ဗြိတိန်တွင် ရထားဝန်ထမ်းများ ဒုတိယအကြိမ်ထပ်မံဆန္ဒပြမည်
လစာငွေ၊အလုပ်အကိုင်တည်မြဲရေးနှင့် တိုးသည့်လစာထက် ငွေကြေးဖောင်းပွမှုကပိုမြင့်နေသဖြင့် တစ်နိုင်ငံလုံးအတိုင်းအတာဖြင့် စက်တင်ဘာ ၁၅ ရက်နှင့် ၂၆ ရက်တို့တွင် နိုင်ငံလုံးဆိုင်ရာသပိတ်မှောက်မှုအသစ်တစ်ခုအား ဗြိတိန်ရထားသမဂ္ဂနှစ်ခုမှ ရထားဝန်ထမ်းများကစီစဉ်နေကြောင်းသိရှိရသည်။
ပို့ဆောင်ရေးလစာဝန်ထမ်းအသင်း (TSSA) ကရထားသွားလာရေးကုမ္ပဏီများမှ ဝန်ထမ်းများအတွက် လစာ ၂ ရာခိုင်နှုန်းတိုးပေးမှုကမ်းလှမ်းချက်ကိုပယ်ချကာ ပြန်လည်ပြင်ဆင်ပေးရန် တွန်းအားပေးနေကြောင်းပြောကြားခဲ့သည်။
ဇူလိုင်လ ၃၀ ရက်နှင့် ဩဂုတ်လ ၁၃ ရက်နေ့များကတည်းက ဆန္ဒပြခဲ့ကြသော စက်ခေါင်းအင်ဂျင်နီယာများအသင်း (ASLEF) ကမူ အဖွဲ့ဝင်များ အနေဖြင့်မြင့်မားလာ သော နေထိုင်မှုစရိတ်များကိုကာမိစေရန်အတွက် သင့်လျော်သောလစာကမ်းကိုလိုချင်ကြောင်းပြောကြားခဲ့သည်။ဖြစ်နိုင်ချေရှိသောပြေလည်မှုရရှိရန် ဆွေးနွေးနေဆဲဖြစ်သည်ဟု သမဂ္ဂများကပြောကြားခဲ့သည်။
“သူတို့က ရထားမောင်းသူတွေကို လစာနှုန်းထားတွေဖြတ်တောက်တယ်။ အလုပ်ကျေတာ့မနှစ်ကလိုပဲတန်းတူပင်ပန်းတာပါ” ဟု ASLEF ၏ အထွေထွေအတွင်းရေးမှူး Mick Whelan ကပြောကြားခဲ့သည်။
Avanti West Coast, Chiltern Railways, Cross Country, Greater Anglia, Great Western Railway, Hull Trains, LNER, London Overground, Northern Trains, Southeastern, TransPennine Express နှင့် West Midlands Trains အပါအဝင် ကုမ္ပဏီ ၁၂ ခုမှ ASLEF အဖွဲ့ဝင်များသည် စက်တင်ဘာ ၁၅ ရက်နေ့ သပိတ်မှောက်မှုတွင် ပါဝင်ကြမည်ဖြစ်သည်။
TSSA သမဂ္ဂခေါင်းဆောင် Manuel Cortes ကမူ “ရထားသမဂ္ဂနဲ့ ညိှနှိုင်းမှုတွေ ဆက်လက်လုပ်ဆောင်နေပြီး ဆုံးဖြတ်ချက်အတွက် သဘောထားကွဲလွဲမှုတွေ နည်းပါးလာတာကို ကြိုဆိုပါတယ်။ကျွန်တော်တို့ရဲ့နောက်ထပ်သပိတ်မှောက်မှုကို တားဆီးနိုင်မယ့် သဘောတူညီချက်တစ်ခုရှိလာမလား၊မရှိလာမလားဆိုတာကတော့ အချိန်ကပြောပြပါလိမ့်မယ်” ဟု ဆိုသည်။
စက်တင်ဘာ ၂၆ ရက်တွင်သပိတ်မှောက်မှုသည် လီဗာပူး၌ကျင်းပမည့် ဗြိတိန်အတိုက်အခံလေဘာပါတီ၏ နှစ်ပတ်လည်ညီလာခံနှင့်တိုက်ဆိုင်နေလိမ့်မည်ဖြစ်ကြောင်းလည်း TSSA ကပြောကြာခဲ့သည်။ဗြိတိန်တွင်ငွေကြေးဖောင်းပွမှုသည် ဇူလိုင်လတွင် ၁၀ ရာခိုင်နှုန်းအထိ မြင့်တက်ခဲ့ပြီး စွမ်းအင်များကလည်းဈေးတက်နေ၍ လူနေမှုစရိတ်အကျပ်အတည်းကို ပိုမိုဆိုးရွားစေမည်ဟုခန့်မှန်း နေကြ၍ဖြစ်သည်ဟုဆိုသည်။
Source -ရိုက်တာ