ဗဟိုဘဏ်မှ နိုင်ငံခြားငွေများ ဆက်တိုက်ရောင်းချလာပါက ငွေစျေးကျနိုင်ဟုသုံးသပ်နေ
ပြည်တွင်း၌နိုင်ငံခြားငွေလဲလှယ်နှုန်းမြင့်တက်လာသည့်အတွက် ပြင်ပငွေကြေးဈေးကွက်တွင် စျေးမဖွင့်ကြသည်များလည်းရှိနေသည်။
ဇွန်လ ဒုတိယအပတ်မှစတင်ကာ နိုင်ငံခြားငွေလဲလှယ်နှုန်း တဖြည်းဖြည်းမြင့်တက်လာခဲ့ရာ ယနေ့တွင် တစ်ဒေါ်လာ ၄၅၆၀ ကျပ်အထိမြင့်တက်လာခဲ့သည်။
လာမည့်ရက်သတ္တပတ်အတွင်း ဗဟိုဘဏ်အနေဖြင့် အခြားကုန်စည်များအတွက် အမေရိကန်ဒေါ်လာ ၁၀ သန်း ရောင်းချပေးရန် စီစဉ် ဆောင်ရွက်လျက်ရှိကြောင်း သိရသည်။
နိုင်ငံခြားငွေလိုအပ်သည့် လုပ်ငန်းရှင်များအနေဖြင့် မြန်မာနိုင်ငံတော်ဗဟိုဘဏ်၏ Website ကို နေ့စဉ်ကြည့်ရှုပြီး FX Trading တွင် ဝင်ရောက်ဝယ်ယူနိုင်ကြောင်းဆိုသည်။
ငွေစျေးတက်ရသည့်အကြောင်းရင်းများကို စီးပွားရေးသမားများ သုံးသပ်ပြောဆိုသည်ကိုကောက်နုတ်ဖော်ပြသွားပါမည်။
အကြောင်းရင်းများထဲက တခုမှာ ထိုင်း ရှိ မြန်မာနိုင်ငံသား ဒါရိုက်တာပါဝင်သော ကုမ္မဏီဘဏ်အကောင့်အချို့ များ ဆိုင်းငံ့ခံထားနေရကာ ၂၀၂၅ခု ဇွန် ၁၂ရက် မှစကာ နိုင်ငံတကာပို့ လွှဲငွေများတွင် မြန်မာပါဝင်မှုရှိမရှိ စီစစ်ပြီး ကန့်သတ်မှုများလုပ်ဆောင်လျှက်ရှိနေခြင်းကလည်းအချက်တခုဖြစ်နေကြောင်းသိရသည်။
ထို့ကြောင့် ၁ဘတ်လျင် ၁၃၀ ကျပ်ဖြင့်ငြိမ်နေသောငွေစျေးသည်ယခုအခါ ၁၄၀ ကျပ်သို့ စျေးပြောင်းသွားသည်။
အချို့ကလည်း ကမ္ဘာနိုင်ငံရေးအခင်းအကျင်း မတည်ငြိမ်မှုကို အကြောင်းပြု၍ နိုင်ငံခြားတွင်လည်း စတော့စျေးကွက် အတက်အကျ ကို ကစားနေကြရာ ရွှေစျေးကိုဆွဲတင်လျှက်ရှိနေသောကြောင့် ရွှေကိုအမှီပြုပြီး အခြားငွေစျေးများလှုပ်ခတ်သည်ဟုယူဆကြသည်။ ကမ္ဘာနိုင်ငံရေးငြိမ်ပါက စျေးနူန်းငြိမ်နိုင်သလို ပြည်တွင်းတွင်လည်း ဗဟိုဘဏ် ထိမ်းကျောင်းမှုအားကောင်းပါက စျေးငြိမ်နိုင်ကြောင်းသုံးသပ်ကြသည်။
အချို့ကလည်းဒေသတွင်းမူးယစ်ဆေး ကိစ္စများကြောင့်လားဟုထင်ကြသည်။
ILO ၏ ပုဒ်မ ၃၃ ကျင့်သုံးမည်ဟု အသံထွက်ပေါ်ခြင်းနှင့်တော့ မသက်ဆိုင်ကြောင်းဆိုကြသည်။
လက်ရှိအခြေအနေကို အကြောင်းပြချက်တစ်ရပ်အဖြစ်အသုံးချပြီး ငွေကြေးစျေးကွက် မတည်ငြိမ်အောင် လုပ်နေသူများအားလည်း ကပ်ပေါင်းစုံကြားက ပြည်သူ့ဘဝ ကို စာနာစေလိုကြောင်း ခက်ခဲစွာလုပ်ကိုင်နေရသူများက သိစေလိုသည့်ဆန္ဒရှိနေကြသည်။
မြန်မာနိုင်ငံတော်ဗဟိုဘဏ်အနေဖြင့် စက်သုံးဆီ၊ စားသုံးဆီ၊ ဆေး၊ ဆေးဝါးနှင့်ဆေးဝါး ဆက်စပ်ပစ္စည်း၊ စက်မှုကုန်ကြမ်း၊ ဆောက်လုပ်ရေးလုပ်ငန်းသုံးပစ္စည်း၊ ဓာတ်မြေဩဇာ၊ စားသောက်ကုန်နှင့် အခြားကုန်စည်များတင်သွင်းသည့် သွင်းကုန်လုပ်ငန်းရှင်များအား FX Trading Paltform မှတစ်ဆင့် နိုင်ငံခြားငွေများ ရောင်းချပေးလျက်ရှိကြောင်းနှင့် ၂၀၂၅ ခုနှစ်၊ ဇန်နဝါရီလမှ မေလအထိ အမေရိကန်ဒေါ်လာ ၅၆၂.၀၆ သန်း၊ တရုတ်ယွမ် ၁၉.၅၂ သန်းနှင့် ထိုင်းဘတ် ၁,၀၄၁.၁၀ သန်းတို့အား ရောင်းချပေးပြီးဖြစ်ကြောင်း၊ ဇွန်လအတွင်း တစ်ရက်ပျမ်းမျှ အမေရိကန်ဒေါ်လာ ၆.၅၅ သန်း၊ တရုတ်ယွမ် ၀.၃၅ သန်းနှင့် ထိုင်းဘတ် ၁.၂၅ သန်းတို့အား မြန်မာနိုင်ငံတော်ဗဟိုဘဏ်က ဝင်ရောက်ရောင်းချပေးထားပြီးဖြစ်ကြောင်း စာရင်းများအရသိရပါသည်။