ရန်ကုန်တိုင်းအတွင်း ပြေးဆွဲလျက်ရှိသည့် ခရီးသည်တင် YBS ကားများ တစ်စီးနှင့်တစ်စီးလုယက်မောင်းနှင်၍ ကျော်တက်ပါက ဖေဖော်ဝါရီ ၁ ရက်မှစတင်၍ ဒဏ်ငွေချမှတ်သွားမည်ဖြစ်သည်။
ဇန်နဝါရီ ၂၀ရက် နံနက် ၉ နာရီခွဲက ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC)မှ ကြီးမှူးပြုလုပ်သည့် YBS ယာဉ်မောင်းများ ယာဉ်အန္တရာယ်ကင်းရှင်းရေးဆွေးနွေးပွဲအမှတ်စဉ်(၁၉)တွင် YRTC တွဲဖက်အတွင်းရေးမှူးဦးလျန်ကျင့်မန်၏ ပြောကြားချက်အရ သိရသည်။
YRTC ၏အဓိက ရည်မှန်းချက်ဖြစ်သည့်“ဘေးကင်းလုံခြုံပြီး ဝန်ဆောင်မှုကောင်းသည့် အများပြည်သူသယ်ယူပို့ဆောင်ရေးစနစ်”ဖြစ်ထွန်းစေရန် မိမိတို့၏ ကျေးဇူးရှင်များဖြစ်သည့် ခရီးသွားလုပ်သားပြည်သူများစီးနင်းလိုက်ပါသည့် ယာဉ်သည် သန့်ရှင်းသပ်ရပ်ပြီး ဝန်ဆောင်မှုကောင်းကောင်းဖြင့် လိုရာခရီးကိုပို့ဆောင်ပေးရမည်ဟု ပြောကြားခဲ့သည်။
ထို့ပြင် ယာဉ်စီးခသတ်မှတ်နှုန်းထက် ပိုမိုကောက်ခံခြင်း၊ စပယ်ယာ(ယာဉ်နောက်လိုက်)တင်မောင်းခြင်းများမပြုလုပ်ရန်လည်း မှာကြားခဲ့သည်။
“ဖေဖော်ဝါရီ ၁ ရက်ကစပြီး YBS ကားတွေ တစ်စီးနဲ့တစ်စီးကျော်တက်မောင်းနှင်ရင် တစ်ကြိမ်ကျော်တက်ရင် ဒဏ်ငွေ ၁၀၀၀၀ ချမှတ်သွားမှာပါ”ဟု YRTC တွဲဖက်အတွင်းရေးမှူးဦးလျန်ကျင့်မန်ကပြောသည်။
ထို့ပြင် YBS များသည် လက်ယာကပ်မောင်းရမည်ဖြစ်ပြီး အခြားယာဉ်များပိတ်နေပါက ဒုတိယယာဉ်ကြောသို့တက်၍ မောင်းနှင်ရမည်ဖြစ်ကာ ယာဉ်များတစ်စီးနှင့်တစ်စီး ကျော်ခွရပ်ထားခြင်းကြောင့် လမ်းကြောအားလုံးပိတ်သွားခြင်းမျိုးကြုံတွေ့နေရကြောင်း လမ်းအသုံးပြုသူများတိုင်ကြားလာ၍ စည်းကမ်းထိန်းသိမ်းရေးနှင့်စစ်ဆေးရေးအဖွဲ့၊ နည်းပညာ Telematics စက်များဖြင့် စောင့်ကြည့်နေမည်ဟု ပြောသည်။
YBS ကုမ္ပဏီတစ်ချို့မှယာဉ်မောင်းများသည် ခေါက်ရေပြည့်ရုံမောင်းနှင်ကြ၍ ခရီးသည်များမှတ်တိုင်မှတားစီးသော်လည်း မရပ်ပေးခြင်းများကိုကြုံတွေ့နေရသည်ဟု ပြောသည်။
“ဒဏ်ကြေးလိုချင်လို့ စည်းမျဉ်းစည်းကမ်းတွေ ချမှတ်ထားတာမဟုတ်ပါဘူး ယာဉ်မောင်းတွေအနေနဲ့ ယာဉ်စည်းကမ်း၊လမ်းစည်းကမ်းလိုက်နာစေဖို့ရည်ရွယ်ချမှတ်တာပါ”ဟု YRTC တွဲဖက်အတွင်းရေးမှူးဦးလျန်ကျင့်မန်ကပြောသည်၊