ဘယ်လာရုစ်အစိုးရတက္ကသိုလ်နှင့်မြန်မာအာကာသအေဂျင်စီတို့ နားလည်မှုစာချွန်လွှာလက်မှတ်ရေးထိုး

ဖေဖေါ်ဝါရီလ ၁၀ ရက်

ဘယ်လာရုစ်အစိုးရတက္ကသိုလ် ပညာရေးနှင့် နိုင်ငံတကာပူးပေါင်းဆောင်ရွက်ရေး ဒုတိယပါမောက္ခချုပ် ဗစ်တာကိုချင် နှင့် မြန်မာအာကာသအေဂျင်စီ ဒုတိယအမှုဆောင်အရာရှိချုပ် ဒေါက်တာ ဦးမျိုးသန့်တို့က သက်ဆိုင်ရာအဖွဲ့အစည်းများကိုယ်စား နှစ်နိုင်ငံပူးပေါင်းဆောင်ရွက်ရေးနားလည်မှုစာချွန်လွှာကို လက်မှတ်ရေးထိုးခဲ့ကြသည်။ အဆိုပါ လက်မှတ်ရေးထိုးပွဲ အခမ်းအနားကို ဘီလာရုစ်နိုင်ငံ အမျိုးသားသိပ္ပံအကယ်ဒမီမှ ကိုယ်စားလှယ်များ တက်ရောက်လျက် ဖေဖော်ဝါရီလ ၁၀ ရက်နေ့တွင် ကျင်းပခဲ့ကြောင်း သိရသည်။

အဆိုပါစာချွန်လွှာတွင် ပညာရေး၊ သိပ္ပံနှင့် နည်းပညာဆိုင်ရာ ပူးပေါင်းဆောင်ရွက်မှုများကို ရေးသွင်းဖော်ပြထားပြီး အထူးသဖြင့် ရေဒါဆော့ဖ်ဝဲလ်၊ မိုက်ခရိုအီလက်ထရွန်နစ်နှင့် ဆက်သွယ်ရေးစနစ်များ နယ်ပယ်တွင် ပူးပေါင်းဆောင်ရွက်မှု ဖွံ့ဖြိုးတိုးတက်ရေးအတွက် ဖြစ်ကြောင်း သိရသည်။ အဓိက ပူးပေါင်းဆောင်ရွက်မည့် ခေါင်းစဉ်များမှာ နှစ်နိုင်ငံမှ ကျောင်းသားများကို အဆင့်စုံ ပူးတွဲပညာရေးအစီအစဉ်များဖြင့် လေ့ကျင့်သင်ကြားပေးခြင်း၊ ဂြိုဟ်တုနည်းပညာ စီမံကိန်းများအပါအဝင် သိပ္ပံနည်းကျ သုတေသနပြုခြင်း၊ ကျွမ်းကျင်သူနည်းပြများနှင့် သိပ္ပံပညာရှင်များ အပြန်အလှန်လဲလှယ်ခြင်း၊ သတင်းအချက်အလက်၊ ပညာရေးဆိုင်ရာ အထောက်အကူပြုပစ္စည်းများနှင့် သိပ္ပံနည်းကျ အစီရင်ခံစာများ ဖလှယ်ခြင်း၊ ညီလာခံများ၊ ဆွေးနွေးပွဲများ၊ အလုပ်ရုံဆွေးနွေးပွဲများနှင့် သင်တန်းများ ကျင်းပခြင်းနှင့် ပူးတွဲစာတမ်းများ ထုတ်ဝေခြင်းတို့ ဖြစ်သည်။

နှစ်ဖက်ကိုယ်စားလှယ်အဖွဲ့များအနေဖြင့် မိမိတို့၏ လုပ်ငန်းဆောင်ရွက်မှုဆိုင်ရာ အချက်အလက်များကိုလည်း အပြန်အလှန် ဖလှယ်ခဲ့ကြပြီး ဘယ်လာရုစ်အစိုးရတက္ကသိုလ်၏ ဖွဲ့စည်းပုံ၊ ရိုးရာဓလေ့များ၊ ကမ္ဘာ့အဆင့်သတ်မှတ်ချက်များ၊ ပညာရေးနှင့် သိပ္ပံဆိုင်ရာ နယ်ပယ်များနှင့် တက္ကသိုလ်၏ အားသာချက်များကို မိတ်ဆက်ပြသခဲ့သည်။

