ထိုင်းနိုင်ငံသည် လာအိုနိုင်ငံကိုဖြတ်၍ တရုတ်နိုင်ငံနှင့် ဆက်သွယ်မည့် ၎င်း၏ ပထမဆုံး မြန်နှုန်းမြင့်ရထားလမ်းကို ၂၀၃၀ ပြည့်နှစ်တွင် အပြီးသတ် ဖေါက်လုပ်နိုင်မည်ဟု မျှော်မှန်းကြောင်းသိရသည်။ ကာလရှည်ကြာစွာ နှောင့်နှေးနေသည့် စီမံကိန်းသည် နှစ်နိုင်ငံအကြား ဆက်ဆံရေးနှင့် ကုန်သွယ်မှုကို ပိုမိုတိုးတက်စေမည့် အဓိကသော့ချက်အဖြစ် တာဝန်ရှိသူများက ကြွေးကြော်ထားခဲ့သည်။
ဘန်ကောက်နှင့် နာခွန်ရတ်ချစီမာပြည်နယ်တို့ကို ဆက်သွယ်မည့် စီမံကိန်းပထမအဆင့်သည် ၃၆ ရာခိုင်နှုန်းခန့် ပြီးစီးနေပြီဟု အစိုးရပြောရေးဆိုခွင့်ရှိသူ Jirayu Houngsub က ဗုဒ္ဓဟူးနေ့က ပြောကြားခဲ့သည်။ အရှေ့မြောက်နယ်စပ်ပြည်နယ် နန်ခိုင်အထိ ရထားလမ်းတိုးချဲ့မည့် ဒုတိယအဆင့် လုပ်ငန်းအစီအစဉ်ရေးဆွဲမှုကို ပြီးစီးပြီဖြစ်၍ အစိုးရထံတင်ပြသွားရန် အသင့်ဖြစ်နေပြီဟုလည်း ၎င်းက ဆိုသည်။
စုစုပေါင်းရထားလမ်းအရှည်သည် ၃၇၈ မိုင်ရှည်လျားပြီး ကုန်ကျစရိတ်မှာ ဘတ်ငွေ ၄၃၄ ဘီလျံရှိမည်ဟု ခန့်မှန်းထားသည်။ ထိုင်းဘက်ခြမ်း ရထားလမ်းကွန်ရက်သည် မဲခေါင်မြစ်ကို ဖြတ်၍တည်ဆောက်ထားသည့် တံတားတစ်စင်းမှတဆင့် လာအို-တရုတ် လမ်းကြောင်းနှင့် ချိတ်ဆက်မည်ဖြစ်သည်။
ဒေသတွင်း လုပ်ဖော်ကိုင်ဖက်နိုင်ငံများ၏ တိုးတက်မှုအရှိန်အဟုန်ကို လိုက်လျောညီထွေဖြစ်စေရန် ရုန်းကန်နေရသော အရှေ့တောင်အာရှ၏ ဒုတိယစီးပွားရေးအင်အားကြီး ထိုင်းနိုင်ငံသည် ၎င်း၏ အကြီးဆုံးကုန်သွယ်ဖက်ဖြစ်သော တရုတ်နိုင်ငံနှင့် ချိတ်ဆက်မှုတိုးတက်စေရန် ကြိုးပမ်းနေသည်။ ကုန်သွယ်မှု ကဏ္ဍအပြင် နှစ်နိုင်ငံသည် ပြီးခဲ့သည့်နှစ်က ၎င်းတို့နိုင်ငံသားများအတွက် ခရီးသွားဗီဇာဖြေလျှော့ပေးခြင်းများလုပ်ခဲ့ကာ ခရီးသွားလုပ်ငန်းဆိုင်ရာဆက်ဆံရေးကိုလည်း ပိုမိုနီးကပ်စွာ ပူးပေါင်းဆောင်ရွက်လျက်ရှိသည်။
ရထားလမ်းကွန်ရက် ကို အသုံးပြုနိုင်ပြီဆိုပါက ထိုင်း-လာအိုရထားလမ်းသည် ဘန်ကောက်မှ တရုတ်နိုင်ငံမြို့တော်ကို ဗီယန်ကျင်းမှတဆင့် ခရီးသွားနိုင်မည်ဖြစ်သကဲ့သို့ ပေကျင်းနှင့် သီးခြား အမြန်ရထားဝန်ဆောင်မှုရှိနေသော တရုတ်တောင်ပိုင်းမြို့ ကူမင်းတို့မှတဆင့်လည်း သွားရောက်နိုင်မည်ဖြစ်သည်။
Ref: ဘန်ကောက်ပို့စ်