ကမ္ဘာတစ်ဝန်း ချစ်ကြည်ရေးခရီးသွားနေသည့် မက္ကဆီကို ရေတပ် ရွက်သင်္ဘောတစ်စီးသည် စနေနေ့က နူးယော့ခ်မြို့ရှိ ဘရွတ်ကလင်တံတားကို ဝင်တို-က်မိခဲ့သောကြောင့် ရွက်တိုင်သုံးခု ကျိုးပဲ့ခဲ့ပြီး သင်္ဘောသားနှစ်ဦး ေ-သဆုံးခဲ့ကြောင်း သိရသည်။
ဖြစ်စဉ်ကြောင့် သက်တမ်း ၁၄၂ နှစ်ရှိ တံတားကြီးသည် ကြီးကြီးမားမား ထိခိုက်မှု မရှိခဲ့သော်လည်း သင်္ဘောပေါ်ပါ ၁၉ ဦးသည် ဆေးကုသမှုခံယူရန် လိုအပ်သည်ဟု နူးယော့ခ် မြို့တော်ဝန် အဲရစ် အဒမ်စ်က ပြောကြားခဲ့သည်။
နောက်ပိုင်းတွင် ဒဏ်ရာအပြင်းအထန်ရရှိခဲ့သည့် လူလေးဦးအနက် နှစ်ဦး ေ-သဆုံးခဲ့သည်ဟု အဒမ်စ်က တနင်္ဂနွေနေ့အစောပိုင်းတွင် လူမှုမီဒီယာ၌ ကြေညာခဲ့သည်။
သင်္ဘောတို-က်မိရသည့် အကြောင်းရင်းကိုမူ စုံစမ်းစစ်ဆေးနေဆဲဖြစ်သည်။
အခင်းဖြစ်စဉ်ကို ရိုက်ယူထားသော ဗီဒီယိုအများအပြားတွင် Cuauhtemoc ဟု အမည်ပေးထားသော သင်္ဘောသည် East မြစ်၏ ဘရွတ်ကလင်ဘက်ခြမ်းအနီး တံတားဆီသို့ လျင်မြန်စွာ ခုတ်မောင်းနေခဲ့သည်ကို တွေ့ရသည်။ ထို့နောက်တွင် သင်္ဘောရွက်တိုင် သုံးခုသည် တံတား၏ အပိုင်းတစ်ပိုင်းကို တစ်ခုပြီးတစ်ခုဝင်တိုက်ကာ ကျိုးပဲ့ကုန်သည်။
ဖြစ်စဉ်ကြောင့် ည ၈း၂၀ နာရီတွင် တံတားပေါ်၌ ယာဉ်ကြော အကြီးအကျယ် ပိတ်ဆို့ခဲ့သည်ကိုဗီဒီယိုများတွင် တွေ့ရသည်။ တံတားပေါ်တွင် မည်သူမျှ ထိခိုက်ဒဏ်ရာရရှိခဲ့ခြင်း မရှိပေ။
ဧရာမ မက္ကဆီကိုအလံတစ်ခုလွှင့်ထူထားကာ လူ ၂၇၇ ဦးလိုက်ပါလာသော သင်္ဘောသည် နောက်ပိုင်းတွင် မြစ်ကမ်းပါးရှိ ဆိပ်ခံတစ်ခုသို့ မျောပါသွားသဖြင့် အဖြစ်အပျက်ကို ကြည့်ရှု့နေသူများသည် ထွက်ပြေးခဲ့ကြရသည်။
ပျက်စီးသွားသော ရွက်တိုင်များပေါ်တွင် သင်္ဘောသားများကို တွေ့မြင်ရသော်လည်း မည်သူမျှ ရေထဲကျခဲ့ခြင်းမရှိဟု တာဝန်ရှိသူများက ပြောကြားခဲ့သည်။
အခင်းဖြစ် Cuauhtemoc သင်္ဘောသည် အကယ်ဒမီ လေ့ကျင့်ရေးရေယာဉ်တစ်ခုဖြစ်ကြောင်း မက္ကဆီကို ရေတပ်က ဆိုရှယ်မီဒီယာ X တွင် ပို့စ်တင် ပြောဆိုခဲ့ပြီး ဖြစ်စဉ်တွင် လူ ၂၂ ဦး ဒဏ်ရာရရှိခဲ့ကာ ၁၉ ဦးသည် ဆေးဝါးကုသမှု ခံယူရန်လိုအပ်ခဲ့ကြောင်း ဆိုခဲ့သည်။
အဆိုပါဖြစ်စဉ်အတွင်း သင်္ဘောသားနှစ်ဦး အသက်ဆုံးရှုံခဲ့ရခြင်းအတွက် ဝမ်းနည်းကြေကွဲရကြောင်း မက္ကဆီကို သမ္မတ Claudia Sheinbaum က ပြောကြားခဲ့သည်။
Ref: အေပီ