်ငံရဲ့စီးပွားရေးဖွံ့ဖြိုးတိုးတက်မှုကို ထိခိုက်စေနိုင်ပါတယ်”ဟု ၎င်းကဆိုသည်။
ထို့ပြင် ဘဏ်လုပ်ငန်းငွေကြေး အခြေအနေမှာ ၂၀၂၂ ခုနှစ်အောက်တိုဘာနောက်ပိုင်းတွင် ကောင်းမွန်လာသဖြင့် ငွေကြေး ဖောင်းပွမှုနှုန်းကို သွယ်ဝိုက်သောနည်းဖြင့် ထိန်းချုပ်နိုင်ရန်အတွက် ဘဏ်များ မြန်မာကျပ်ငွေဖြင့် ထားရှိရမည့် အနည်းဆုံးသီးသန့်ငွေလိုအပ်ချက် အချိုးကို သုံးရာခိုင်နှုန်းမှ ၃ ဒသမ ၅ ရာခိုင်နှုန်းသို့ ၂၀၂၃ ခုနှစ်မေလတွင် တိုးမြှင့်ပြင်ဆင်သတ်မှတ်ပေးထားပြီး တစ်ဖက်တွင်လည်း ဘဏ်များမှ လုပ်သာကိုင်သာရှိစေရန်အတွက် ပိုလျှံသီးသန့်ငွေအပေါ် အတိုးပေးခြင်းကို ၂၀၂၂ ခုနှစ် အောက်တိုဘာလတွင် ပေးခဲ့ကြောင်း သိရသည်။