အမေရိကန် ပြည်ထောင်စုနှင့် ယူကရိန်းကိုယ်စားလှယ်အဖွဲ့များသည် ဂျာမနီနိုင်ငံ၏မြို့တော် ဘာလင်၌ ပြုလုပ်ခဲ့သော ဆွေးနွေးပွဲများအတွင်း “များစွာတိုးတက်မှု” ရရှိခဲ့ကြောင်း အမေရိကန်သမ္မတ၏ အထူးသံတမန် စတိဗ် ဝစ်ကော့ဖ်က ပြောကြားသည်။
“ကိုယ်စားလှယ်များဟာ ငြိမ်းချမ်းရေးအတွက် အချက် ၂၀ ပါ အစီအစဉ်၊ စီးပွားရေးအစီအစဉ်တွေနဲ့ အခြားအရာတွေနဲ့ပတ်သက်ပြီး နက်နက်နဲနဲ ဆွေးနွေးခဲ့ကြပါတယ်” ဟု ဝစ်ကော့ဖ်က သူ၏ X လူမှုကွန်ရက် အကောင့်တွင် ပြောကြားခဲ့သည်။ “များစွာတိုးတက်မှုတွေရရှိခဲ့ပြီး မနက်ဖြန်မနက်မှာ သူတို့ထပ်မံတွေ့ဆုံကြမှာပါ” ဟုလည်း ဆိုသည်။
ယူကရိန်း၌ ဖြစ်ပွားနေသော ပဋိပက္ခကိုဖြေရှင်းရန်အတွက် အမေရိကန်-ယူကရိန်းဆွေးနွေးပွဲများကို ဘာလင်မြို့ရှိ ဖက်ဒရယ်ဝန်ကြီးချုပ်ရုံးတွင် ဒီဇင်ဘာ ၁၄ ရက်နေ့က ကျင်းပခဲ့ခြင်းဖြစ်သည်။
အမေရိကန်ကိုယ်စားလှယ်အဖွဲ့တွင် ဝစ်ကော့ဖ်နှင့် အမေရိကန်သမ္မတ ဒေါ်နယ်လ် ထရမ့်၏ သမက်ဖြစ်သူ စီးပွားရေးသမား ဂျာရက် ကူရှ်နာတို့ ပါဝင်သည်။ ယူကရိန်းဘက်မှ ဗလာဒီမာ ဇယ်လန်းစကီး၊ လုံခြုံရေးကောင်စီ အတွင်းရေးမှူး ရူစတမ် အူမီရော့ဗ်နှင့် ယူကရိန်းစစ်တပ် အကြီးအကဲ ဗိုလ်ချုပ်အန်ဒရေး နတ်တော့ဗ်တို့ ပါဝင်ကြသည်။ ဂျာမန်ဝန်ကြီးချုပ် ဖရီးဒရစ်ခ် မဲ့ဇ်က တိုတောင်းသော ကြိုဆိုနှုတ်ခွန်းဆက်စကား ပြောကြားပြီးနောက် အစည်းအဝေးခန်းမမှ ထွက်ခွာသွားခဲ့သည်။