ဖီဖာ တာဝန်ရှိသူများသည် ဆော့(တ်)ဘေ့ ဟု လူသိများသော နာမည်ကျော် တုကီယေး စားဖိုမှူး နာစရက် ဂုတ်ချာက ကမ္ဘာ့ဖလား ဗိုလ်လုပွဲအပြီး ကစားသမားများရှိရာ ဘောလုံးကွင်းပြင်ထဲသို့ မည်သို့မည်ပုံ ဝင်ရောက်လာသည်နှင့် ပတ်သက်၍ စုံစမ်းစစ်ဆေးမှု စတင်ပြုလုပ်လိုက်ပြီ ဖြစ်ကြောင်း သိရသည်။
ထိုစုံစမ်းစစ်ဆေးမှုမှာ အာဂျင်တီးနား ကစားသမားများ နှင့်အတူတွဲရိုက် အောင်ပွဲခံထားသော ဆော့ဘေ့၏ ဓာတ်ပုံများနှင့် ဗီဒီယိုများ ဆိုရှယ်မီဒီယာပေါ်တွင် ပျံနှံ့လာပြီးနောက် ပေါ်ပေါက်လာခြင်းဖြစ်သည်။
ဆော့(တ်)ဘေ့သည် အာဂျင်တီးနား ကစားသမားများနှင့် တွဲရိုက်ထားသည့် ပုံများသာမက ကမ္ဘာ့ဖလားဆုကိုပါ ကိုင်မြှောက်ထားသည့် ပုံများကို သူ၏ အင်စတာဂရမ်အကောင့်တွင် တင်ခဲ့ခြင်းဖြစ်သည်။
အဆိုပါ ဆုဖလားမှာ ယခင်က အနိုင်ရရှိခဲ့သူများနှင့် နိုင်ငံ့ခေါင်းဆောင်များ အပါအဝင် ရွေးချယ်ခံထားရသော လူတစ်စုသာ ထိတွေ့ကိုင်မြောက်နိုင်သည်ဟု ဖီဖာ၏ တရားဝင် ၀က်ဘ်ဆိုက်တွင် ဖော်ပြထားသည်။
“ဖြစ်စဉ်ကို ပြန်လည် သုံးသပ်ပြီးနောက် ဖီဖာဟာ ဒီဇင်ဘာလ ၁၈ ရက်နေ့ လုဆေးလ် အားကစားကွင်း ပိတ်ပွဲအခမ်းအနားအပြီး ကွင်းထဲသို့ လူတစ်ယောက်ချင်းစီ မမှန်ကန်တဲ့ နည်းလမ်းတွေနဲ့ ဘယ်လို ဝင်ရောက်ခွင့် ရလာသလဲဆိုတာကို စုံစမ်းဖော်ထုတ်နေပါတယ်” ဟု ကမ္ဘာ့ဘောလုံးအဖွဲ့ချုပ် ဖီဖာက ထုတ်ပြန်ချက်တွင် ဖော်ပြထားသည်။
ဆော့ဘေ့သည် အင်စတာဂရမ်ပေါ်တွင် ဖော်လိုဝါ သန်း ၅၀ ရရှိထားသူဖြစ်ပြီး တမူထူးခြားသော အသားလှီးပုံ၊ ဆားဖြူးပြပုံတို့ဖြင့် နာမည်ကြီးလာသူဖြစ်သည်။
Source: CNN