တစ်ဖန် ဒေါက်တာ ဦးမျိုးသန့်က မြန်မာအာကာသအေဂျင်စီ၏ လုပ်ငန်းစဉ်များကို ရှင်းလင်းပြောကြားခဲ့ပြီး မြန်မာအာကာသအေဂျင်စီအနေဖြင့် နိုင်ငံတကာ အာကာသစီမံကိန်းများတွင် ပါဝင်ဆောင်ရွက်နေခြင်း၊ ဂြိုဟ်တုများ လွှတ်တင်ခြင်း၊ စီမံခန့်ခွဲခြင်းနှင့် လည်ပတ်ခြင်းတို့ကို ထိန်းချုပ်ခြင်းနှင့် ဂြိုဟ်တုဓာတ်ပုံများကို သိမ်းဆည်းခြင်းတို့ ဆောင်ရွက်လျက်ရှိကြောင်း ရှင်းလင်းပြောကြားခဲ့သည်။

ဘယ်လာရုစ်အစိုးရတက္ကသိုလ် သည် လေကြောင်းနှင့် အာကာသနည်းပညာများ ဖွံ့ဖြိုးတိုးတက်ရေးနှင့် အကောင်အထည်ဖော်မှုတွင် အတွေ့အကြုံကောင်းများစွာရှိသည်။ ဘယ်လာရုစ်အစိုးရတက္ကသိုလ် သည် ၂၀၁၈ ခုနှစ်နှင့် ၂၀၂၃ ခုနှစ်တို့တွင် ကမ္ဘာ့ပတ်လမ်းအတွင်းသို့ အောင်မြင်စွာ လွှတ်တင်နိုင်ခဲ့သည့် ဘယ်လာရုစ်အစိုးရတက္ကသိုလ် အက်စ်အေတီ-၁ နှင့် ဘယ်လာရုစ်အစိုးရတက္ကသိုလ် အက်စ်အေတီ-၂ ကိုယ်ပိုင်နာနိုဂြိုဟ်တုများကို ဖန်တီးခဲ့သည့် ဘီလာရုစ်နိုင်ငံ၏ တစ်ခုတည်းသော တက္ကသိုလ်ဖြစ်ပေသည်။ ဤနည်းပညာမြင့် စက်ပစ္စည်းများကို ဘယ်လာရုစ်အစိုးရတက္ကသိုလ် မှ သိပ္ပံပညာရှင်များနှင့် ကျောင်းသားများက ထုတ်လုပ်မှုကွင်းဆက်အပြည့်ဖြင့် ကိုယ်တိုင်ထုတ်လုပ်ခဲ့ခြင်း ဖြစ်သည်။ ဂြိုဟ်တုများ လွှတ်တင်နိုင်ခြင်းကြောင့် ပျံသန်းခြင်းဆိုင်ရာ ပညာရပ်များနှင့် သိပ္ပံဆိုင်ရာ လက်တွေ့ခန်းတစ်ခု ဖြစ်ပေါ်လာပြီး ယနေ့တိုင် ကျောင်းသားများအနေဖြင့် အာကာသရောင်ခြည်ဖြာထွက်မှုများ၊ အီလက်ထရွန်နစ် အစိတ်အပိုင်းများ၏ ရောင်ခြည်ဒ-ဏ်ခံနိုင်ရည်နှင့် ကမ္ဘာမြေကို အဝေးမှအာရုံခံ တိုင်းတာခြင်းတို့ကို လေ့လာနိုင်စေခဲ့သည်။ ဘယ်လာရုစ်အစိုးရတက္ကသိုလ်၏ ရေဒီယိုရူပဗေဒနှင့် ကွန်ပျူတာနည်းပညာ မဟာဌာန၊ ပထဝီဝင်နှင့် ပထဝီသတင်းအချက်အလက်ပညာ မဟာဌာနနှင့် ရူပဗေဒမဟာဌာနတို့တွင် လေကြောင်းအာကာသ၊ ရေဒီယိုအီလက်ထရွန်နစ်နှင့် အာကာသမြေပုံပညာရပ်ဆိုင်ရာ ကျွမ်းကျင်သူများကို လေ့ကျင့်သင်ကြားပေးလျက်ရှိသည်။

အစည်းအဝေးအပြီးတွင် နှစ်နိုင်ငံကိုယ်စားလှယ်အဖွဲ့ဝင်များသည် ညှိနှိုင်းထားသည့် လုပ်ငန်းစဉ်များကို မကြာမီကာလအတွင်း အသေးစိတ် ဆက်လက်ဆွေးနွေး အကောင်အထည်ဖော်ရန် သဘောတူညီခဲ့ကြကြောင်း သိရသည်။

Ref: ဘီအက်စ်ယူနူးစ်